1 ซามูเอน 20
20
ดาวิด เหธา โยนาทาน เหลียบ แหง่ง หว่า
1ดาวิด เยียม ลามา ฒี่ง, นาโย้ด วั้ว เปย๋า มี่ง ล์อ โยนาทาน. ดาวิด ก๊อง, “เยีย โหฒว หาย หญู่ง ไฟ? เยีย ต่อง หาย หญู่ง ฒุ์ย? เยีย โหฒว หาย หญู่ง ต่อง เม่ย เญย เตีย นิ่น หธีง ต้าย อ๋อย เฒาะ เยีย เญย แหม่ง?”
2โยนาทาน เตา นิ่น, “ฒู้ง ไม้ ม่าย! เม่ย ไม้ หฒุ ไต่ เหลาะ. เยีย เญย เตีย โหฒว หาย หญู่ง ไม้ กุ๊น สี่ โฮล ไฟ ไฝ, ไม้ ม่าย เหยียด หญู่ง นิ่น ไม้ ปุน เยีย ฮิ้ว. เยีย เญย เตีย ฝู่ง ปี๋ง น้าย เต๋ย สี่ ไม้ บั๋ว เยีย? ต๋าย ไม้ เฒ์ย ฮนั้ง หน่าย ซ่าะ?”
3มป่า ดาวิด แอ๋ง โฮ้ว หว่า ก๊อง, “เม่ย เญย เตีย หฒะเก้ง ฮิ้ว ตุ๊ เยีย หอบ เม่ย เญย เฮญี้ยว ไห่. นิ่น เยียม เฮญี้ยว ฮนั้ม, ‘ไม้ ตู๋ง ปุน โยนาทาน ฮิ้ว ตุ๊ น้าย เต๋ย สี่. เหฑีย นิ่น เฮญี้ยว มุน ไห่.’ เยีย เฒี้ยง เจี๊ยน เฒี่ยง เจี๊ยน เญย เฒี้ยว เหธา เม่ย กั้น เญย แหม่ง เฒียนๆ เญย ก๊อง, เยีย เล่ย หฒุ ไต่ เญย เจ๊า เหยียด เบี่ย ฮนั้ง.”
4โยนาทาน ฯฒฯ ก๊อง บั๋ว ดาวิด, “เม่ย ฮนั้ง หาย นอ บั๋ว เยีย, เยีย ฯฒฯ เหว่ย เม่ย ฮนั้ง วั้ว นอ โหฒว.”
5ดาวิด ฯฒฯ บั๋ว โยนาทาน, “ฌัง ฮนอย เซ แซง-เยี้ยด ฮนอย. เยีย อ๋อย หฒุ เหธา ฮู่ง เตี๋ย จวั่ง เตี้ย หญั่น หฮนาง, มป่า โท้ ปุน เยีย มี่ง ปี๋ง เจี๊ยน วั้ว หล่ม-ฮวาง เถา แซง-ฟาม วั้ว ฮนอย ลู่ง ม์าน-หฮมวัง.#ซ้าว เมี่ยน 28:11 6สี ก๊อง เม่ย เญย เตีย ปวัด เยีย ไม้ เยียม หน่าย เตี้ย นอ, โท้ เม่ย เถง บั๋ว ฮู่ง เตี๋ย, ‘ดาวิด โท้ เยีย ปุน นิ่น ก๊าน หฑวน นิ่น กั้น เญย ป๊วน-มู้ง, เบดเลเฮม มู้ง, เหว่ย หฒุ เยียม วั้ว นิ่น เญย เปย๊า ฒง เมี่ยน ฝ่ง ห่อ หฮญังๆ เหฒี่ย เญย กะน้าย.’ 7สี ก๊อง ฮู่ง เตี๋ย ก๊อง, ‘หลง อ๊ะ,’ เยีย, เม่ย เญย โปว, ฯฒฯ เยียม หลง. มป่า สี ก๊อง นิ่น เฉีย เจี์ย นอ, เม่ย ฯฒฯ ฮิ้ว ตุ๊ นิ่น ด่ง หาย ฒู้ง อ๋อย ห่อย เยีย. 8เหว่ย น้าย โท้ เม่ย โหฒว หลง ปุน เยีย, เม่ย เญย โปว, เหว่ย หฒุ เม่ย เหธา เยีย ตอง เจี๊ยน เฒี้ยว แล์ง เจี์ย แหง่ง หว่า#20:8 ฮิบลู หว่า ก๊อง “เฒี้ยว เญย แหง่ง หว่า”. หมี่ อ๊ะ. มป่า สี ก๊อง เยีย โหฒว ต่อง ฒุ์ย นอ, โท้ เม่ย กั้น ไต๋ เยีย. เหว่ย หาย ติ่ว ต้อ เยีย มี่ง ปุน เม่ย เญย เตีย ไต๋?”
9โยนาทาน ฯฒฯ ก๊อง, “ไม้ ตู๋ง ปุน ม่าย น้าย เต๋ย สี่ ธ้วด, สี ก๊อง เยีย ฮิ้ว ตุ๊ เยีย เญย เตีย เจี์ย เฮญี้ยว ห่อย เม่ย, เยีย ฝู่ง ไม้ ก๊อง บั๋ว เม่ย?”
10ดาวิด ฯฒฯ ก๊อง บั๋ว โยนาทาน, “สี ก๊อง เม่ย เญย เตีย ก๊อง เธี้ยว ปุน เม่ย นอ, หาย เต้า ไฮ่ บั๋ว เยีย?”
11โยนาทาน เตา ดาวิด, “ต้าย ม่าะ! บัว มี่ง วั้ว หล่ม-ฮวาง.” นิ่น บัว อี เต้า ฯฒฯ มี่ง หล่ม-ฮวาง อ๊ะ.
12โยนาทาน ก๊อง บั๋ว ดาวิด, “โท้ เฒี้ยว, อิสะลาเอน เญย ทิน-ฮู่ง, เถง โหฒว ฒอง-เหฒง. ฌัง ฮนอย เล่ย ไม้ โก น้าย นอม เฒี่ยง โห่, ไฟ เถา ตะฟาม ฮนอย, เยีย อ๋อย เสย เยีย เญย เตีย เญย เฮญี้ยว. สี ก๊อง ม่าย เฮญี้ยว โหฒว หลง ปุน ดาวิด นอ, เยีย ฯฒฯ พ้าย เมี่ยน มี่ง บั๋ว เม่ย. 13มป่า สี ก๊อง เยีย เญย เตีย ม่าย เฮญี้ยว อ๋อย ห่อย เม่ย เญย แหม่ง, เยีย หย่า ไม้ ปุน เม่ย ฮิ้ว, ไม้ เถง เม่ย แป้ง ออน เญย เปย๋า ดุ๊ด นอ, โท้ เฒี้ยว เฮนี้ยๆ เญย ตี่ง เยีย, โยนาทาน, เญย ฒุ์ย. โท้ เฒี้ยว เหธา เม่ย เยียม, ฮนั้ง ฒิ่น ด่าง เหธา เยีย เญย เตีย เยียม นอ. 14สี ก๊อง เยีย หธ่อ ม่าย แหม่ง เฒี่ยง เจี๊ยน, โท้ เม่ย ฮนั้ง เฒี้ยว เหฒียบ ฒัวะ เญย โหฒว หลง#20:14 ไฟ ฮนั้ม. ปุน เยีย ไม้ หฒุ ไต่.#20:14 ม่าย เต๋ย โล์-ฮนอย โซว ก๊อง “มป่า สี ก๊อง เยีย ไต่”. 15เฒี้ยว เหมียด เหฑ่ง เยียม เดา-เป้ย เม่ย เญย เหยียด ฒู้ง วิน-วั้ง วั้ว หฒั่น, โท้ เม่ย เหยียด ลิ์ว เหฒียบ ฒัวะ เญย โหฒว หลง ปุน เยีย เญย เฒ้ย-ฟุน.”#2 ซามูเอน 9:1
16โยนาทาน ฯฒฯ เหธา ดาวิด, เลี่ยม เหว่ย นิ่น เญย เฒ้ย-ฟุน, แล์ง เจี์ย แหง่ง หว่า, หย่า ก๊อง “โท้ เฒี้ยว จ๊าว วิน ปุน ดาวิด เญย เหยียด ฒู้ง วิน-วั้ง.” 17โยนาทาน ฮนั้ม ดาวิด ฯฒฯ ปุน ดาวิด แอ๋ง แล์ง หฑุ่น หว่า, เหว่ย หฒุ นิ่น ฮนั้ม ดาวิด, ด่ง ฮนั้ม กั้น เญย แหม่ง.
18โยนาทาน แอ๋ง ก๊อง บั๋ว ดาวิด, “ฌัง ฮนอย เซ แซง-เยี้ยด ฮนอย, เมี่ยน ฯฒฯ ปวัด เม่ย ไม้ เยียม เหว่ย หฒุ เม่ย เญย เอ๊ย ขูง. 19ฮนาง ฮนอย อ๋อย หฒุ เซี้ยบๆ เญย เหฌี่ย มี่ง เถา เม่ย ฒิ่น ด่าง ปี๋ง เญย ต๋อง, เยียม เอเซน เญย หละเปย๊ย กะเฮลน ฒั้ว เจี๊ยน. 20เยีย อ๋อย หูง เจี๊ยน วั้ว นอม หละเปย๊ย กะเฮลน ป๊วน ปัว ฑิด ฟอง ฮนั้ง ป๊วน แบะ นอ. 21ป๊วน ลิ์ว, เยีย ฯฒฯ พ้าย เต้า ตอน มี่ง หย่า บั๋ว นิ่น, ‘มี่ง เฑ์า ฟอง ต้าย ม่าะ!’ สี ก๊อง เยีย บั๋ว วั้ว เต้า ตอน, ‘หมั่ง ม่าะ! ฟอง เยียม น้าย ปูง. เฑ์า ต้าย ม่าะ!’ กุ๊น ต้าย อ๊ะ, เหว่ย หฒุ เยีย เฒี้ยง เจี๊ยน เฒี่ยง เจี๊ยน เญย เฒี้ยว แล์ง เม่ย ไฮ่ เยียม ตุ๊ หลง. ไม้ ม่าย หาย หญู่ง สี่. 22สี ก๊อง เยีย บั๋ว วั้ว เต้า ตอน, ‘หมั่ง ม่าะ! ฟอง เยียม เม่ย เญย วั้ว ด่าง แหมง,’ นอ, เม่ย อ๋อย หฒุ มี่ง อ๊ะ, เหว่ย หฒุ เฒี้ยว พ้าย เม่ย มี่ง. 23ฮนั้ง หน่าย เยีย เหธา เม่ย ก๊อง น้าย เต๋ย เจ๊า-โหล่ว, โท้ เฒี้ยว เยียม เยีย บัว บุด๋ง เหยียด ลิ์ว โหฒว ฒอง-เหฒง.”
24ดาวิด ฯฒฯ มี่ง ปี๋ง วั้ว หล่ม-ฮวาง. เถา แซง-เยี้ยด ฮนอย, ฮู่ง เตี๋ย ฯฒฯ เฒว์ย เจี๊ยน เตี้ย หญั่น หฮนาง. 25ฮู่ง เตี๋ย เฒว์ย เจี๊ยน นิ่น เหยียด เกา เฒว์ย เญย ต๋อง นิด เจี๊ยน หฌ่ง. โยนาทาน ต๋อย เฮมียน เฒว์ย,#20:25 ฮิบลู หว่า ก๊อง โซ้ว เจี๊ยน. อับเน เฒว์ย เซาโล เญย กะเฮลน, มป่า ดาวิด เญย ต๋อง ขูงๆ วั้ว. 26วั้ว ฮนอย เซาโล ไม้ ก๊อง หาย หญู่ง เหว่ย หฒุ นิ่น เยียม เฮญี้ยว ฮนั้ม, “เหฑีย ดาวิด ปวั้ง หฒุ สี่. ต๋าย นิ่น ม่าย หวุย, นิ่น ด่ง หาย ฒู้ง ไม้ ธีง-เหฑ่ง.” 27มป่า ตะเหญ่ย ฮนอย, เซ แซง-เหญ่ย วั้ว ฮนอย, ดาวิด เญย ต๋อง หธ่อ ขูง เญย. เซาโล ฯฒฯ หน่าย นิ่น เญย ตอน, โยนาทาน, “เจียดซี เญย ตอน อะฮนอย เหธา อี้ ฮนอย เหว่ย หาย ติ่ว ไม้ ต้าย หญั่น หฮนาง?”
28โยนาทาน เตา เซาโล, “ดาวิด ชะ โท้ เยีย ปุน นิ่น หฑวน เบดเลเฮม. 29นิ่น ก๊อง, ‘โท้ ปุน เยีย มี่ง, เหว่ย หฒุ เยีย เญย เปย๊า ฒง เมี่ยน เยียม วั้ว นอม มู้ง ฝ่ง ห่อ เหฒี่ย. เยีย เญย ก๋อ บัว เห่ว เยีย อ๋อย หฒุ มี่ง. สี ก๊อง เม่ย ปวัด หอบ นอ, โท้ ปุน เยีย หฑวน มี่ง หมั่ง เยีย เญย ก๋อ บัว.’ เหว่ย น้าย นิ่น หธีง ต้าย ไม้ ตุ๊ ต้าย เหธา ฮู่ง เตี๋ย จวั่ง เตี้ย หญั่น หฮนาง.”
30เซาโล ฯฒฯ เฉีย เจี์ย! ไห่ โยนาทาน. เซาโล ก๊อง, “เม่ย หน่าย เต้า เบี๊ยน เฮญี้ยว, กู๊ ไกว๋ มเซียะ ตอน เญย ฝุเจว๊ย อ้า! เยีย ฝู่ง ไม้ ฮิ้ว ตุ๊ เม่ย กิ๊น เจียดซี เญย ตอน โหฒว ปุน เม่ย กั้น หฒุ ไญ้, ปุน เม่ย กั้น เญย มา หฒุ ป่าย เฮมียน.#20:30 ฮิบลู หว่า ก๊อง “ปุน เม่ย เญย มา เญย แล่ง แก๊ง เญย ซิน หฒุ ไญ้”. 31ตะฟ่าน เจียดซี เญย ตอน หธ่อ ม่าย แหม่ง เฒี่ยง น้าย นอม ลู่ง เดี๊ย นอ, เม่ย กั้น ไฟ เม่ย เญย กั๊วะ ไม้ ไฮ่ เหลียบ ตุ๊ ว้วน อ๊ะ. อี้ หฒั่น พ้าย เมี่ยน มี่ง ต้อ นิ่น ต้าย เยีย น้าย. นิ่น ด่ง หาย ฒู้ง อ๋อย หฒุ ไต่ อ๊ะ.”
32โยนาทาน ฯฒฯ เตา นิ่น เญย เตีย, เซาโล, “นิ่น เหว่ย หาย ติ่ว อ๋อย หฒุ ไต๋ ไต่? นิ่น โหฒว หาย หญู่ง?” 33เซาโล ฯฒฯ ปิว นิ่น เญย ธัง มี่ง อ๋อย ฑบ โยนาทาน. โยนาทาน ฯฒฯ ฮิ้ว ตุ๊ นิ่น เญย เตีย หฒะเก้ง เจี์ย เฮญี้ยว อ๋อย ไต๋ ดาวิด อ๊ะ.
34โยนาทาน หฒะเก้ง เฉีย เจี์ย ไห่, ฯฒฯ เจี์ย ซิน ต้าย เหฌี่ย เตี้ย หมี่ อ๊ะ. แซง-เหญ่ย วั้ว ฮนอย ไม้ หญั่น หฮนาง อ๊ะ, เหว่ย หฒุ นิ่น เฑ่า ไห่ ดาวิด, หย่า เหว่ย หฒุ นิ่น เญย เตีย ด่ง หน่าย ป่าย ดาวิด เญย เฮมียน.
35ตะเหญ่ย ดอม, โยนาทาน ธ้วด มี่ง วั้ว หล่ม-ฮวาง, หฒิว นิ่น เหธา ดาวิด ตุ๋น เหฒียง ต่อย. แอ๋ง ม่าย เต้า ตอน-ไฝ เหธา เจี๊ยน นิ่น มี่ง. 36โยนาทาน บั๋ว วั้ว เต้า ตอน, “ถิว มี่ง เฑ์า เยีย ป๊วน มี่ง เญย ฟอง โอ่.” วั้ว เต้า ตอน ถิว มี่ง วั้ว หฒั่น, โยนาทาน ฯฒฯ ป๊วน ฑิด ฟอง มี่ง ด๊อด วั้ว เต้า ตอน เญย วั้ว ด่าง แหมง. 37วั้ว เต้า ตอน มี่ง เถา โยนาทาน เญย ฟอง ด๊อด เญย ต๋อง, โยนาทาน เห่ว เจี๊ยน ก๊อง, “ฟอง ไม้ เฒ์ย เยียม เม่ย เญย วั้ว ด่าง ไฟ?” 38โยนาทาน แอ๋ง เห่ว เจี๊ยน บั๋ว วั้ว เต้า ตอน, “ก๊าน เซี้ยบๆ เญย มี่ง. ไม้ ตู๋ง ไง่.” วั้ว เต้า ตอน ฯฒฯ เฑ์า ฟอง ต้าย, หฑวน นิ่น เญย เฒี้ยว วั้ว. 39มป่า วั้ว เต้า ตอน ไม้ ฮิ้ว ตุ๊ น้าย เต๋ย เจ๊า-โหล่ว. ขูง โยนาทาน เหธา ดาวิด กั้น ฮิ้ว ฮนั้ง. 40โยนาทาน ฯฒฯ เฒาะ จวัง-หฒิน เหธา ฟอง ปุน วั้ว เต้า ตอน, เห่ว นิ่น, “หฑวน อ๊ะ. ต้อ น้าย เต๋ย กะน้าย หฑวน วั้ว ฒี่ง อ๊ะ.”
41วั้ว เต้า ตอน เยี้ยด มี่ง ลิ์ว, ดาวิด ฯฒฯ เยียม วั้ว นอม หละเปย๊ย เญย น่าม ปูง ธ้วด ต้าย หย่า พัวะ เหฌี่ย เฮมียน เถา เดา ป๋าย โยนาทาน ปัว ป๋าย. นิ่น บัว อี เต้า ฯฒฯ ฒม จ๋า หย่า เญี้ยม มป่า ดาวิด เญี้ยม เก้า ธั้ม.
42โยนาทาน ก๊อง บั๋ว ดาวิด, “กุ๊น แป้ง ออน เญย มี่ง อ๊ะ, เหว่ย หฒุ บัว อี เต้า เฒี้ยง เจี๊ยน เฒี้ยว เญย บั๋ว แล์ง แหง่ง หว่า ก๊อง, ‘โท้ เฒี้ยว เยียม เม่ย เหธา เยีย บุด๋ง, หย่า เยียม เม่ย เญย เฒ้ย-ฟุน เหธา เยีย เญย เฒ้ย-ฟุน บุด๋ง, เหยียด ลิ์ว โหฒว ฒอง-เหฒง.’” ดาวิด ฯฒฯ มี่ง หมี่ อ๊ะ. โยนาทาน หย่า หฑวน วั้ว ฒี่ง อ๊ะ.
Currently Selected:
1 ซามูเอน 20: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
