Arumi 4
4
Mufano wa kuluphiro ra Burahemu
1Enehu a chijeso, mimi vivi ninagomba dzulu ya Burahemu mukare wehu siswi Ayahudi, ariye naye waphokerwa ni Mulungu dza mwenye haki kwa kuluphirore. 2Kala Burahemu waphokerwa ni Mulungu dza mwenye haki kwa mahendoge, hʼaya angari kukala una utʼu wa kuhendera ngulu, ela tsʼi mbere za Mulungu kamare. 3#Mwa 15:6; Agal 3:6Maana, hata Maandiko ga Mulungu ganaamba, “Burahemu wamukuluphira Mulungu, ndipho achiphokerwa dza mwenye haki kwa kuko.”
4Mutʼu achihenda kazi, unariphwa, na cho chakwe ariphwacho, atʼu kʼaaidima kuchamba ni manoso, ela amba ni jashore. 5Ndo mutʼu yetsʼilola ga kaziye kwamba yindamokola, hata umukuluphira Mulungu asameheye adambi dza kwamba unaapʼa manoso, Mulungu mutʼu yiye undamuphokera dza mwenye haki, kwakukala, unamukuluphira. 6Daudi naye wagomba dza gago dzulu ya baha yiriyo na mutʼu aphokerwaye ni Mulungu dza mwenye haki, na wakala kʼalola ga kaziye yimokole. 7#Zab 32:1, 2Yiye waamba,
“Baha aratʼu ario mahendo gao mai gasamehewa,
ario dambi zao zauswa.
8Na baha mutʼu ariye Mulungu kʼamutarira kamare madambige.”
9Ndo yikale baha yo, yi dzulu ya Ayahudi hichiyao tu, ario ni atʼu abitwʼaotsʼi, hebu hata kwa atʼu a makabila manjine nao, ario ni atʼu otsʼibitwʼatsʼi? Mimi nidzimwandikira Andiko rambaro, “Burahemu waphokerwa ni Mulungu dza mwenye haki kwa kuluphirore.” 10Ndo ninamuhenza mumanye vivyo kukala, Burahemu unaphokerwa ni Mulungu dza mwenye haki, wakala kʼadzangwe kubitwʼatsʼi, ela tsʼi hipho ariphokala ubitwʼatsʼi kare. 11#Mwa 17:10Burahemu wakudzabitwʼatsʼi phokala uphokerwa kare ni Mulungu dza mwenye haki. Kubitwʼatsʼi kuko, kwakala kunaonyesa kukala, Mulungu wakala udzimuphokera kare Burahemu, mana, wakala unamukuluphira kare hata phokala kʼadzangwe kubitwʼatsʼi. Ndo Burahemu ndiye mukare wa chiroho wa osi amukuluphirao Mulungu ario kʼaabitwʼatsʼi, na Mulungu unaaphokera vivyo dza enye haki. 12Atʼu abitwʼaotsʼi nao, yiye Burahemu ni mukare wao wa chiroho vivyo. Na tsʼi kwakukala ábitwʼatsʼi, ela kwakukala, ao nao anatuwa yo njira ya kuluphiro yotuwiwa ni mukare wehu Burahemu phokala kʼadzangwe kubitwʼatsʼi.
13 #
Mwa 17:4-6; 22:17, 18; Agal 3:29 Mwimwi manyani kukala, Mulungu wamulaga Burahemu na atʼu a mudzunguwe kukala, dunia yosi yindakala yao. Na chilagane chicho, kʼachiikirwe kwa Burahemu wakala unatuwa malagizo ga Shariya, ela kwakukala, wakala unakuluphira, na achikala uphokerwa dza mwenye haki. 14#Agal 3:18Kalapho o atʼu atuwao Shariya ndiophokera cho chilagane, ko kumukuluphira Mulungu kungari kʼakuna mana, na cho chilagane cholagwa ni Mulungu nacho, chingari kʼachina tende kamare. 15Shariya ya Musa ndiyo yirehayo chitai cha Mulungu. Photsʼi shariya, kʼaphavunzwa shariya.
16 #
Agal 3:7
Ndo chilagane cha Mulungu chituwana na kuluphiro, na wachilaga kwa mbazize mwenye tu kwa ahakikishe kukala, chilagane chicho wachilaga hata atʼu osi a chiroho a mudzungu wa Burahemu. Ndo chilagane chicho chi dzulu hata ya atʼu amukuluphirao Mulungu dza Burahemu arivyomukuluphira, ela tsʼi atʼu atuwao Shariya ya Musa hichiyao tu. Siswi hosini mukare wehu wa chiroho ni Burahemu, 17#Mwa 17:5na vivyo vinagwa sawa na Maandiko ga Mulungu gaambago, “Uwe nidzikuhenda ukale mukare wa atʼu a viryomo vinji.” Ndo yiye Mulungu yekuluphirwa ni Burahemu, wamwika Burahemu akale mukare wehu. Mulungu yiye ndiye yiye afufulaye afadzi, na aihaye vitʼu virivyo kʼaviko dza kwamba vi kuko kare. 18#Mwa 15:5Burahemu ariphoambwa ni Mulungu, “Atʼu a mudzunguo andakala anji muno,” kwakala kʼakuna chochosi cha kumuhenda agakuluphire gago. Ela yiye waenderera kumukuluphira Mulungu, na kulolera gokala ulagwa, hata chilagane chicho chichichimira. 19#Mwa 17:17Burahemu unalagwa chilagane chicho ni Mulungu, wakala unatapira myaka gana mwenga, ambapho wakala kʼaidima utʼu kahiri. Muchewe Sara naye wakala kʼavyala, ela Burahemu yiye waenderera kumukuluphira Mulungu jeri-jeri vivyo. 20Gosi gago wakala achigalilikana, ela kʼagamuhendere ariche kumukuluphira Mulungu. Chisha, kʼakalire na moyo wa kwamba, “Gaga golagwa ni Mulungu kʼagaidimikika,” hata yiye wakaza kumukuluphira Mulungu vyenye, na achimuhenda Mulungu alikwe. 21Yiye Burahemu wakala una kanuni kamare kukala, Mulungu wakala una widimi wa kugahenda gokala udzimulaga. 22Ndo yiye Burahemu, “waphokerwa ni Mulungu dza mwenye haki kwa kuluphirore.” 23Na Maandiko gago gaambago, “Yiye waphokerwa ni Mulungu,” kʼaga dzulu ya Burahemu hicheye tu. 24Mwimwi manyani kukala, gago ga dzulu yehu hata siswi hurio Mulungu undahuphokera dza enye haki, mana, hunamukuluphira yiye Mulungu yemufufula Bwana wehu Jeso Kʼirisito kulaa kuzimu. 25#Isa 53:4, 5Mulungu wamulavya Jeso Kʼirisito afe kwa madambi gehu, na achimufufula kulaa kuzimu kwa ahuphokere dza enye haki.
Currently Selected:
Arumi 4: CHIDUR
Highlight
Copy
Compare
Share
Want to have your highlights saved across all your devices? Sign up or sign in
Arumi 4
4
Mufano wa kuluphiro ra Burahemu
1Enehu a chijeso, mimi vivi ninagomba dzulu ya Burahemu mukare wehu siswi Ayahudi, ariye naye waphokerwa ni Mulungu dza mwenye haki kwa kuluphirore. 2Kala Burahemu waphokerwa ni Mulungu dza mwenye haki kwa mahendoge, hʼaya angari kukala una utʼu wa kuhendera ngulu, ela tsʼi mbere za Mulungu kamare. 3#Mwa 15:6; Agal 3:6Maana, hata Maandiko ga Mulungu ganaamba, “Burahemu wamukuluphira Mulungu, ndipho achiphokerwa dza mwenye haki kwa kuko.”
4Mutʼu achihenda kazi, unariphwa, na cho chakwe ariphwacho, atʼu kʼaaidima kuchamba ni manoso, ela amba ni jashore. 5Ndo mutʼu yetsʼilola ga kaziye kwamba yindamokola, hata umukuluphira Mulungu asameheye adambi dza kwamba unaapʼa manoso, Mulungu mutʼu yiye undamuphokera dza mwenye haki, kwakukala, unamukuluphira. 6Daudi naye wagomba dza gago dzulu ya baha yiriyo na mutʼu aphokerwaye ni Mulungu dza mwenye haki, na wakala kʼalola ga kaziye yimokole. 7#Zab 32:1, 2Yiye waamba,
“Baha aratʼu ario mahendo gao mai gasamehewa,
ario dambi zao zauswa.
8Na baha mutʼu ariye Mulungu kʼamutarira kamare madambige.”
9Ndo yikale baha yo, yi dzulu ya Ayahudi hichiyao tu, ario ni atʼu abitwʼaotsʼi, hebu hata kwa atʼu a makabila manjine nao, ario ni atʼu otsʼibitwʼatsʼi? Mimi nidzimwandikira Andiko rambaro, “Burahemu waphokerwa ni Mulungu dza mwenye haki kwa kuluphirore.” 10Ndo ninamuhenza mumanye vivyo kukala, Burahemu unaphokerwa ni Mulungu dza mwenye haki, wakala kʼadzangwe kubitwʼatsʼi, ela tsʼi hipho ariphokala ubitwʼatsʼi kare. 11#Mwa 17:10Burahemu wakudzabitwʼatsʼi phokala uphokerwa kare ni Mulungu dza mwenye haki. Kubitwʼatsʼi kuko, kwakala kunaonyesa kukala, Mulungu wakala udzimuphokera kare Burahemu, mana, wakala unamukuluphira kare hata phokala kʼadzangwe kubitwʼatsʼi. Ndo Burahemu ndiye mukare wa chiroho wa osi amukuluphirao Mulungu ario kʼaabitwʼatsʼi, na Mulungu unaaphokera vivyo dza enye haki. 12Atʼu abitwʼaotsʼi nao, yiye Burahemu ni mukare wao wa chiroho vivyo. Na tsʼi kwakukala ábitwʼatsʼi, ela kwakukala, ao nao anatuwa yo njira ya kuluphiro yotuwiwa ni mukare wehu Burahemu phokala kʼadzangwe kubitwʼatsʼi.
13 #
Mwa 17:4-6; 22:17, 18; Agal 3:29 Mwimwi manyani kukala, Mulungu wamulaga Burahemu na atʼu a mudzunguwe kukala, dunia yosi yindakala yao. Na chilagane chicho, kʼachiikirwe kwa Burahemu wakala unatuwa malagizo ga Shariya, ela kwakukala, wakala unakuluphira, na achikala uphokerwa dza mwenye haki. 14#Agal 3:18Kalapho o atʼu atuwao Shariya ndiophokera cho chilagane, ko kumukuluphira Mulungu kungari kʼakuna mana, na cho chilagane cholagwa ni Mulungu nacho, chingari kʼachina tende kamare. 15Shariya ya Musa ndiyo yirehayo chitai cha Mulungu. Photsʼi shariya, kʼaphavunzwa shariya.
16 #
Agal 3:7
Ndo chilagane cha Mulungu chituwana na kuluphiro, na wachilaga kwa mbazize mwenye tu kwa ahakikishe kukala, chilagane chicho wachilaga hata atʼu osi a chiroho a mudzungu wa Burahemu. Ndo chilagane chicho chi dzulu hata ya atʼu amukuluphirao Mulungu dza Burahemu arivyomukuluphira, ela tsʼi atʼu atuwao Shariya ya Musa hichiyao tu. Siswi hosini mukare wehu wa chiroho ni Burahemu, 17#Mwa 17:5na vivyo vinagwa sawa na Maandiko ga Mulungu gaambago, “Uwe nidzikuhenda ukale mukare wa atʼu a viryomo vinji.” Ndo yiye Mulungu yekuluphirwa ni Burahemu, wamwika Burahemu akale mukare wehu. Mulungu yiye ndiye yiye afufulaye afadzi, na aihaye vitʼu virivyo kʼaviko dza kwamba vi kuko kare. 18#Mwa 15:5Burahemu ariphoambwa ni Mulungu, “Atʼu a mudzunguo andakala anji muno,” kwakala kʼakuna chochosi cha kumuhenda agakuluphire gago. Ela yiye waenderera kumukuluphira Mulungu, na kulolera gokala ulagwa, hata chilagane chicho chichichimira. 19#Mwa 17:17Burahemu unalagwa chilagane chicho ni Mulungu, wakala unatapira myaka gana mwenga, ambapho wakala kʼaidima utʼu kahiri. Muchewe Sara naye wakala kʼavyala, ela Burahemu yiye waenderera kumukuluphira Mulungu jeri-jeri vivyo. 20Gosi gago wakala achigalilikana, ela kʼagamuhendere ariche kumukuluphira Mulungu. Chisha, kʼakalire na moyo wa kwamba, “Gaga golagwa ni Mulungu kʼagaidimikika,” hata yiye wakaza kumukuluphira Mulungu vyenye, na achimuhenda Mulungu alikwe. 21Yiye Burahemu wakala una kanuni kamare kukala, Mulungu wakala una widimi wa kugahenda gokala udzimulaga. 22Ndo yiye Burahemu, “waphokerwa ni Mulungu dza mwenye haki kwa kuluphirore.” 23Na Maandiko gago gaambago, “Yiye waphokerwa ni Mulungu,” kʼaga dzulu ya Burahemu hicheye tu. 24Mwimwi manyani kukala, gago ga dzulu yehu hata siswi hurio Mulungu undahuphokera dza enye haki, mana, hunamukuluphira yiye Mulungu yemufufula Bwana wehu Jeso Kʼirisito kulaa kuzimu. 25#Isa 53:4, 5Mulungu wamulavya Jeso Kʼirisito afe kwa madambi gehu, na achimufufula kulaa kuzimu kwa ahuphokere dza enye haki.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in