Arumi 2

Mulungu undaalamula hata Ayahudi otsʼitya

1 # Mat 7:1; Luk 6:37 Kwa vivyo asena, mwimwi muchikala munaalamula anzienu ni alongo, bee hata mwimwi alamuli namwi, kʼamuna cha kudzihehera hata mukakala mu ano ani. Mwimwi o anzienu muchialamula, bee mukala munadzilaumu mu alongo enye. Maana, gago gao mai agahendago, bee hata mwimwi namwi ndigo muhendago. 2Mulungu unaalamula ni alongo o ahendao gago, ela hosini hunamanya kukala, yiye ulamula haki na hakiye. 3Asena, mwimwi munaalamula anzienu ni alongo kwa anahenda mai, ela mwimwi namwi, gago munagahenda. Bee, manyani kamare kukala, Mulungu undamulamula mu alongo hata mwimwi. 4Mwimwi, Mulungu unamonera mbazi muno, na unagavumirira gago genu hata kʼamutiya akili kwa unamuhenza mutye. Ela heka mwi munamuphurya kwa unamonera mbazi? 5Mwimwi kʼamwambirika na munarema kutya, ela manyani kukala, Mulungu undamutiya akili vikali muno yo tsʼiku yondabitʼa chitaiche, na kulamula haki na hakiye. 6#Zab 62:12; Ndar 24:12Yiye undamuripha chila mutʼu gakwe awiryago kwa gohenda. 7Endererao kuhenda madzo na kumutsakula Mulungu kwa aalike, aahende aishimike, na akale moyo hata kare na kare, Mulungu ao undaaripha uzima uphya wa kare na kare. 8Ela o anjine ario adzimanya ao enye tu bahi, anarema kutuwa ujeri hata anaenderera kuhenda mai, ao Mulungu undaatsukirirwa, na aatiye akili. 9Atʼu osi ahendao mai, Mulungu ao undaashononesa, na aaturise. Na ko kutiywa akili kundaanza na o Ayahudi, ndipho chidzako kwende ko kwa atʼu a makabila manjine. 10Ela osi ahendao madzo, Mulungu ao undaapʼa ubomuwe, aahende aishimike, na asagale na reri. Na gago gandaanza ko kwa Ayahudi, ndipho gende ko kwa atʼu a makabila manjine. 11#Kʼumb 10:17Na Mulungu undalamula vivi, mana, kʼalola cheo cha mutʼu.

12Ayahudi osi a tsʼini za Shariya ya Musa. Ndo ao ahendapho dambi, andalamulwa ni Mulungu chishariya. Na atʼu a makabila manjine osi, kʼaa tsʼini za yiyo Shariya. Ela ao nao achihenda dambi, andayaya. 13Mulungu undalamula vivi, kwakukala, yiye kʼachiza atʼu dza enye haki kwa anamanya Shariya tu. Atʼu achizwao ni Mulungu dza enye haki, ni aratʼu atuwao malagizo ga Shariya. 14Atʼu a makabila manjine kʼaahewerwe Shariya ya Musa. Ela o enye aamulapho kuhenda malagizo ga Shariya, bee nikukala anaonyesa anagamanya gago ahenzwago ahende, na arigo kʼaahenzwa agahende, hata aripho kʼaahewerwe yiyo Shariya. 15Gago gao ahendago, bee ganaonyesa kukala, gago malagizo ga Shariya ga mwao myoyoni. Na chisha, gago gao agaazago nago, ganaonyesa malagizo ga Shariya ga mwao myoyoni. Maana, ukati unjine anadzamba enye, “Gaga godzigahenda, bee ni mai,” na ukati unjine anadzamba, “Hudzihenda ga jeri.” 16Maneno gaga gosi gandahendeka yo tsʼiku ya ulamuli wa Mulungu. Mulungu wamwika Jeso Kʼirisito alamule maneno garigo myoyoni mwa atʼu tsʼiku yiyo, na gago ndigo nigasumurirago kwenye yo Nguma Mbidzo.

17Mwi Ayahudi, mwimwi enye munadzamba mu Ayahudi, mukuluphira Shariya ya Musa, na muna ngulu kwa mu atʼu otsagulwa ni Mulungu. 18Mwimwi munagamanya gago muhenzwago ni Mulungu muhende, na Shariya yinamufunza vivyo muhenzwavyo kutsagula ga haki. 19Mwimwi enye munagomba kumala kukala, mu aonyesi a njira a atʼu otsʼiona, mu mwanga kwa atʼu ario dzizani, 20munadzona munaidima kwambira njira za Mulungu atʼu ario kʼaazimanya, na kwafunza atʼu ario anga dza anache. Mwimwi kwahivira muna Shariya, munadzona munamanya chila chitʼu, na renu rondagomba, munaramba ni ra jeri kamare. 21Ndo maswali gangu ni: heka mwi munaafunza atʼu anjine, ela mwi enye kʼamudzibaza? Heka munaasumurira atʼu kukala atsʼiiye, ela mwi enye munaiya? 22Heka munaamba atʼu atsʼizinge, ela chidzako mwi enye munazinga? Heka mudziamena o atʼu avoyao milungu ya vinyago, na chidzako mwendaiya mumo madzumba gavoywago milungu ya vinyago? 23Mwimwi muna ngulu kwa Mulungu wamupʼa Shariya, ela heka munamutiya waibu yiye Mulungu, kwa kuyivunza yo Shariyaye? 24#Isa 52:5Bee, gago ganagwa sawa na gago Maandiko gaambago, “Dzina ra Mulungu rinahakanwa ni atʼu a makabila manjine kwa mwimwi!”

25Kukala mutʼu abitwʼayetsʼi, kuna tende tu, chikala undatuwa malagizo ga Mulungu. Ela utsʼiphohenda vivyo, bee undakala kʼwachirire na rorosi o atʼu otsʼibitwʼatsʼi, ario ni atʼu a makabila manjine. 26Atʼu a makabila manjine achituwa malagizo ga Mulungu, hakika Mulungu undaapʼa haki yosi, na ishima yokala upanga kwapʼa Ayahudi! 27Na phapho mwanzo, ao atʼu a makabila manjine otsʼibitwʼatsʼi, andakala adzimuchira na manji muno mwimwi Ayahudi mubitwʼaotsʼi, na munayimanya muno yenye yo Shariya ya Mulungu, ela kʼamuyituwa. 28Anjine anaoneka ni Ayahudi, ela tsʼi Ayahudi enye. Kubitwʼatsʼi tsʼiko kumuhendako mutʼu akale Muyahudi mwenye. 29#Kʼumb 30:6Ndo Muyahudi mwenye, ni yuyatʼu ariye ni mutʼu wa Mulungu hata ko kwakwe ndani. Na gago gahendwa ni Roho wa Mulungu, ela Shariya yohendaandikwa, kʼayigaidima. Ndo mutʼu wa vivyo unalikwa ni Mulungu, hata atsʼipholikwa ni atʼu.

Currently Selected:

Arumi 2: CHIDUR

Highlight

Copy

Compare