Kanta han mga Kanta 6
6
An Kababayen-an
1O labi kamatahom han kababayen-an,
diin pakadto an imo higugmaon?
Sumati kami han dalan nga iya gin-agian,
basi kabuligan ka hin pamiling ha iya.
An Babaye
2Kinmadto ha iya tanaman an akon higugmaon,
diin naturok didto an mga kahoy nga balsamo.
Nagpasibsib hiya han iya panon didto ha tanaman,
ngan nanguha hiya hin mga liryo.
3Akon hiya, an akon higugmaon, ngan iya man ako;
nagpasibsib hiya han iya panon dida han mga liryo.
An Ikalima nga Kanta
An Lalake
4Sugad ka han Jerusalem kamahusay, akon hinigugma,
sugad ka kamatahom han syudad han Tirsa,
sugad ka kamakaaramdok hini nga dagko nga mga syudad.#6:4 Ha Hebreo may dugang dinhe nga duha nga mga pulong nga diri klaro an kahulogan.
5Ilingiw ha akon an imo mga mata;
kay nabibihag ako hini.
Nagsasayaw an imo buhok sugad hin panon hin kakandingan,
nga nagkakalugsong ha kapungtoran han Galaad.
6Sugad kamagbusag an imo mga ngipon hin panon hin kakarnerohan,
nga bag-o pala nga ginkurigosan.
Waray gud hini may naiban;
padispadis gud ini ngatanan.
7Nasilaw an imo mga bayhon ha luyo han imo masilag nga bilo.
8Makakaangkon an hadi hin 60 nga mga rayna,
hin 80 nga mga aruasawa,
ngan diri maihap nga kadaragan-an!
9Kundi usa gudla an akon hinigugma,
ngan sugad hiya hin sarapati kamahusay.
Usa gudla hiya nga anak nga babaye han iya nanay,
an pinauna nga bata han iroy niya.
Natan-aw ngan nadayaw ha iya an ngatanan nga kababayen-an.
Nagkakanta an mga rayna ngan mga aruasawa han ira mga pagdayaw ha iya.
10Hin-o ba ini kanay paniplat sugad hin kaagahon?
Maanyag sugad han bulan ngan mapawa sugad han adlaw?#6:10 sugad…han adlaw; diri klaro ha Hebreo.
11Linmugsong ako tikang han mga almendras
hin pagkita han linghod nga mga tanom ha kahamub-an,
hin pagkita han lapyo nga mga dahon ha mga ubas
ngan han mga biyuos nga bukad han mga kahoy nga granada.
12Nangungurog ako; gindasig mo ako hin paghigugma
sugad han kutsero han karuwahe tipakadto ha pag-awayan.#6:12 Diri klaro ha Hebreo an bersikulo 12.
An Kababayen-an
13Sayaw, sayaw,#6:13 Sayaw, sayaw; o Balik, balik. daragita han Sulam.
Pakitaa kami han imo pagsayaw.
An Babaye
Kay ano nga karuyag niyo kumita ha akon samtang nasayaw ako ha butnga hin mga rumbay hin mga magkirita?
Currently Selected:
Kanta han mga Kanta 6: MBBSAM
Highlight
Copy
Compare
Share
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984
