Sirac 17
17
1Niyan ginhimo han Ginoo in mga tawo tikang han tapotapo.
Ngan ginpabalik liwat hin katapotapo an kada usa ha ira.
2Gin-igoan la niya hira hin panahon hin pag-ukoy,
kundi gintagan niya hira hin gahom pagdumara han ngatanan ha tuna.
3Ginhimo niya hira nga maladawon sugad ha iya
ngan gintagan niya hira han iya#17:3 Hirohirani nga pulong, iya; Griego, ira. kalugaringon nga kusog.
4Ginbuot niya nga an ngatanan nga iba nga mga binuhat mahadlok ha ira;
gintagan niya hira hin gahom hin pagdumara,
han ngatanan nga mga mananap ug katamsihan.#17:4 May pipira nga mga sinurat nga nagdudugang hin bersikulo 5: An Ginoo naghatag liwat ha ira han lima nga mga pag-abat, kundi iya liwat ginhatag ha ira in ikaunom—pagkamaaram, ngan in ikapito—pangatadongan nga nahatag ha ira hin kaaram hin pagsaysay han naabot ha ira pinaagi han mga pag-abat.
6Gintagan niya hira hin mga dila, mga mata,
mga durunggan, mga hunahuna ngan mga konsyensya.
7Ginpuno niya hira hin hibaro ngan pagsabot
ngan ginpakita ha ira an kalainan han maupay ngan maraot.
8Gintagan niya hira han iya kalugaringon nga pagsabot
ha pagpakita ha ira han pakaharangdon han iya mga binuhat.#17:8 May pipira nga mga sinurat nga nagdudugang hin bersikulo 9: ngan iya tinugotan hira hin pagparayaw ha kadayonan han iya makatitingala nga mga binuhatan.
10Pagdadayawon nira an iya baraan nga ngaran
ngan igpapasangyaw an kagamhanan han ngatanan nga iya mga buhat.
11Iginhatag niya ha ira an hibaro
ngan gintagan hira hin Balaod nga burabod hin kinabuhi.
12Naghimo hiya ha ira hin dayon nga ginsaaran
ngan iginpadayag ha ira an iya mga sugo.
13Hinkit-an nira an kamaanyag han iya pagkaharangdon,
ngan hinbatian nira an himaya han iya tingog.
14Ginpahimatngon niya hira supak han diri pagkamatadong
ngan gintutdoan an kada tawo kon uunanhon niya pagdumara han iba.
An Dyos Amo an Maghurukom
15Dayuday nakita an Ginoo han ginbubuhat han mga tawo; waray paagi nga makakatago ka ha iya.#17:15 May mga sinurat nga nagdudugang han mga bersikulo 16-17a: Tikang pa han pagkabata maruruyagon na hira han pagbuhat hin maraot; pareho hin bato an ira kasingkasing, ngan daw diri nira mahihimo ini nga magin makanan tawo. 17 Ginbahinbahin niya an kanasoran han bug-os nga tuna. 17Gintagan niya an tagsa nga nasod han iya kalugaringon nga punoan, kundi an Israel amo an kalugaringon nga malon han Ginoo.#17:17 May mga sinurat nga nagdudugang hin bersikulo 18: An Israel amo an iya suhag nga iya gindidisiplina samtang nga iya ginpapadako. Iya hinahatagan hiya han kamapaso han iya paghigugma ngan diri gud niya pinapabay-an. 19Dayuday ginbabantayan han Ginoo an ginbubuhat han mga tawo; para ha iya sugad han kapawa han adlaw an ngatanan nga ira ginbubuhat. 20Waray mga sala nira nga natatago ha iya; hinkikit-an niya an ngatanan nga ira mga sala.#17:20 May mga sinurat nga nagdudugang hin bersikulo 21: Kundi maloloy-on an Ginoo ngan kinikilala niya an iya mga binuhat, sanglit pinapasaylo niya hira ngan diri hira binabayaan. 22Kon nahatag kita ngadto han mga kablas, gin-iisip ini han Ginoo nga birilhon sugad ka mahal hin mapulsanon nga singsing. Minahal niya an kamaloloy-on han tawo sugad han kinabuhi ngahaw. 23Maabot an adlaw nga paghuhukman niya an mga magraot ngan kakastigohon hira. Kakarawton nira an angay para ha ira. 24Kundi tutugotan han Ginoo adton mga nagbabasol nga makabalik ngada ha iya. Dayuday gintatagan niya hin kadasig adton mga nawawad-an hin paglaom.
Nagtawag hin Pagbasol
25Dangop han Ginoo ngan bayai an imo sala. Pag-ampo hin kinasingkasing nga buligan ka niya basi makag-ukoy ka hin mauruupay nga kinabuhi. 26Balik na ngadto han Gihahataasi ngan bayai an imo sala. Pagdumti an ngatanan nga iya dinidirian. 27Makakahimo hin pagpasalamat han Ginoo adton mga buhi pa, kundi nakakagkanta ba hin pagdayaw han Gihahataasi an aadto na ha tuna han mga patay? 28An tawo la nga buhi ngan maupay an panlawas an makakagkanta hin mga pagdayaw han Ginoo, kundi diri na makakagpasalamat ha iya an mga minatay nga waray na dinhe ha aton. 29Hin pagkadako han maloloy-on nga pagpasaylo han Ginoo hadton mga nabalik ha iya! 30Kundi diri ini amo an kinaiya han mga tawo;#17:30 Kundi…mga tawo; o Diri makakaangkon an mga tawo han ngatanan nga mga butang. waray usa ha aton nga waray kamatayon. 31Waray mapurupawa pa kay han adlaw kundi nagsisirom an kapawa han adlaw kon may-ada bakunawa. Hin pagkamasayon han hunahuna han tawo katahoban han maraot! 32Makakahimo an Ginoo hin pagtan-aw han ngatanan nga mga bitoon ha langit. Kundi an mga tawo, ano man? Tapotapo ngan mga agbon la hira.
Currently Selected:
Sirac 17: MBBSAM
Highlight
Copy
Compare
Share
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984