Mga Salmo 36
36
An Pagkamaraot han Tawo#HEBREO NGA ULOHAN: Kan David, nga surugoon han Ginoo.
1An sala nagyayakan ngadto han maraot nga tawo
ha kahiladman han iya kasingkasing;
sinisikway niya an Dyos ngan waray niya pagtahod ha iya.
2Tungod nga hitaas an iya paghunahuna han iya kalugaringon,
naghuhunahuna hiya nga diri an Dyos mahibabaro han iya sala ngan paghuhukman ini.
3Maraot gud an iya pamulong
ngan puno hin limbong
diri na gud hiya nagbubuhat han matadong ngan maupay.
4Naglalarang hiya hin magraot
nga mga larang samtang nahigda hiya;
waray gud maupay nga iya ginbubuhat,
ngan diri gud niya isinisikway an bisan ano nga maraot.
An Pagkamaupay han Dyos
5 Ginoo, an imo dayuday nga paghigugma naabot ngadto ha kalangitan,
an imo kamatinumanon ngadto ha panganuron.
6An imo pagkamatadong nananawantawan sugad han kabukiran;
an imo paghukom sugad han mga kahiladman han dagat.
Mga tawo ug kamanampan aada han imo pagmangno.
7Hin pagkamahal, O Dyos,
han imo dayuday nga paghigugma!
Hin-aagian namon#36:7 pagkamahal…Hin-aagian namon; o pagkamahal han imo dayuday nga paghigugma! Namimiling an kadiyosan ug mga tawo. in panalipod ha ilarom han lambong han imo mga pako.
8Nagpapatakas kami han pagkaon nga imo gin-aandam;
ginpapainom mo kami tikang han salog han imo pagkamaupay.
9Ikaw an surok han ngatanan nga kinabuhi,
ngan tungod han imo kapawa kinikita namon an kapawa.
10Padayon hin paghigugma
hadton mga nakilala ha imo
ngan pagbuhat hin maupay ngadto hadton mga magtadong.
11Ayaw tugoti an mga magpahitas-on hin pagsulong ha akon
o palayason ako han mga magraot.
12Kitaa, kon diin kapukan an mga magburuhat hin maraot.
Nahigda hira didto, diri na makakabangon.
Currently Selected:
Mga Salmo 36: MBBSAM
Highlight
Copy
Compare
Share
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984
