Mga Salmo 110
110
Gindasig han Ginoo an Iya Pinili nga Hadi#HEBREO NGA ULOHAN: Salmo ni David.
1Siring han Ginoo ha akon ginoo,
“Didi ikaw lingkod hini'n akon tuo,
tubtob hira adton mga kaaway mo himoon ko nga turumbanan gud nimo.”
2Larang han Ginoo, ha Sion matikang an im' hadianon nga pagkagamhanan.
Nasiring gud hiya, “Imo paghadian
adton imo mga kaaway ngatanan.”
3Mabulontad pag-away an im' katawhan ha adlaw umasdang ka ha pag-awayan;
daw tun-og makadto im' kalalaken-an ha imo ha baraan nga kabukiran.#110:3 Diri klaro ha Hebreo an bersikulo 3.
4Iginsumpa ini ha aton Ginoo,
ngan diri gud niya babakwion ito:
“Magpapadayon gud an pagkapadi mo,
kan Melquisedec padianon nga hugpo.”#110:4 Kan Melquisedec…hugpo; o Sugad ka Melquisedec; o dida han tulin ni Melquisedec.
5Sapit gudla dida hiton imo tuo
aada dayuday hiya nga Ginoo,
hiya an magpupukan han kahadian
ha adlaw nga may-ada niya napupungtan.
6Adton mga nasod iya paghuhukman,
lulub-on hin patay adton pag-awayan;
iya pipirdehon adton kahadian
ha bug-os han hiluag nga katunaan.
7Tikang hadton sapa ha ligid han dalan,
aadto an kanan hadi pag-iimnan;
in bag-o nga kusog iya maaangkon,
matindog na hiya nga madinaogon.
Currently Selected:
Mga Salmo 110: MBBSAM
Highlight
Copy
Compare
Share
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984
