Oseas 13
13
May Kataposan nga Paghukom han Israel
1Hadto anay kon naghihimangraw an tribo han Efraim, nahahadlok kaupay an iba nga mga tribo han Israel; tinahod nira an Efraim. Kundi nakasala an mga tawo pinaagi hin pagsingba kan Baal ngan tungod hini mamamatay hira. 2Aada pa hira hin pakasala pinaagi hin paghimo hin metal nga mga ladawan nga pagsisingbahon—mga diyosdiyos nga salapi nga gindibuho pinaagi hin mga hunahuna hin tawo ngan ginhimo pinaagi hin mga kamot hin tawo. Ngan niyan nasiring hira, “Paghalari niyo ini hin mga halad nga tinubod!” Uunanhon hin mga tawo pagharok hito nga mga diyosdiyos—mga diyosdiyos nga hitsura hin mga baka nga todo!#13:2 Ngan niyan…mga baka nga todo; diri klaro ha Hebreo. 3Sanglit mawawara ini nga mga tawo sugad hin burong ha kaagahon, sugad hin tun-og nga napapara ha pagsidlit han adlaw. Sugad hira hin uhot nga iginpapalid tikang han giriokan, sugad hin aso tikang han guruwaan hin aso.
4Nasiring an Ginoo, “Amo ako an Ginoo nga iyo Dyos, nga nagpagawas ha iyo tikang ha Ehipto. Waray kamo iba nga Dyos labot ha akon. Ako la an iyo magtaralwas. 5Ginmangnoan ko kamo didto hin mamara nga kamingawan. 6Kundi han pagsulod na niyo han tuna nga hura hin pagkaon, nabusog ngan tinmunga kamo, ngan katapos nagmapahitas-on kamo ngan hinngalimtan ako niyo. 7Sanglit susulongon ko kamo sugad hin liyon. Sugad hin leyopardo gagamaan ko kamo ha iyo dalan. 8Dadasmagan ko kamo sugad hin aso nga nawad-an han iya mga nati, ngan pagpipikaspikason ko an iyo lawas. Sugad hin liyon lalamonon ko kamo dida dayon, ngan sugad hin mapintas nga mananap paghuhunothunoton ko kamo.
9“Pupukanon ko kamo, mga tawo han Israel! Niyan hin-o man an makakabulig ha iyo?#13:9 Ha usa nga kadaan nga hubad, hin-o man an makakabulag ha iyo? ha Hebreo, aadi ha akon an iyo tambulig. 10Nangaro kamo hin hadi ngan hin mga pangulo, kundi uunanhon nira hin pakatalwas han nasod?#13:10 Diri klaro ha Hebreo an bersikulo 10. 11Ha akon kasina tinagan ko kamo hin kahadian, ngan ha akon kapungot kinuha ko hira.
12“Nahisurat an sala ug pagtalapas han Israel ngan ginhimos hin maupay an mga sinurat. 13May higayon nga mabuhi an Israel, kundi lurong hin duro hira hin pagpahimulos hini—sugad hin bata nga tikatarawo nga nadiri paggawas ha tiyan! 14Diri ko tatalwason ini nga mga tawo tikang han kalibutan han mga patay o babawion hira tikang han gahom han kamatayon. Hala kamatayon, dad-a na#13:14 Ha pira nga kadaan nga mga hubad, dad-a na; ha Hebreo, magigin ako. an imo mga peste! Hala, kalibutan han mga patay, dad-a na#13:14 Ha pira nga kadaan nga mga hubad, dad-a na; ha Hebreo, magigin ako. an imo pagkabungkag! Diri na gud ako malolooy hini nga mga tawo. 15Bisan maglangbo an Israel sugad hin kabanwaan, magpapadara ako hin mapaso nga hangin nga timog tikang ha kamingawan, ngan magmamara an ira mga burabod ngan mga atabay. Kukuhaon hini an ngatanan nga mga mapulsanon nga butang. 16Kinahanglan kastigohon an Samaria kay sinmupil hiya ha akon. Magkamatay unta ha pag-awayan an iya mga tawo; ipupusdak ha tuna an mga minasus-an ngan bubon-on an tiyan han mga burod nga kababayen-an.”
Currently Selected:
Oseas 13: MBBSAM
Highlight
Copy
Compare
Share
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984
