Genesis 6
6
Nagbuhat hin Maraot gud an Tawo
1Hadto nga panahon nagdamo na an mga tawo ha bug-os nga kalibutan, ngan may-ada nira mga anak nga kababayen-an. 2Hinkit-an hin pira nga mga langitnon nga binuhat#6:2 labaw hin…binuhat; o mga anak hin kadiyosan; o mga anak han Dyos. nga maghusay ini nga kababayen-an, sanglit pinangasawa nira an ira naruyagan. 3Niyan nagsiring an Ginoo, “Diri ako matugot nga mabuhi hin kadayonan an mga tawo kay may-ada nira kamatayon. Tikang yana diri na hira mabubuhi kapin hin 120 ka tuig.” 4Hadto nga mga adlaw, ngan bisan ha orhe na, may-ada mga higante dinhe ha tuna, nga mga tulin hin kababayen-an nga sugad ha aton ngan hin mga langitnon nga mga binuhat. Amo hira an mga gamhanan ngan bantogan nga kalalaken-an hadto nga kadaan nga panahon.
5Han pakasabot han Ginoo nga uraura na hin kamagraot an ngatanan nga mga tawo ha tuna, ngan dayuday mangil-ad an ira mga panhunahuna, 6nagbasol hiya nga iya ginhimo hira ngan iginbutang hira dinhe han tuna. Dako gud an iya pagbasol, 7sanglit nakasiring hiya, “Pagpupuohon ko ini nga mga tawo nga akon gintuha, pati an kamanampan, ngan an katamsihan, kay nagbabasol ako nga ginhimo ko hira.” 8Kundi hi Noe nakalipay han Ginoo.
Ginsugo han Dyos hi Noe
9-10Amo ini an susumaton mahitungod kan Noe. May-ada hiya tulo nga mga anak nga kalalaken-an: hira Sem, Ham, ug Jafet. Matadong nga tawo hi Noe ha atubangan han Dyos ngan maupay gud nga tawo hadto nga panahon. Nag-ukoy hiya hin kinabuhi nga nakalipay han Dyos, 11kundi magraot gud an ngatanan nga iba nga mga tawo ha atubangan han Dyos, ngan nakaluob na an ira kamaraot ha ngatanan nga dapit. 12Kinmita an Dyos han kalibutan ngan hinsabotan niya nga maraot gud ini, kay diri na matadong an kinabuhi han ngatanan nga mga tawo.
13Nagsiring an Dyos kan Noe, “Karuyag ko na gud pagpuo han ngatanan nga mga tawo. Pagpupuohon ko hira, kay puno na an kalibutan han ira magraot nga mga binuhatan. 14Paghimo hin arka para ha imo ngahaw tikang hin pinili nga kahoy; himoi ini hin mga kwarto, ngan buliha ini hin alkitran ha sulod ngan ha gawas. 15Himoa ini nga 133 ka metros an kahilaba, 22 ka metros an kahiluag, ngan 13 ka metros an kahitaas. 16Himoi hin atop#6:16 atop; o bintana. an arka, ngan lat-angi hin 44 ka sentimetros tikang han atop ngada han mga ligid han arka. Himoa ini nga tulo ka andana, ngan butangi hin porta dida han kagiliran hini. 17Magpapadara ako hin lunop dinhe han tuna basi mapuo an ngatanan nga buhi nga mga binuhat. Magkakamatay an ngatanan dinhe ha tuna, 18kundi maghihimo ako ha imo hin ginsabotan. Sulod ikaw ngadto han arka upod an imo asawa, an imo mga anak nga kalalaken-an, ngan an ira kaasaw-an. 19-20Pagdara upod ha imo ngadto han arka hin lalaki ngan hin babayi han ngatanan nga magkalainlain nga mga mananap, ngan han ngatanan nga magkalainlain nga tamsi, basi diri hira mapuo. 21Pagdara han ngatanan nga magkalainlain nga pagkaon para ha imo ngan para ha ira.” 22Ginbuhat ni Noe an ngatanan nga iginsugo han Dyos.
Currently Selected:
Genesis 6: MBBSAM
Highlight
Share
Copy
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984