Genesis 38

Ginpaangkan ni Juda hi Tamar

1Hito nga panahon binayaan ni Juda an iya kabugtoan ngan linmungon kan Hira nga taga bungto han Adullam. 2Didto iginkita hi Juda hin usa nga babaye nga Canaanhon kanay amay ginngaranan nga Sua. Pinangasawa niya an babaye 3ngan nag-anak hira hin usa nga lalake nga ginngaranan niya nga Er. 4Nagburod liwat an babaye ngan nag-anak hin usa pa nga lalake ngan ginngaranan niya nga Onan. 5Nag-anak na liwat hiya hin usa nga lalake ngan ginngaranan niya nga Sela. Nakadto hi Juda ha Aczib han katawo han bata.

6Para kan Er nga iya suhag nga lalake kinmuha hi Juda hin usa nga asawa kanay ngaran amo hi Tamar. 7Maraot an ginawian ni Er ngan nakapabido ini han Ginoo, sanglit ginpatay hiya han Ginoo. 8Niyan nagsiring hi Juda kan Onan nga bugto ni Er, “Kadto na ngan pakighilawas han balo nga asawa han imo bugto. Tumana ha iya an imo katungdanan sugad nga bugto han iya bana, basi magkamay-ada mga tulin an imo bugto.” 9Kundi maaram hi Onan nga diri magigin iya an mga anak, sanglit han pakighilawas niya han balo nga asawa han iya bugto, ginkaragan niya an similya ngadto ha tuna, basi mawaray mga anak para han iya bugto. 10Nakapabido han Ginoo an iya ginbuhat, ngan ginpatay liwat hiya han Ginoo. 11Niyan nagsiring hi Juda kan Tamar nga iya umagad nga babaye, “Balik la anay ngadto han balay han imo amay ngan pagpabilin nga balo ngada han pagdako ni Sela nga akon anak.” Ginsiring niya ini kay nahadlok hiya nga pagpatayon liwat hi Sela sugad han iya kabugtoan. Sanglit inmoli nala hi Tamar.

12Waray pag-iha namatay an asawa ni Juda. Han katapos na han panahon han iya pagmabidoon, kinmadto hiya ha Timna diin gin-aarotan an iya mga karnero upod hi Hira nga taga-Adullam nga iya sangkay. 13May nagsumat kan Tamar nga tikadto ha Timna an iya ugangan nga lalake hin pag-arot han iya mga karnero. 14Sanglit ginliwanan niya an iya mga panapton hin balo, gintahoban hin panyo an iya bayhon, ngan linmingkod hiya dida han aragian ngadto ha Enaim nga usa nga bungto nga inaagian tipakadto ha Timna. Sugad han hinbaroan ni Tamar, olitawo na hi Sela nga puto nga lalake ni Juda, kundi waray hiya papangasaw-a ha iya.

15Han paghikit-i ni Juda kan Tamar, nakahunahuna hiya nga usa hiya nga mahugaw nga babaye, kay tinahoban man an iya bayhon. 16Dinmaop ha iya hi Juda dida han ligid han dalan ngan nagsiring, “Sigi, ano man nga bayad an imo karuyag?” (Waray hiya kalibutan nga amo hiya an iya umagad nga babaye.)

Nagsiring an babaye, “Ano man an imo ighahatag ha akon?”

17Binmaton hiya, “Padadad-an ko ikaw hin usa nga nati nga kanding tikang han akon panon.”

Nagsiring hiya, “Sigi, kon tatagan mo ako hin garantiya ngada han pagpadara mo han kanding.”

18“Ano man an akon ighahatag ha imo nga garantiya?” nagpakiana hiya.

Binmaton an babaye, “An imo singsing, an imo kwentas, ngan an tungkod nga imo gindadara.” Iya ini iginhatag ha iya. Niyan nakighilawas hiya ha iya ngan nagburod an babaye. 19Inmoli hi Tamar, ginhukas an iya panyo, ngan iginbalik niya hin pagsul-ot an iya mga panapton hin balo.

20Ginpakadto ni Juda hi Hira nga iya sangkay hin pagdara han kanding ngan paglukat han garantiya tikang han babaye, kundi waray hi Tira pakaagi han babaye. 21Ginpakianhan niya in pira nga mga tawo didto ha Enaim, “Hain na an maraot nga babaye nga nakanhi ha ligid han dalan?”

Binmaton hira, “Waray man maraot nga babaye dinhe tikang ha tinikangan.”

22Binmalik hiya ngadto kan Juda ngan nagsiring, “Waray ako makaagi han babaye. Nagsiring an mga tawo didto nga waray man maraot nga babaye didto tikang ha tinikangan.”

23Nagsiring hi Juda, “Patipigi nala ha iya adto nga mga butang. Diri ta karuyag nga pagtinawaan kita han mga tawo. Nagtalinguha gud ako hin pagbayad ha iya, kundi waray ka man pakaagi ha iya.”

24Paglabay hin mga tulo ka bulan, may nagsiring kan Juda, “Nanggawi hi Tamar nga imo umagad nga babaye sugad hin usa nga maraot nga babaye, ngan yana burod na hiya.”

Nagsugo hi Juda, “Dad-a hiya ha gawas ngan sunoga hiya.”

25Han iginagawas na hiya, nagpatugon hiya ngadto han iya ugangan nga lalake: “An nakaburod ha akon amo an tawo nga tag-iya hini nga mga butang. Tan-awa daw ini ngan kitaa kon kan kanay gud ini nga singsing, kwentas, ngan ini nga tungkod.”

26Kinilala ni Juda ini nga mga butang ngan nagsiring, “May katadongan hiya. Waray ako pagtuman han akon katungdanan ha iya—kinahanglan unta nga akon hiya iginpaasawa kan Sela nga akon anak.” Ngan waray na gud makighilawas ha iya hi Juda.

27Han pag-abot na han panahon ha iya pag-anak, hinbaroan nga karuha an iya ig-aanak. 28Han nagbabati na hiya, iginawas in usa nga kamot han usa han karuha; kinaptan ini han partira, ginhigtan hin pula nga inulang, ngan nagsiring, “Amo ini an syahan matawo.” 29Kundi ginbutong liwat han bata hin pagbalik an iya kamot, ngan nahiuna hin katawo an iya bugto. Niyan nagsiring an partira, “O, nagpasig-una ka gud hin paggisi han imo gagawas!” Sanglit ginngaranan hiya nga Perez.#38:29 PEREZ: Nangangahulogan “naggisi” ini nga ngaran nga Hebreo. 30Niyan natawo an iya bugto nga may pula nga inulang ha iya kamot, ngan ginngaranan hiya nga Sera.

Currently Selected:

Genesis 38: MBBSAM

Highlight

Copy