Bel ug an Dragon 1
1
Hindakpan ni Daniel an Tinunto nga mga Buhat han Kapadian ni Bel
1Han kamatay ni Hadi Astyages, hi Hadi Ciro han Persia amo an nagdumara han ginhadian ni Astyages. 2Usa hi Daniel hin gisusuoki nga mga kaupod-upod ni Hadi Ciro, ngan pinalabi han hadi hi Daniel kay han bisan hin-o han iya mga magsaragdon.
3May-ada an mga taga-Babilonia usa nga diyosdiyos nga ginngaranan nga Bel. Kada adlaw naghatag kan Bel an mga tawo hin usa nga halad nga 12 ka sako nga pino nga harina, 40 nga mga karnero, ngan 50 ka galon nga bino. 4Nagtoo hi Hadi Ciro nga usa nga diyos hi Bel, ngan kada adlaw nagsingba hiya kan Bel. Kundi nagsingba hi Daniel han kalugaringon niya nga Dyos.
5Usa ka adlaw nagpakiana kan Daniel an hadi, “Kay ano nga diri ka nagsisingba kan Bel?”
Binmaton hi Daniel, “Diri ako nagsisingba hin mga diyosdiyos nga hinimo la hin mga kamot hin tawo. Ginsisingba ko la an buhi nga Dyos nga naghimo han langit ug tuna ngan amo an Ginoo han ngatanan nga mga tawo.”
6“Ngan diri ka ba natuod nga buhi hi Bel nga amon diyos?” nagpakiana an hadi. “Waray ka pa ba makakita han kadamo han kinakaon ngan iniinom niya kada adlaw?”
7Nakatawa hi Daniel ngan nagsiring, “Ayaw pagpaawat, Harangdon nga Hadi. Ini nga diyos nga iyo gintatawag nga Bel, usa la ini nga tuna nga pinutos hin bronse; waray pa ini kumaon o uminom hin bisan ano.”
8-10Dida hini nasina an hadi ngan iginpatawag an ngatanan nga 70 nga kapadian ni Bel. Iya ginsiring hira, “Nagpapahimatngon ako ha iyo, pamamatayon ta kamo, gawas kon makapakita kamo ha akon nga hi Bel an nakaon hini nga iginhahalad. Kon makagpamatuod kamo ha akon nga hi Bel an nakaon hini, igpapapatay ko hi Daniel nga nasiring nga diri hi Bel usa nga diyos.”
Inmuyon hi Daniel hini nga larang.
11Niyan inmupod han hadi hira ngatanan ngadto han templo ni Bel, diin nagsiring an kapadian han hadi, “Harangdon nga Hadi, magkakagawas kami ngan ikaw an pag-andam ngan pagbutang han pagkaon ngan han bino dida ha lamesa. Ha imo pagbaya trangkahi an sada han porta ngan timbrehi ini han hadianon nga silyo. 12Ha aton pagbalik ha pagkaaga, kon imo hikit-an nga waray kaona ni Bel an ngatanan nga pagkaon igpapatay kami. Kundi kon kaonon ini niya, kinahanglan patayon hi Daniel tungod han iya paghimo hin buwa nga mga sumbong kontra ha amon.”
13Kundi waray mabaraka an kapadian, kay naghimo hira hin tago nga agian ha sirong hin usa nga lamesa didto ha sakob han templo, sanglit nakakasulod hira kada gab-i ngan kinakaon nira an mga halad.
14Han pagkalakat na han kapadian, iginpahimutang han hadi an pagkaon para kan Bel. Niyan ginsugo ni Daniel an iya mga surugoon hin pagdara hin mga agbon ngan pagpasarang hini ha bug-os nga salog han templo. Waray nakakita ha ira nga nagbuhat hini labot han hadi. Katapos, nagkagawas hira ngatanan. Gintrangkahan an sada han porta, gintimbrehan han hadianon nga silyo, ngan nagkalakat hira.
15Hito nga gab-i, sugad han hin-araan na, sinmulod han templo pinaagi han tago nga agian an kapadian upod an ira kaasaw-an ngan mga anak ngan pinangaon an ngatanan nga pagkaon ngan pinanginom an ngatanan nga bino.
16Temprano pa han pagkaaga kinmadto han templo hi Daniel ngan han hadi. 17Nagpakiana an hadi, “Ginruba ba an mga silyo, Daniel?”
“Waray, Harangdon nga Hadi, waray ini pagrubaa,” an baton ni Daniel.
18Han pagbuksi la han porta, hinkit-an han hadi nga waray na an pagkaon ha lamesa ngan ginmoliat hiya, “Hin pagkadako nimo, O Bel! Tinuod gud nga usa ka nga diyos.”
19Kundi nakatawa la hi Daniel ngan iya ginsiring an hadi, “San-o ka sumulod han templo, siplati anay an salog ngan pagsumati ako kon kanay mga lutop hin mga tiil an imo hinkit-an didto.”
20“Hinkit-an ko in mga lutop hin mga tiil hin kalalaken-an, kababayen-an, ngan kabataan,” nagsiring an hadi, 21ngan nasina hiya hin duro nga iya iginpadakop ngan ginpakadto ha iya an kapadian ngan an ira mga panimalay. Ira igintutdo ha iya an tago nga mga agian nga ira sinusudlan ha kada gab-i hin pagkaon nga iginpahimutang dida han lamesa. 22Sanglit iginpapatay han hadi an kapadian, ngan iya iginhatag hi Bel ngadto kan Daniel ngan gindugmok ni Daniel an diyosdiyos nga Bel ngan ginruba nira an templo ni Bel.
Ginpatay ni Daniel an Dragon
23May-ada liwat usa nga higante nga dragon nga ginsingba han mga taga-Babilonia. 24Usa ka adlaw nagsiring kan Daniel an hadi, “Diri ka makakasiring nga diri buhi ini nga dragon. Sanglit pagsingba ha iya!”
25Binmaton hi Daniel, “Nagsisingba ako han Ginoo. Hiya amo la an buhi nga Dyos. 26Ngan kon matugot ka, Harangdon nga Hadi, papatayon ko ini nga iyo dragon nga diri ko gagamiton hin espada o hin balbag.”
“Tinutugotan ko ikaw,” binmaton an hadi.
27Sanglit kinmuha hi Daniel hin alkitran, tambok, ngan mga buhok ngan ginsaralakot ini ngan iya ini ginpakaladkad. Ginhimo niya ini nga bibingka ngan igintubong han dragon. Han pagkaona hini han dragon, binmutol an tiyan ngan naburit. Nagsiring hi Daniel, “Amo ito nga butang nga ginsisingba niyo nga mga taga-Babilonia.”
28Han pakabati han mga tawo han Babilonia han nahinabo, nagtukod hira hin usa nga makapupungot nga kasamokan kontra han hadi. Naggogliat hira, “Nahimo na nga usa nga Judiyo an hadi! Syahan iya gindugmok hi Bel ngan pinanmatay niya an kapadian hini, ngan yana iya liwat ginpatay an aton dragon.” 29Kinmadto hira han hadi, ngan ginkinahanglan nira nga igtubyan ha ira hi Daniel. Ira gintarhog an hadi hin pagsiring, “Kon diri mo hiya igtubyan ha amon, papatayon ka namon ngan an bug-os mo nga panimalay.”
30Han pakasabot han hadi nga tutumanon gud an ira ginsiring, napirit hiya hin pagtubyan kan Daniel ha ira. 31Iginlabog hi Daniel han mga tawo ngadto hin usa nga luong hin mga liyon, diin ginpabay-an hiya didto sulod hin unom ka adlaw. 32May-ada pito nga mga liyon didto han luong ngan dayuday ini gintutubongan hin duha nga mga tawo ngan duha nga mga karnero kada adlaw. Kundi waray ini pagtubongi sulod hin unom ka adlaw, basi masiguro nga kaonon gud hi Daniel.
Gintalwas hi Daniel tikang han Luong hin mga Liyon
33Hito nga panahon nakadto han tuna han Juda hi Habacuc an manaragna. Nagluto hiya hin linaga ngan ginsaktan ini hin dinugmok nga tinapay. Gindadara niya in usa ka makaong hini nga linuto ngadto han mga tawo nga nag-aani didto han kaumhan, 34ngan naghimangraw ha iya an anghel han Ginoo, “Dad-a an pagkaon nga imo gindadara ngan ighatag ini kan Daniel nga aadto hin usa nga luong hin mga liyon didto ha Babilonia.”
35Binmaton hi Habacuc, “Waray pa ako mahingadto ha Babilonia ngan diri ako maaram kon hain ini nga luong hin mga liyon.”
36Sanglit kinaptan han anghel an buhok han manaragna ngan gindara hiya ngadto ha Babilonia hin kalaksi nga sugad hin hangin.#1:36 ha kalaksi nga sugad hin hangin; o ha gahom han iya espiritu anan nga mga tawo nga nag-ukoy ha ligid han Salog Sud didto ha Babilonia. An ngatanan napakadto hin pamati hini nga ginbabasa—mga dumagko nga pagkatawo, nga anak hin hadianon nga mga panimalay, mga katigurangan, ngani ngatanan nga mga tawo, bisan kon ano an ira mga kahimtang. Iya iginpahimutang hi Habacuc hirani han luong han mga liyon. 37Ginmoliat hi Habacuc, “Daniel! Daniel! Ginpadad-an ka han Dyos hin pagkaon. Karawta ini.”
38Han pakabati ni Daniel kan Habacuc, nag-ampo hiya, “O Dyos, imo ako hinumdoman; diri mo gud ginpapabay-an adton mga nahigugma ha imo.” 39Niyan binmuhat hiya ngan kinmaon, ngan gilayon igin-uli han anghel han Dyos hi Habacuc.
40Pito ka adlaw tikang iglabog hi Daniel ngadto han mga liyon, kinmadto han luong an hadi hin pagmabidoon tungod ha iya. Han pag-abot niya didto ngan pagkita ngadto ha sulod han luong, iya hinkit-an hi Daniel nga nalingkod didto. 41Ginmoliat an hadi, “O Ginoo nga Dyos ni Daniel, hin kagamhanan nimo! Ikaw la an amon Dyos!” 42Sanglit iya ginkuha hi Daniel tikang han luong ngan iya iginpalabog ngadto han luong an mga tawo nga nagtinguha hin pagpatay kan Daniel. Ngan ginkaon hira dayon han mga liyon, samtang nagkikita an hadi.
Currently Selected:
Bel ug an Dragon 1: MBBSAM
Highlight
Share
Copy
Want to have your highlights saved across all your devices? Sign up or sign in
Baraan nga Biblia © Philippine Bible Society, 1984