Kanta nen Solomon 1
1
1Saray sankarakepan a kanta nen Solomon.#1:1 nen Solomon; odino nisaklang ed kinen Solomon, odino nipaakar ed kinen Solomon.
Say Ononan Kanta
Say Bii
2Siak komun so angub-anguban mo na bibil mo;
masamit nen say alak so panangarom.
3Ambalbalingit ka,
singa mansamiong a pabalingit so ngaran mo.
Kanyan amin a marikit aroen da ka.
4Ala mo ak, ta ombatik ita;
sika so arik tan iyakar mo ak ed kuartom.
Manliket itan dua,
penepeneken tay sikaton dili ed panangaro a singa pampera na sakey a too ed alak.
Ag pankelawan ya inaro ka na amin a bibii!
5Bibiid Jerusalem, andeket ak balet#1:5 balet; odino tan. maganggana ak,
andeket ak a singa saray tulda ed Kedar,
balet maganggana ak a singa kurtinad palasio nen Solomon.
6Ag yo ak memelag-melagen lapud kolor na baog ko,
lapud tinektek ak na agew.
Akapasnuk ed siak nen saman iray agagik a lalaki,
kanyan impankimey da ak ed kaubasan.
Anggapoy oras kod saman a nanasikasod laman kon dili.
7Ibagam ed siak, O inarok,
Iner so pampakabkaban mod saray karnirom?
Iner so pampainawaan da no kaagewan?
Akin et anapen ta ka nid saray
karniro da ray arum a pumapastol?
Say Laki
8Ag mo amta no iner a pasen,
O sika a sankagangganaan ed saray bibii?
Laka, ta tombuk moy olup da ray karniro;
mananap kay pankabkaban da ray kanding mo,
diad abay da ray tulda na saray pumapastol.
9O inarok, pagagalien mo ray lalaki
o singa pamapagali na saray kabatyan ed kalakyan ya isisintad saray karwahi na Faraon.
10Agaylay dakep na buek mon manasakbung na lupam;
singa ra alahas a mansaloyloy ed tenger mo.
11Igawaan mi ka na pulsiras a balituk
ya adikoraan na saray pilak.
Say Bii
12Nen mandokdokul so arik ed katri to
samyong na pabalingit koy inmalingernger ed kaliber-liber.
13Ambalbalingit a singa mira so inarok
legan ton akasaral ed pagew ko.
14Say inarok et singa saray balang a rosas
ya ombubuskag ed kaubasan na En-gadi.
Say Laki
15Alay gangganam, O inarok;
inmagayep iray matam!
Say Bii
16Agaylay inkaguapom, O pinablik;
makapalikliket kan tua ed siak!
Saray malambut a dika so dokulan ta;
17saray kiew a sidro so panoksulan na abung ta,
tan tablan sipris so bobida.
Currently Selected:
Kanta nen Solomon 1: MBBPAN83
Highlight
Copy
Compare
Share
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
