Job 26
26
1Inmebat si Job:
2“Agaylay impanulong mod siak,
siak a sakey ya anggapoy lay pakayari,
tan naandian na biskeg!
3Agaylay abig na simbawan inter mod siak,
tan say kakabatan ya inter mod siak anta makulang-kulang ak.
4Siopay abaloan mon ondengel ed amin a salitam?
Siopay angipuyan ed sikan mansalita na singa onya?
[Inmebat si Bildad]#26:4 Ag abitlad sayan tiksto si Bildad, balet naogaliyan a nipabetang ed sikato ra yan salita.
5Mampayegpeg iray ispiritu na saray inaatey a wala rad danum diad silong na dalin.
6Sankanengneng na Dios so pasen a panaayaman da ray inaatey;
anggapoy makasanib ed mata to.
7Impanat na Dios so baybay a tawen,
tan imbitin tod liwang so mundo.
8Sikatoy mamapano na danum ed saray lorem,
tan mamopokpok ed ipelag da anggan ambelat la ra.
9Iyaamut tod sanib na lorem so baleg a bulan.
10Imbiig toy liwawa ed bilonget,
diad panamegley na malimpek a gulis ed tapew na dayat.
11No pampasnukan to ray lusek na tawen,
onggalaw tan onggiwgiw irad takot.
12Lapud pakayari to tinalo to so dayat,#26:12 TINALO TO SO DAYAT: Onung ed sakey ya istoria nen saman say dayat linmaban ed Dios.
lapud karunongan to pinatey toy dragon a Rahab.#26:12 RAHAB: Nengneng yoy 9:13.
13Lapud ingas to pinaliwawa toy tawen,
tan diad lima to pinatey toy ombabatik a dragon.#26:13 OMBABATIK A DRAGON: Nengneng yoy 9:10.
14Melag labat ira yan kabyangan na pakayari to;
esaes labat so nadngel tayo.
Siopay makapikabat no kaonungay kabaleg na pakayariy Dios?
Currently Selected:
Job 26: MBBPAN83
Highlight
Copy
Compare
Share
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
