2 Saray Awaran 27
27
Si Ari Jotam na Juda
(2 Ar. 15:32-38)
1Nagmaliw ya ari si Jotam nen mantaon na duamplo tan lima, tan nanoley ed Jerusalem na labinanem taon. Si Jerusa ya anak nen Zadoc so ina to. 2Ginagawa to ray makapaliket ed Katawan, a singa ginagawa nen ama to; balet ag to inalig si ama to, ta ag nankasalanan diad panamegley na panagpool na insinso#27:2 ag nankasalanan diad panamegley na panagpool na insinso; odino ag to akibabali ed panangigalang. ed Timplo. Balet siansia so pankakasalanan da ray totoo.
3Si Jotam so nanggawa na Puirtad Baybay diad Timplo tan dakel so ginawa ton kimey ed padir na siudad na Jerusalem diad pasen a tatawagey Ofel. 4Diad kapalandeyan na Juda angipaalagey na saray siudad, tan diad katakelan angipaalagey na saray tirinsira tan saray tori. 5Binakal toy ari na Ammon tan saray sondalo to, tinalo to ra, tan pinasoot to ran mambayar na onggendan a buis a tinaon diad loob na taloy taon: apatiran toniladan pilak, sanlasus libon sakon a trigo, tan sanlasus libon sakon sibada. 6Nagmaliw a lalon makapanyari si Jotam, lapud matoor ton inonur so Katawan a Dios to. 7Saray arum ya agawaan nen Jotam legan na impanoley to et nikorit ira ed Say Awaran da ray Ararid Israel tan Juda. 8Duamplo tan limay taon nen Jotam nen nagmaliw ya ari, tan nanoley ed Jerusalem na labinanem taon. 9Inatey tan nipompon ed Siudad nen David tan si Acaz a lakin anak to so sinmalat ed sikaton nanari.
Currently Selected:
2 Saray Awaran 27: MBBPAN83
Highlight
Copy
Compare
Share
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
