Римвийриз 4

Имандив кьурвал Ибрагьим гьахъ-михьи яз кьун

1Бедендин жигьетдай чи бан-буба тир Ибрагьимакай чавай вуч лугьуз жеда? Ада вуч гъилиз гъана? 2Ибрагьим ада авур крариз килигна гьахъ-михьивилиз акъуднатӀа, адаз дамахардай себеб авай, амма Аллагьдин вилик ваъ. 3Каламди вуч лугьузва бес? «Ибрагьима Аллагьдихъ иман авуна – им адан гьахъ-михьивал яз кьабулна»#Хьунухь 15:6..

4КӀвалахзавайдаз гьакъи гун – им савкьват ваъ, адаз къвезвай къазанжи я. 5Крарихъ далу акал тийиз, амма чалкечир гьахъ-михьи ийизвай Аллагьдихъ иман ийизвайди патал адан иман вич гьахъ-михьивилиз акъуднавайди яз гьисабда.

6Гьа икӀ, Аллагьди инсандин крариз килиг тавуна гьахъ-михьивал яз гьисабзавай и кар ийизвайди бахтавар я, тестикьарзава Давудани. Ада лугьузва:

7 «Нин писвилерилай къахчунватӀа гъил,

нин гунагьар кӀевнаватӀа,

гьам бахтавар я!

8 Аллагьди нин хиве твазвачтӀа гунагьар,

гьам бахтавар я» # Забур 31:1-2. .

9И нуьсрет анжах суьннетнавайбуруз талукь яни ва я суьннет тавунвайбурузни? Ибрагьимаз адан иман гьахъ-михьивал яз кьабулайдакай чна лагьанай. 10АкӀ яз мус гьисабнай? Суьннет ийидалди ва я гуьгъуьнлай? Гуьгъуьнлай ваъ, суьннет ийидалди! 11Суьннетдин ишара адав ахпа, ам имандалди гьахъ-михьи тирди тестикьарун яз, гьеле ам суьннет тавунвайла, агакьнай. Гьа икӀ, суьннет тавунвай иманиярни гьахъ-михьибур яз гьисабун патал, Ибрагьимакай абурун виридан буба хьана. 12Ам неинки суьннет авунин адетдал амал ийизвай, чи буба Ибрагьимахъ суьннет ийидалди хьайи имандин рекьяйни физвай, чебни суьннет авунвайбурун бубани я.

Ибрагьимаз гайи гаф – имандаллай вирибур патал

13Дуьнья чпиз ирс яз жеда лагьана гайи гаф Ибрагьимазни адан эвледриз Къанундин куьмекдалди ваъ, абур имандин жигьетдай гьахъ-михьибур я лагьана гайиди я. 14И гайи гаф Къанун кьилиз акъудзавайбуруз талукь тиртӀа, иман гьаваянди ва Аллагьди гайи гаф кар галачирди жедай. 15ГьикӀ лагьайтӀа Къанун чӀуруни хъел гъида, амма Къанун авачир чкада Къанун чӀурунин тахсиркарвални авач.

16Гьавиляй и гаф, берекатдив кьурди хьун патал, иманидаз ганва. Гьа икӀ, ам Ибрагьиман вири эвледар патал гьакъикъиди я: неинки чпин умудар Къанундал амал авуник кутунвайбур патал, гьакӀни чпихъ Ибрагьимахъ хьтин иман авайбур патални. Ам чи виридан буба я. 17Каламда кхьенвайвал: «За вакай гзаф халкьарин бан-буба авунва»#Хьунухь 17:5.. Ам вичи иман авур Аллагьдин вилик чи буба я – кьейибурал чан хкизвай ва гьеле авачирди авачирнай гъана авайди ийизвай Аллагьдин вилик.

18Са умудни амачирла, Ибрагьим умуд кутуна агъуна, гьавиляй «Ви несилни кьадардиз гьа икьванди жеда!»#Хьунухь 15:5. лагьанвайвал, адакай гзаф халкьарин буба хьана. 19Вичин яш виш йисав агакьнавай чӀавуз вичин беден саки кьенвайди ва Саррадизни аялар техъжезмайди Ибрагьимаз чизвайтӀани, адан иман зайиф хьанач. 20Аллагьди гайи гафунихъ Ибрагьиман иманди ян ганач, аксина, ам иман себеб яз къуватдив ацӀана ва ада Аллагьдиз шукур ийизвай. 21Аллагьди гайи гаф Ада кьилиз акъуддай къуват Адахъ авайдахъ Ибрагьима кӀевелай иман ийизвай. 22Ингье вучиз Аллагьди адан иман гьахъ-михьивал яз кьабулнатӀа. 23И кар неинки са Ибрагьимаз, 24ам чазни талукь я. Чи Ребби Иса Месигьдал кьейидалай кьулухъ чан Хкайдахъ ийизвай чи иманни Аллагьди гьахъ-михьивал яз гьисабда. 25Иса Месигь чи тахсирар себеб яз ажалдин хура тунай ва чун гьахъ-михьивилиз акъудун патал Адал чан хтанай.

Currently Selected:

Римвийриз 4: ЛезПК

Highlight

Copy