Римвийриз 3

Аллагьдин вилик инсаниятдин буржи

1АкӀ хьайила, чувуд хьунин артуханвал вуч я? Суьннетнавайбурук кваз хьуникай вуч хийир ава? 2Вири патарихъай чӀехи артуханвал ава. Эвелни-эвел чувудрал Аллагьдин Гаф ихтибарунин артуханвал.

3Абурукай бязибур Аллагьдиз вафа хьаначтӀа, абурухъ вафа тахьунивай Аллагьдин вафавал чӀуриз жедани кьван? 4Гьелбетда, ваъ! Гьар са инсандик таб кватӀани, Аллагь гьакъикъи я, идакай икӀ кхьинни авунва:

«Ви гафар гьахъ-михьибур тирди раиж хьун патал,

ва Жуван дуванда гъалиб хьун патал» # Забур 50:4. .

5Амма чи чиркинвили ачухдаказ Аллагьдин гьахъ-михьивал къалурзаватӀа, им Аллагьдихъ чакай авай Вичин хъиле гьахъ авач лагьай чӀал жезвани? (Зун инсандиз хас веревирдералди рахазва.) 6Гьелбетда, ваъ! ТахьайтӀа Аллагьдивай дуьньядин дуван гьикӀ ийиз жедай? 7Амма зи тапуни Аллагьдин гьакъикъат къати ийизватӀа ва и саягъда Адан баркалла артухарзаватӀа, вучиз зи дуван, гунагькардин дуван яз ийизва? 8Хъсанвал арадал атун патал, белки, чун писвал ийиз эгечӀин? Фитнебазри чна гьакӀ ийиз чирзава лугьузва. Ахьтин инсанар чпин дуван авуниз лайих я.

Гьахъ-михьи садни авач

9Бес вуч хьанва? Чун, чувудар, масабурулай хъсан гьалда авани? СтӀунни ваъ! Муькуьбур хьиз, чувударни гунагьдин таъсирдик акатнавайдакай чна винидихъ лагьанай. 10Кхьенвайвал я:

«Гьахъ-михьиди авач,

гьич садни авач!

11 Гъавурдик квай садни авач,

садани Аллагь жагъурзавач.

12 Вири рекьяй акъатнава,

вири, сад хьиз, ява хьанва,

хъсанвал ийирди авач,

гьич садни авач» # Забур 13:1-3; Забур 52:2-4. .

13 «Абурун кӀалхан ахъа сур я,

табзава абуру чпин мецелди» # Забур 5:10. .

«Абурун сивел агъу ала гуьрзедин» # Забур 139:4. .

14 «Абурун сивер къаргъишривни туькьуьлвилив

ацӀанва» # Забур 9:28. .

15 «Иви экъичун паталди абурун кӀвачер йигин я;

16 абурун рекье барбатӀвални бедбахтвал ава,

17 чидач абуруз ислягьвилихъ фидай рехъ» # Келимаяр 1:16; Яшай 59:7-8. .

18 «Абурун вилера Аллагьдикай кичӀ авач» # Забур 35:2. .

19Чаз чизва хьи, винидихъ Къанунда лагьанвайди Къанундик квайбуруз лагьанва. Аллагьдин вилик гьич садазни сив ахъайдай ихтияр авач, вири дуьнья Адан вилик жавабдар я. 20Къанундал амал авуникди гьич садни Аллагьдин вилик гьахъ-михьивилиз акъуддач. Къанундин куьмекдалди чавай анжах гунагь кьатӀуз жеда.

Имандив кьур гьахъ-михьивал

21Амма гила, Къанундилай аслу тушиз, Аллагьди инсанриз вичикай Къанундини пайгъамбарри шагьидвалзавай гьахъ-михьивал ачухзава. 22Аллагьдилай къвезвай гьахъ-михьивал Иса Месигьдихъ иман ийизвай виридаз имандалди гузва. Са тафаватни авач: 23вирида гунагь авунва ва вири Аллагьдин баркалладикай магьрум хьанва, 24гьахъ-михьивилиз акъудун вирида гьавая, берекатдив кьурвал, Иса Месигьди гайи эвездин куьмекдалди къачузва. 25Аллагьди Ам имандал атай вирибур патал мергьемет авунин лишан яз къалурнава. Хашунал авахьай Адан Ивидалди тахсир алуднава. Идалди Аллагьдиз Вичин гьахъ-михьивал къалуриз кӀан хьана. Инсанри виликан асирра авур гунагьрай Аллагьди жаза ганач эхир. 26Ада яргъалди эхна. Гила, чи вахтунда, лагьайтӀа, Адаз Вичин гьахъ-михьивал къалуриз кӀанзава. Ам Вич гьахъ-михьи я ва Ада Исадихъ иман ийизвайди гьахъ-михьивилиз акъудзава.

27Гьа икӀ, чакай ийизвай тарифдиз вуч хьана? Ам арадай акъатна. Им гьи къайдадал амална хьайи кар я? Крар кӀанзавай Къанундал? Ваъ, иман кӀанзавай къайдадал. 28Чна тестикьарзава хьи, Къанундал амал авунилай аслу тушиз, инсандив имандалди гьахъ-михьивилиз акъудун агакьзава. 29Аллагь тек са чувудрин Аллагь жезвани кьван? Бес Ам муькуьбурун Аллагьни тушни? Гьелбетда, муькуьбурундини я, 30вучиз лагьайтӀа Ам, имандив кьурвал, суьннетнавайбур хьиз, чпин имандив кьурвал, суьннет тавунвайбурни гьахъ-михьивилиз акъудзавай тек са Аллагь я. 31Им чна имандалди Къанун къуватдай вегьизва лагьай чӀал я жал? Гьелбетда, ваъ! Аксина, чна ам тестикьарзава.

Currently Selected:

Римвийриз 3: ЛезПК

Highlight

Copy