Забур 80
80
Суварин шадвилин мани
1Манидаррин чӀехидаз. Гитит ягъиз. Асафан мани.
2Манияр лагь шадвилелди
чи мягькем къеледиз,
Аллагьдиз,
кӀевидаказ лагь Якьубан Аллагьдиз!
3Ван авурай авазди!
Тафтар ягъа,
ширин сесер авай арфадинни кинурдин
симерик кягъа!
4ЦӀийи вацран сувариз карч ягъа,
чи суварин югъ тир ацӀай вацразни.
5ГьикӀ лагьайтӀа ам Исраил патал къайда жеда,
Якьубан Аллагьдин тагькимар жеда.
6И къайда Ада Юсуфан эвледар паталди
шагьидвал яз тестикьнай,
хъфей чӀавуз ам Мисридин чилелай.
А чилел заз чин тийир чӀалан ван атанай:
7«За алудна залан пар къуьнерилай адан,
адан гъилер зимбилрикай азадна.
8Бедбахтвиле авайла, эвернай Заз Вуна,
За куьмек чакай ваз,
тӀурфандин циферай ганай За жаваб ваз,
Мерибадин ятарив вун синагънай.
Макьамдин ара
9Яб це, Зи халкь, За ваз тагьким ийизва!
Я Исраил, вуна Заз яб ганайтӀа!
10Тахьурай вахъ маса аллагь,
икрам мийир яд чилин аллагьдиз.
11Им Зун я, Ребби, Аллагь ви,
акъудайди вун Мисридин чилерай.
Ахъая ви сив, за ам ацӀурда!
12Амма Зи халкьдиз ван атанач Зи,
муьтӀуьгъ хьанач Исраил Заз,
13гьавиляй За туна абур гьукумда
чпин терс рикӀерин,
мумкинвал гана фидай чпин рекьерай.
14Агь, Зи халкьди Заз яб гуз хьанайтӀа,
Исраилни зи рекьерай фенайтӀа!
15За абурун душманар фад явашдай,
За Жуван гъил абур дарда твазвайбурун
аксиниз ракъурдай.
16Ребби такӀанбуру
абурун вилик
лукӀвилелди кьил агъуздай,
абурун вахт даим яз давам жедай.
17За абурув лап хъсан къуьл нез тадай,
абур тух ийидай виртӀедив,
акъуднавай раган къеняй».
Currently Selected:
Забур 80: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
