Забур 77
77
Къуватрин Аллагь
1Асафан шиир.
Яб акала, зи халкь, насигьатдихъ,
ван ша зи мецин гафарин.
2Зун рахада
дегь замандин мискӀалралди,
3чаз чидай ва ван хьайи,
чи бан-бубайри чаз ахъаяй ихтилатар лугьуда.
4Чнани абур аялрикай чуьнуьхдач;
къведай несилдиз суьгьбет ийида
баркалладикай Реббидин,
Адан къуватдикай,
Ада авур кьван аламатрикай.
5Ада Якьубаз шагьидвал туна,
Исраилдиз Къанун гана,
ам чпин аялрин гъиле тун
эмирна чи бан-бубайриз,
6къведай несилриз Къанун чир хьун паталди;
гьатта гьеле таханвай аялрини кваз,
гьабуруни, чпин вахт алукьайла,
вугуда ам чпин аялрив;
7абуру Аллагьдиз ихтибарун паталди,
Адан крар рикӀелай алуд тавун паталди,
Адан эмирар хуьн паталди,
8абур ухшар тежервал чпин бан-бубайриз –
кьилиз ялдай, гъулгъула гвай несилдиз,
рикӀ гьакъикъи тушир,
Аллагьдиз руьгьдалди вафа техуьр несилдиз.
9Ифраимдин рухваяр,
чпин яракь хьелер тир,
дяведин юкъуз катна кьулухъди.
10Аллагьдихъ галаз
икьрар хвенач абуру,
кьил къакъудна Къанундал амалуникай.
11Алудна рикӀелай Адан крарни
Ада къалурай аламатар абуруз.
12Мисрида абурун бубайрин вилик
Ада авунай аламатар,
Цагьан шегьердин патарив.
13Ада гьуьл кьве падна,
абур анай тухвана,
ятар цал хьиз акъвазарна.
14Юкъуз абур цифердалди тухвана,
йифизни – цӀун экуьналди.
15Къван кьве падна кьурумда,
абурув дериндавай ятарикай хъваз туна.
16Рагай Ада акъудна селлер,
авахьна ятар, вацӀар хьиз.
17Амма абуру Адаз акси яз
гунагьар авун давамарзавай,
виридалай Виневайдаз акси яз
гъулгъула твазвай кьурумда.
18Чпин рикӀера
Аллагь синагъ ийизвай,
чпин рикӀиз кӀандай тӀуьн це лугьуз.
19Аллагьдилай шикаятни авунай:
«Аллагьдилай кьурумда
тӀуьн гьазуриз алакьдани?
20Эхь, Ада къван яна, адай ятар авахьна,
селлер авахьна.
Алакьдани Адалай фуни гуз?
Вичин халкьдиз якни гуз алакьдани?»
21Ван хьана Реббидиз,
гъазаб акатна:
Якьубан цӀай гадар хьана,
Исраилдал хъелни куькӀвена.
22Куьз лагьайтӀа Аллагьдиз
ийизвачир абуру ихтибар,
Ада гудай куьмекдик
кутуначир абуру умудар.
23Ада эмирна вине авай цифериз,
ахъайна цаварин варар,
24марф хьиз, къурна абурал мангьу,
гана абуруз цавун техил.
25 Малаикрин фу тӀуьна инсанри;
Ада абуруз булдалди тӀуьн ракъурна.
26Ада къарагъарна рагъ экъечӀдай патан гар,
Вичин къуватдив гьална кьиблепатан гар.
27Абурал як, руг хьиз, кӀвахна,
гьуьлуьн къум хьиз, кӀвахна къушар;
28акатайвал гадарна кундал,
абурун алачухрин патарив.
29Абуру тӀуьна, тежер кьван тух хьана,
куьз лагьайтӀа кӀан хьайиди абуруз булдаказ гана.
30Амма абурун нефс ацӀун тавунмаз,
тӀуьрди гьеле сиве амаз,
31Аллагьдин хъел абурал аватна,
абурукай лап мягькембур телефна,
ярхарна Исраилдин рухваяр жегьил.
32Идазни килиг тавуна,
давамзавай абуру гунагьар авун,
Адан аламатрин чӀалахъ жезвачир.
33Ада абурун уьмуьр ичӀиди авуна,
абурун йисар къурхудалди ацӀурна.
34Ада чеб барбатӀайла, гьа чӀавуз
абур Адахъ къекъвез хьана,
рикӀ гваз абур Адахъ элкъвез хьана.
35Аллагь чпин далда тирди рикӀел хкана,
виридалай вине авай Аллагь
чпин Хиласкар тирди рикӀел хкана.
36ЯтӀани абуру Адан вилик ялтахвал ийизвай
абурун мецери кӀуьгьуьдаказ табзавай Адаз,
37вучиз лагьайтӀа абурун рикӀер
Адан вилик гьахъ тушир,
абуру Адан Икьрардиз вафа хуьзвачир.
38Амма Ада, масадахъ рикӀ кудайди яз,
абурун гунагьрилай
гъил къахчузвай,
ийизвачир абур терг.
Ада гзаф гъилера Вичин хъел алудна,
туьнт авунач Вичин гъазаб.
39Адан рикӀел аламай, абур гьакӀан як тирди,
абур гар тирди элкъвена техкъвер
40Гьикьван Адав гъулгъула авунай кьурумда,
Адан зегьле тухванай кас алачир чилерал!
41Мад ва мад абуру Аллагь синагъ ийизвай,
Исраилдин Пакди русвагь ийизвай.
42Абурун рикӀел аламачир я гъилер Адан,
я югъни чеб Ада душмандикай хиласай,
43керемат-ишараяр къалурай вахт Мисрида,
аламатар – Цагьандин патарив.
44Элкъуьрна абурун вацӀарни булахар ивидиз,
абурай хъваз тежедайвал.
45Абур тӀуьн паталди бувунар ракъурна,
хъипер ракъурна абур тергун паталди.
46Ада бегьер чӀигъичӀигърив вугана,
абурун зегьметар цицӀерив вугана.
47Ада харцив гатаз туна ципицӀар,
муркӀадив гатана тутар.
48Абурун малар харцик кутуна,
абурун суьруьярни нехирар цӀайлапанрив вугана.
49Вичин хъилен ялав къурна Ада абурал,
наразивал, гъазаб ва бедбахтвал,
ракъурна абурал жаза гвай малаикрин кӀеретӀ.
50Гьазурна Ада вичин хъилез рехъ,
абурун чанар чара авунач ажалдикай;
тӀегъуьндин гъиле туна Ада уьмуьр абурун.
51Мисрида телефна виридан сифте хьайи ругулар,
Хаман кӀвалера аладай сифтегьан ругулар.
52Вичин халкь, хпер хьиз, тухвана Ада,
тухвана абур, суьруь хьиз, кьурумдай.
53Хата галачиз тухвана, кичӀе тушир абуруз,
абурун душманар акатна гьуьлуьк.
54Пак чилерал гъана абур,
Вичин эрчӀи гъиливди къачур Дагъдал.
55Абурун виликай чукурна халкьар,
гьабурун чилер ирс яз пайна абуруз,
Исраилдин тайифаяр ацукьарна чардахра.
56Амма абуру гъулгъула тваз,
синагъ ийизвай
Виридалай вине авай Аллагь,
Адан шагьидвилер хуьзвачир.
57Абур рекьяй акъатзавай,
хаинвалзавай, чпин бубайри хьиз,
кьулухъ элкъвезвай,
чӀуру чӀемерук хьиз.
58Ам пашманар ийизвай
хкажнавай пак чкайралди,
Адан гъайра къизгъинар ийизвай
абурун бутралди.
59Аллагьдиз ван хьана, хъел атана,
кӀевелай инкар авуна Исраил.
60Шиладавай туна кӀвал –
инсанрин юкьва эцигай чардах.
61Вичин къуват есирвиле вугана,
туна Вичин баркалла душманрин гъиле.
62Вичин халкь туна турунин хура,
хъел атана Вичин ирсиникай.
63ЦӀу кьуна абурун жегьилар,
абурун рушари лагьанач
некягьдин манияр.
64Абурун хахамар ярх хьана туруник,
шехьначир абурун хендедаяр.
65Уях хьана, ахварикай хьиз, Агъа,
чехирдикай уях хьайи зурба инсан хьиз.
66Вичин душманар далудихъай телефна,
даим яз абурдай вегьена.
67 Юсуфан чардах инкарна Ада,
Ифраиман тайифа авунач хкягъ.
68Ягьудан тайифа хкяна,
Адан рикӀ алай Сигьан дагъ.
69Цав хьиз, кьакьан пакхана эцигна Вичин,
Чил хьиз, мягькем авуна даим яз.
70Вичин лукӀ Давуд хкяна,
хперин парахрай къачуна.
71Нек гузвай хперивай къачуна,
гъана ам хуьн патал Вичин халкь,
Якьубан, яни Исраилдин халкь, Вичин ирс.
72Хвена абур Давуда михьи рикӀелди,
тухвана абур камал гвай гъилив.
Currently Selected:
Забур 77: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
