Забур 56
56
Куьмек кӀанз ийидай дуьа
1Манидаррин чӀехидаз. «Телеф мийир» манидин макьам ягъиз. Давудан шиир. Давуд Шаулакай катна магъарада чуьнуьх хьайи чӀавуз.
2Аллагь, регьим ая заз, регьима,
за Вакай далда жагъурзава!
Алатдалди бедбахтвал
чуьнуьх жеда зун хъендик Ви луварин.
3За эверзава виридалай Виневайдаз, Аллагьдиз,
заз талукь Вичин къаст кьилиз акъудзавай Аллагьдиз.
4Цаварилай Ада жаваб гуда заз,
заз куьмек ийида,
жаза гуз хурук зун кутунвайбуруз;
Макьамдин ара
Аллагьди къалурда
Вичин регьимни гьакъикъивал.
5Зал асланар алтӀушнава,
вагьши гьайванрин юкьва ярх хьанва зун,
жидаярни хьелер хьтин сухвар авай
инсанрин юкьва,
мецер турар тир хци авунвай.
6Цаварилайни вине хьурай Вун,
я Аллагь,
вири чилерал хьуй баркалла Ви!
7Абуру зи кӀвачер патал чил вегьенва,
дердиникди элчуьх хьанва кӀвачер зи.
Абуру фур эгъуьнна рекьел зи,
амма аниз аватна чеб.
Макьамдин ара
8Аллагь, кӀеви я зи рикӀ, зи рикӀ кӀеви я.
Мани лугьуда, тариф ийида.
9Зи руьгь, ават ахварай,
арфани кинур, ахварай ават!
За экуьнин яр авудда ахварай.
10Агъа, за Ваз шукурда халкьарин юкьва,
тайифайрин арада Вакай мани лугьуда,
11куьз лагьайтӀа регьим Ви
цаварив кьван агакьда,
Ви гьахъ агакьда цавун циферив кьван.
12Цаварилайни вине хьурай Вун,
я Аллагь,
вири чилерал хьуй баркалла Ви!
Currently Selected:
Забур 56: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
