Забур 39
39
Шукурни тӀалаб
1Манидаррин чӀехидаз. Давудан мани.
2Сабурдивди вилив хвенай за Ребби,
Элкъвена Ам захъ, ван хьана зи гьарайдин.
3Ахкъудна Ада зун кичӀ кутадай гургусдай,
зурзазвай уьлендай.
Ада зи кӀвачер эцигна рагал,
мягькемна зи камар.
4Ада цӀийи мани гъана мецел зи;
тарифаррай Аллагьдин чи.
Гзафбуруз аквада ва кичӀе жеда,
Реббидал чеб ихтибарда.
5Реббидик вичин умуд кутазвай
кас бахтавар я,
элкъвен тийизвайди кьама ялар авайбурухъ,
тапан аллагьрин гуьгъуьнаваз физвайбурухъни.
6Я Ребби, Аллагь зи!
Гьикьван гзаф я Вуна авур кьван аламатар,
чакай тир Ви ниятар;
гьич садни Вав гекъигиз жедач! –
за абурукай хабар гудай, ихтилат ийидай,
амма абурун кьадар гзаф я.
7КӀан хьанач Ваз я къурбандар, я савкьватар,
амма Вуна Зун паталди ахъайна япар,
тӀалабнач я кунугар,
я къурбандар гунагьдай.
8Гьа чӀавуз за лагьана: «Ингье, зун атанва,
кхьенвайвал закай къаргъуда».
9Зи Аллагь, заз кӀанзава ви къаст кьилиз акъудиз,
Ви насигьатар зи рикӀе ава.
10Гзаф инсанар авай кӀватӀалда
хабар гана за Ви гьахъвиликай,
завай зи мез хуьз хьанач –
Ребби, и кар чизва Ваз.
11Ви гьахъвал жуван рикӀе чуьнуьхнач за,
Ви вафадикай, хиласвиликай хабар гана за.
Ви регьимни гьакъикъат за чуьнуьхнач
гзаф халкь авай кӀватӀалда.
12Ви мергьеметдикай хкудмир зун, я Ребби,
Ви регьимди ва вафади
къаравулвал авурай зал датӀана.
13Мад кьадар авачир кьван балаяр алтӀуш хьанва зал,
кьадар авач абурун,
зун тӀушуннава гунагьри зи,
зи вилерал циф акъулдзава,
зи кьилеллай чӀарарилай гзаф я абур.
Зи рикӀ ажуз хьанва.
14Я Ребби! Минет хьурай Ваз,
азад ая зун!
Тади ая зи куьмекдиз, я Ребби!
15Зи чан къачуз кӀанзавай кьван вирибур
русвагь хьурай, регъуь хьурай абуруз.
Зи кьиникь кӀанзавай вирибур
элкъуьрай кьулухъ русвагь яз.
16КичӀ акатрай русвагь хьуникай
ягьанатдин хъвер ийиз заз лугьузвайбурук:
«Килиг! Килиг адаз!»
17Хвеши хьурай, шад хьурай Валди
Вун жагъурзавай вирибур.
Вуна гудай хиласвал кӀандайбуру
датӀана лугьурай:
«Ребби чӀехи я!»
18Зун кесиб я, саил я,
зи къайгъу чӀугурай Агъади.
Вун куьмек я зи, хиласкар я зи,
зи Аллагь, геж мийир!
Currently Selected:
Забур 39: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
