Забур 29
29
Хилас авунай шукур авун
1 Давудан мани. Аллагьдин КӀвал паквилиз акъудунин мани.
2Я Ребби, за Вун виниз
хкажзава тарифдив,
На зун фурай акъудна лугьуз,
зи душманриз зал
гъалиб хьуник шадвал ганач лугьуз.
3Я Ребби, Аллагь зи,
за куьмекдиз эверна Ваз,
Вуна дири хъувуна зун.
4Я Ребби! На зун
агъа дуьньядай акъудна,
хвена Вуна уьмуьр зи,
зун суруз аватдайла.
5Мани лагь Реббидиз, эй халкь, Адаз вафа ийизвай,
Адан пак ТӀварцӀиз шукурар ая.
6Адан хъел давам жеда легьзеда,
Адан регьим жеда вири уьмуьрда.
Вири йифди къведа шел,
пакамахъ – шадвал.
7Хушбахтвиле лугьузва за:
«Садрани зун татаб жедач».
8Зун патал Вахъ мергьемет хьана, я Ребби,
мягькемна зун, дагъ хьиз, вуна.
Амма анжах Вуна Жуван чуьнуьхна чин
велвелади зун кьур чӀавуз.
9Я Ребби, за эверна Ваз,
регьима лугьуз дад-бидадна Агъадиз:
10«Зи ажалдикай вуч хийир ава,
аватайла суруз зун?
Руквади шукур ийидани Ваз?
Хабар гудани Ви вафадикай?
11Я Ребби, ван ша, регьим ая заз!
Ребби! Заз куьмек хьухь!»
12На зи шел элкъуьрна шадвилин кьуьлуьниз,
шихин пекер алудна зи, алукӀна шадвилин партал,
13зи рикӀи Ваз мани лугьун паталди
ва кис тавун паталди.
Я Ребби, Аллагь зи,
за шукурда Ваз даим яз!
Currently Selected:
Забур 29: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
