ФилипӀвийриз 4

1Гьа икӀ, зи шадвални зи таж тир кӀани ва играми зи стхаяр-вахар, Реббидин куьмекдалди кӀевиз акъваз, кӀанибур.

Несигьатар

2За Эвгьуда вахазни СуьнтӀуьх вахаз Реббидалди са фикиррал алаз хьухь лугьуз тагькимзава. 3За вазни минетзава, заз вафа тир амадаг, и вахариз куьмек це, гьикӀ лагьайтӀа абуру Шад Хабар патал захъ галаз, КӀелмесахъ галаз ва уьмуьрдин ктабда чпин тӀварар авай маса чи амадагрихъ галаз зегьмет чӀугуна.

4Реббидик кваз датӀана шад хьухь ва за мад гъилера лугьузва: шад хьухь! 5Къуй инсанрихъ галаз авай куь хъсан алакъаяр виридаз акурай. Ребби мукьув гва. 6Са куьнин къайгъуни чӀугвамир, амма вири крара, дуьадин ва минетдин куьмек галаз шукур авуналди, куь тӀалабунар Аллагьдиз чира. 7Гьа чӀавуз гьихьтин хьайитӀани кьатӀунрилай вине авай Аллагьдилай къвезвай саламатвили куь рикӀер ва акьулар Иса Месигьдалди садвиле аваз хуьда.

8Эхирки, стхаяр-вахар, гьи кар гьакъикъат, намус, адалат, михьивал, хушвал ва гьейранвал галайди ятӀа, гьи кар сувабди ва тарифдиз лайихди ятӀа, гьадакай фикирар ая. 9Квез завай чир хьайи кьван, завай квев агакьай кьван, ван хьайи кьван ва завай акур кьван вири крар кьилиз акъуд. Гьа чӀавуз саламатвилин чешме тир Аллагь квехъ галаз жеда.

Савкьватрай сагърай лугьун

10Куьне цӀийи кьилелай зи къайгъу чӀугунал за Реббидихъ ийизвай иманда рикӀин сидкьидай шадвалзава. Гьелбетда, куьне зи къайгъу датӀана чӀугвазвай, амма квез а кар къалурдай мумкинвал авачир. 11За икӀ жув са куьхъ ятӀани муьгьтежвиляй лугьузвайди туш, гьикӀ лагьайтӀа зун гьихьтин хьайитӀани гьаларал рази жез вердиш хьанва. 12Заз кьитвални булвал вуч ятӀа чизва. Зи кьилел татайди амач, заз тух хьун ва каш эхун вуч ятӀа, агьвал хьунухь ва дарвиле хьун вуч ятӀа чизва. 13Заз къуват Гузвайдан куьмекдалди залай вири алакьда.

14Гьа икӀ, захъ галаз зи бедбахтвилер паюналди куьне хъсан кар авуна. 15ФилипӀвияр, за Шад Хабардикай муштулухар гуз эгечӀай, зун МакӀедандай экъечӀай чӀавуз, тек са квелай гъейри, иманийрин са кӀватӀалдини заз пулунин куьмек тагайвал куь рикӀел алама. 16Зун герек чӀавуз куьне заз куьмек гьатта Саланикдизни кваз шумудни са гъилера ракъурнай. 17За им квелай са вуч ятӀани жувал агакьун патал лугьузвайди туш, амма заз куьне куь суваб гзафарна кӀанзава. 18ЭпафрадитӀан куьмекдалди куьне заз ракъурай вири пул зав агакьна. Ам гьатта герекзавайдалайни гзаф я. Захъ исятда вири бес кьадарда ава. Им атир галай ни хьиз я, вич Аллагьдиз кӀани ва хуш къурбанд хьиз я. 19Зи Аллагьди Иса Месигьдин куьмекдалди Вичин баркалла алай девлетрикай гана, куь виридан игьтияжар таъмин ийида!

20Къуй чи Аллагьдиз ва Бубадиз асирдай асирдиз шукур хьурай. Амин.

Эхиримжи саламар

21Иса Месигьдиз талукь вирибуруз саламар лагь. Захъ галай стхайри-вахарини квез саламар лугьузва. 22Аллагьдиз талукь тир инавай вирибуру квез саламар лугьузва, иллаки Римдин пачагьдин кьилел-кӀвачел элкъвезвайбурукай тирбуру.

23Къуй Ребби Иса Месигьдин берекат квехъ галаз хьурай. Амин.

Currently Selected:

ФилипӀвийриз 4: ЛезПК

Highlight

Copy