Каласвийриз 1

Саламар

1Аллагьдин къастуналди хкянавай Иса Месигьдин илчи Павелан ва стха ТӀиматӀеян патай 2Каласра авай, Месигьдихъ иман ийизвай, Адаз талукь стхайриз-вахариз.

Чи Буба Аллагьдин патай берекатар ва саламатвал хьурай квез.

Аллагьдиз шукур авун

3Куь паталай авур дуьайра чна датӀана Аллагьдиз – чи Ребби Иса Месигьдин Бубадиз шукур гъизва, 4вучиз лагьайтӀа чав Иса Месигьдихъ куьне ийизвай имандикай ва Аллагьдиз талукь вирибуруз куь патай авай муьгьуьббатдикай ванер агакьзава. 5-6Куь иманни муьгьуьббат квев цаварал агакьдайдак кутунвай умудди арадал гъанвайди я. Идакай квез виликдай гьакъикъатдин гафунай – куь патавни атанвай Шад Хабардай ван хьана. И Хабар вири дуьнья тирвал чкӀизва ва Ада бегьер гъизва. Квез сифте яз адакай ван хьана ва Аллагьдин берекат гьакъикъатдаказ кьатӀай йикъалай инихъ дуьнья тирвал гьикӀ бегьер гъизватӀа, гьакӀ куь арадани бегьер гъизва. 7А хабардикай квез чи кӀани амадаг, куьн паталди Месигьдиз вафа яз къуллугъзавай Эпафарасавай чир хьана. 8Квез Руьгьди гайи муьгьуьббатдикай гьада чаз ихтилатни авуна.

9Гьавиляй квекай сифте яз ван хьайи чӀавалай инихъ чна куь гьакъиндай акъваз тавуна дуьаяр ийизва ва куьне Аллагьдин къаст Руьгьдалди ва гьар жуьредин камалдалди кьатӀун тӀалабзава. 10Куьне Ребби рази жедайвал уьмуьр тухун паталай чна дуьаяр ийизва. Куь хъсан крари гьар са жигьетдай бегьер гъурай ва куьне Аллагь мукьувай кьатӀунрай. 11Ада Вичин къуватдин ва зурбавилин куьмекдалди, квевай вири крара дурум гуз ва эхи ийиз жедайвал, куьн мягькем авурай. 12Квез Аллагьдин экуь Пачагьлугъда Вичиз талукьбурун ирсиникай пай къачудай алакьун гана. Ам квез гайи Цаварин Бубадиз шаддаказ шукур ая. 13Ада куьн мичӀивилин гьукумдикай хиласна ва куьн Вичин рикӀ алай Хцин Пачагьлугъдиз тухвана. 14Хцелди чав хиласвал, гунагьрилай гъил къахчун агакьна.

Виридалай Иса Месигь вине ава

15 Иса Месигь Аллагьдин къамат я таквазвай,

халкьнавай кьван виридалай Ам виликдай авазвай.

16 Адан куьмекдалди

цаварал ва чилерал алай кьван вири,

аквазвайди ва таквазвайди халкь авуна:

чеб кӀандатӀа тахтар хьурай,

кӀандатӀа гьакимвилер,

кӀандатӀа регьбервилер

ва кӀандатӀа гьукумар –

вири Гьадан куьмекдалди ва Гьам патал халкь авуна.

17 Вири халкь ийидалди вилик Ам авазвай,

халкьнавай кьван вири Гьадалди къайдада ава.

18 Ам Бедендин кьил я,

иманийрин КӀватӀалдин кьил я,

Ам виридан эвел я,

вири патарихъай сифтегьанди хьун патал,

кьена чан хтайбурун арадани Ам сад лагьайди я,

19 куьз лагьайтӀа Аллагьдин вири ацӀайвал

Месигьда аваз хьун Аллагьдиз кӀан хьана.

20 Хашунал экъичай Месигьдин Иви себеб яз,

Адан куьмекдалди

цаварал ва чилел алай кьван вири

Аллагьди Вичихъ галаз туькӀуьр хъувуна.

21Са мус ятӀани куьн Аллагьдивай яргъа тир ва чӀуру крарихъ элкъуьрнавай куь акьулдалди Адахъ галаз мидявиле авай. 22Амма исятда Месигь Вичин Бедендин кьиникьдалди Аллагьди куьнни Вичихъ галаз туькӀуьр хъувуна, вучиз лагьайтӀа Адаз куьн пакбур, рехне квачирбур ва леке алачирбур яз Вичин вилик акъвазариз кӀанзавай. 23Куьн имандин бинедал ян тагана амукьайтӀа, цаварин кӀаник квай виридаз муштулух яз ганвай ва квезни ван хьанвай Шад Хабарди квез ганвай умуддикай къерех тахьайтӀа, гьакӀ женни ийида. Закай, Павелакай, лагьайтӀа и Шад Хабардиз къуллугъзавайди хьанва.

Павела иманийрин кӀватӀалдиз къуллугъ авун

24Гила за куь паталай азаб чӀугвазва лугьуз шадвал ийизва. Месигьди Вичин Беден патал, яни иманийрин кӀватӀал патал заз тайинарнавай бедендин азабар чӀугун за тамамар хъийизва. 25Аллагьдин эмирдалди заз и кӀватӀалдиз къуллугъ ийидай мумкинвал гана. Ада заз Вичин гаф вири тамамвилелди квев агакьарунин эмир гана. 26А гаф инсанар патал асирдай асирдиз, несилрай несилриз сир яз амукьзавай, амма гила ам Адаз талукьбуруз ачух хьанва. 27Месигьди куь рикӀера уьмуьр тухузвайвиликай ибарат сир вири халкьар паталди гьикьван зурба ятӀа, Аллагьдиз чириз кӀан хьана. Инлай кьулухъ жедай баркалладик куьне кутазвай умуд Месигь я.

28Гьар са кас геле тваз ва адаз чирвал гуз, чна Месигьдикай хабар гузва. Гьар садакай акьалтӀай месигьи хьун патал, чна вири камалдикай менфят къачузва. 29Дуьз лагьайтӀа, и кар патал за Месигьдилай къвезвай, зак акатна, гуж аваз гьерекат ийизвай къуват кардик кутаз зегьметни чӀугвазва.

Currently Selected:

Каласвийриз 1: ЛезПК

Highlight

Copy