Кьурумда 25

Исраилди Багьал-Пеараз бутпересвал авун

1Исраил ШитӀимда акъвазнавай кьван вахтунда, исраилвийри магьабви папарихъ галаз явавилер ийизвай. 2Абуру исраилвийриз чпин аллагьриз къурбандар авунин серенжемрал эверзавай. Халкьди незвай ва абурун аллагьриз икрам ийизвай. 3ИкӀ Исраил Багьал-Пеарахъ галаз сад-садав кьазвай, ва Реббидиз Исраилдикай хъел атана. 4Реббиди Мусадиз лагьана: «Реббидиз Исраилдикай атанвай пис хъел элекьарун патал, и халкьдин регьберар кьуна, абур виридаз аквадайвал, Реббидин вилик куьрсара».

5Мусадини Исраилдин гьакимриз лагьана: «Квекай гьар сада вичин ксарикай Багьал-Пеараз икрам авурбур вужар ятӀа, абур ажалдин гъиле вугурай».

6И вахтунда вуж ятӀани Исраилдин рухвайрикай сада Мусадин ва Исраилдин вири элдин вилик, абур Гьалтунин Алачухдин сивел шехьзавайла, вичин хизандиз са мидиянви паб гъана. 7Хахам Гьарунан хва Элазаран гада Пингьасаз и кар акур, ам элдикай хкечӀна, жида къачуна 8ва а исраилвидин гуьгъуьналлаз алачухдик гьахьна. Ада абурун кьведанни, исраилвидин ва папан, руфунра и патай а патаз хкатдайвал жида сухна.

И чӀавуз исраилвийрин арада тӀегъуьн акъваз хьана, 9амма адакди къанни кьуд агъзур инсан телеф хьана.

10Реббиди Мусадиз лагьана: 11«Пингьаса, хахам Гьарунан хва Элазаран гадади Исраилдин рухвайрикай атай Зи хъел элекьарна. Ада Зидаз ухшар тир гъайрадалди гъайравал авуна, ва За Жуван гъайра себеб яз абур тергнач. 12Гьа икӀ, адаз лагь хьи, За адахъ галаз ислягьвилин икьрар кутӀунзава. 13Адахъ ва адан эвледрихъ галаз даим яз хахамвилин икьрар кутӀунзава, вучиз лагьайтӀа ада гъейрат гваз вичин Аллагьдин намус хвена ва Исраилдин рухвайрин гунагьдилай гъил къахчудайвал авуна».

14Вич мидиянви пабни галаз яна кьейи исраилвидин тӀвар Зимригь тир, Салудин хва, ам шимунийрик акатзавай сихилдин регьбер тир. 15Яна кьейи мидиянви папан тӀварни Казби тир, тайифадин регьбер, Мидияндай тир сихилдин кьил Цуран руш.

16Реббиди Мусадиз лагьана: 17«Мидиянвияр душманар яз гьисаба ва абур терг ая, 18вучиз лагьайтӀа абуру квехъ галаз, Пеарахъ галаз алакъада авай карда ва чпинбурукай сад, Мидияндин регьбердин руш, Пегар себеб яз тӀегъуьн гатӀунайла яна кьейи Казбидихъ галаз алакъада авай карда, куьн алцур авуналди, душманрихъ галаз хьиз рафтарвал авуна».

Currently Selected:

Кьурумда 25: ЛезПК

Highlight

Copy