Кьурумда 16
16
Кьарагь, Датан ва Абирам Мусадиз акси экъечӀун
1Левидин хтул, Къегьатан хва, Йицгьаран сихилдай тир Къарагь ва рувенияр тир Датанни Абирам, Элиабан рухваяр ва Пелетан хва Ан, чӀуру къаст авуна, 2Мусадин аксиниз экъечӀна. Абурухъ кьве вишни яхцӀурни цӀуд кас исраилвияр, элдин регьберар, халкьдин арада машгьур чӀехи мертебада авай ксарни галай. 3Абур Мусадинни Гьарунан аксиниз экъечӀна ва абуруз лагьана:
– Куьн алатна гзаф яргъал фенва! Элдик акатзавай вирибур пак я, абурукай гьар сад, ва Реббини абурухъ галаз ава. Бес вучиз куьне Реббидин вири халкьдилай куьн вине кьазва?»
4Идан ван хьайила, Муса чинихъди ярх хьана. 5Ада Къарагьаз ва адан шерикриз лагьана: «Пака экуьнахъ Реббиди вуж Аданди ятӀа, вуж пак ятӀа ва низ Адаз мукьва жедай ихтияр аватӀа къалурда. Ада вуж хкягъайтӀа, гьадаз Адаз мукьва хьунин мумкинвал гуда. 6Вуна, Къарагь, ва ви шерикри ингье вуч ийидатӀа: хуш атирдин ни галай затӀарик цӀай кутадай хекендазар къачу 7ва пака абура кузвай цӀивинар эциг, абурални Реббидин вилик атирдин ни галай затӀар эциг. Реббиди вуж хкягъайтӀа, гьам пак жеда. Куьн, левияр, алатна гзаф яргъал фенва!»
8Мусади Къарагьаз лагьана: «Яб це, левияр! 9Квез Исраилдин Аллагьди куьн чара авуна, куьне Реббидин Алачухда кӀвалахун, элдин вилик акъвазун ва адаз къуллугъ авун патал, Вичиз мукьва авун бес тушни? 10Ада куьн ва куь миресар тир левияр Вичиз мукьва авунва, амма куьн хахамвални вахчун патал алахънава. 11Куьн ва куь шерикар Реббидин аксиниз экъечӀнава. Гьарун вуж я эхир, куьне адалай наразивал малумариз?»
12Мусади Элиабан рухваяр тир Датаназни Абирамаз эверна. Амма абуру лагьана: «Чун къведач! 13Вуна чун вичикай некни вирт хкатзавай чилелай алудна, рекьин патал кьурумдиз гъун бес тушни? Гила лагьайтӀа ваз чи винел агъавални ийиз кӀанзава. 14Вуна чун вичикай некни вирт хкатзавай чилел гъанач ва чаз никӀерни ципицӀ багълар ирс яз ганвач. И инсанрин вилериз руг ягъиз кӀанзавани? Чун къведач!»
15Мусадик гзаф хъел акатна ва Реббидиз лагьана: «Абурун къурбандар кьабулмир. За абурувай гьич ламни къачунвайди туш ва абурукай гьич садазни писвал авунач».
16Мусади Къарагьаз лагьана: «Вунни ви шерикар лагьайтӀа, пака Реббидин вилик акъваз: вун, абур ва Гьарун. 17Гьарда вичин хекендаз къачурай, ада хуш ни галай затӀар эциграй ва ам Реббидиз гъурай – вири санлай кьве вишни яхцӀурни цӀуд. Вуна ва Гьарунани гьарда вичин хекендаз гъваш».
18Гьарда вичин хекендаз къачуна, ана кузвай цӀивинар эцигна, абурални – хуш атирдин ни галай затӀар, ва Мусадихъни Гьарунахъ галаз Гьалтунин Алачухдин сивел акъвазна. 19Къарагьа абуруз акси яз вири эл Гьалтунин Алачухдин сивел кӀватӀна. Реббидин баркалла вири элдин вилик пайда хьана. 20Реббиди Мусадизни Гьаруназ лагьана: 21«За абур са легьзеда терг авун патал, и элдикай чара хьухь». 22Амма Мусани Гьарун чинихъди ярх хьана ва лагьана: «Аллагь, гьар садан рикӀе авайди чидай Аллагь, Ваз, сада гунагь авуналди, вири элдикай хъел къведа жал?»
Къарагьаз, Датаназ ва Абирамаз жаза гун
23И чӀавуз Реббиди Мусадиз лагьана: 24«Элдиз лагь: „Къарагьан, Датанан ва Абираман утагъривай къекъечӀрай“».
25Муса къарагъна ва Датананни Абираман кьилив фена, Исраилдин агъсакъаларни адан гуьгъуьналлаз фена. 26Ада эл хабардар авуна: «И напакрин алачухривай къекъечӀ! Абурун ала-буладикай са куьникни хуькуьрмир, тахьайтӀа куьн абурун гунагьрай рекьида». 27Абур Къарагьан, Датанан ва Абираман утагъривай къерехдиз хьана. Датан ва Абирам экъечӀна ва папар, рухваяр ва гъвечӀи аяларни галаз чпин алачухрин сивел акъвазнавай.
28Мусадини лагьана: «Ингье квез вири и крар ийиз Зун Реббиди ракъурнавайди, ва за и кӀвалахар жуван хушуналди тийизвайди гьикӀ чир жедатӀа: 29абур адетдин ажалдикди кьейитӀа, ва абурун кьисмет вири инсанрин кьисмет хьтинди хьайитӀа, Реббиди зун ракъурнавайди туш. 30Амма Реббиди гьич тахьай хьтинди арадал гъайитӀа, ва чили вичин сив ахъайна, абур вири чпин мални галаз туькьуьнайтӀа ва абур чан алаз агъа дуьньядиз хъфейтӀа, куьн и ксари Реббидиз нифрет ийизвайдан гъавурда акьада».
31Ада анжах икӀ лагьана кутягьнамазни, абурун кӀвачерик квай чил къакъатна. 32Чили вичин сив ахъайна ва абурни абурун мукьва-кьилияр туькьуьнна – Къарагьан вири талукьар абурун вири мал-девлетни галаз. 33Абур чан алаз агъа дуьньядиз аватна, чпин вири мал-девлетни гваз; чил абурун винел акьал хьана, ва абур жемятдин арадай квахьна. 34Абурун гьарайрик кьуд патахъай акъвазнавай исраилвияр икӀ гьарайиз катна: «Чили чунни туькьуьн тавурай!»
35Реббидикай ялав хкатна ва чпи хуш ни галай затӀар гъанвай кьве вишни яхцӀурни цӀуд кас кана. 36Реббиди Мусадиз лагьана: 37«Хахам Гьарунан хва Элазараз мейитрикай кана амукьайдакай хекендазар кӀватӀун ва абура авай цӀивинар гьарнихъ чукӀурун эмир ая, вучиз лагьайтӀа абур кьетӀенбур я, – 38ибур уьмуьр къакъудунин жаза агакьай гунагькаррин хекендазар я. Хуш ни галай затӀар кудай и къапар кьелечӀ чарар хьиз кьалу ая. Абуралди къурбанган кӀев ая. Абур Реббидиз гъанвайбур тир, ва абур паквилиз акъуднавай затӀариз элкъвенва. Абур Исраилдин рухвайриз игьтиятвилин хабар хьуй».
39-40Хахам Элазара ялав галукьна кайибуру гъанвай буьруьнждин хекендазар кӀватӀна ва абур, Реббиди Мусадилай вичиз эмир авурвал, къурбанган винелай кӀевун патал хана. Къарагьан ва адан шерикрин кьисметдикай пай къачун тавун патал, Гьарунан эвледрилай гъейри мад гьич садазни Реббидин вилик хуш ни галай затӀар кудай ихтияр авачирди Исраилдин рухвайрин рикӀел хкун гьа ихьтинди хьана.
Мусани Гьарун халкьдин тереф хуьз экъечӀун
41Пакадин юкъуз Исраилдин вири элдик Мусадилайни Гьаруналай рази туширвал малумардай гъулгъула акатна. «Куьне Реббидин эл пуч авуна», – лугьузвай абуру. 42Мусадизни Гьаруназ акси яз кӀватӀ хьана, эл Гьалтунин Алачух галайвал элкъвейла, ам цифеди кӀевна ва Реббидин баркалла пайда хьана. 43Мусани Гьарун Гьалтунин Алачухдин вилик атана, 44ва Реббиди Мусадиз лагьана: 45«За абур са легьзеда терг авун патал и эл туна алад».
Абур метӀерал аватна. 46Мусади Гьаруназ лагьана: «Хекендаз къачу, ада къурбангандилай къачуна кузвай цӀивинар ва хуш ни галай кудай затӀар эциг ва абурун гунагьрилай гъил къахчунин серенжем кьиле тухун патал, элдин кьилив тади ая». Реббидик хъел акатуникди, инсаф тӀегъуьн пайда хьанва. 47Гьаруна Мусади лагьайди кьилиз акъудна ва жемят галайвал тади авуна. Абурун арада тӀегъуьн чкӀанваз хьана, амма Гьаруна хуш ни галай затӀарик цӀай кутуна ва халкь патал гунагьрилай гъил къахчунин серенжем кьиле тухвана. 48Ам кьенвайбурунни чан алайбурун арада акъвазна, ва тӀегъуьн акъваз хьана. 49Амма Къарагь себеб яз кьейибур квачиз, тӀегъуьндик цӀукьуд агъзурни ирид виш кас кьена. 50Гьарун Мусадин кьилив Гьалтунин Алачухдин сивел хтана, вучиз лагьайтӀа тӀегъуьн амачир.
Currently Selected:
Кьурумда 16: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
