Кьурумда 13
13
Къенанда чинеба кьил акъудна чирун
(Киххьей Къанун 1:19-25)
1Ахпа халкьди Гьацерат туна ва Паран кьурумда кун кутуна.
2Реббиди Мусадиз лагьана: 3«За Исраилдин рухвайриз гузвай Къенандин чилер къекъвена чирун патал инсанар ракъура. Абурун гьар са тайифадай са регьбер тайинара».
4Мусади абур, Реббидин эмирдалди, Паран кьурумдай ракъурна. Абур Исраилдин вири рухвайрин регьберар тир. 5Ингье абурун тӀварар:
Рувенан тайифадай – Закуран хва Шамуагь;
6Шимунан тайифадай – Гьуригьан хва ШафатӀ;
7 Ягьудан тайифадай – Яфунедин хва Калеб;
8Исахаран тайифадай – Юсуфан хва Игал;
9Ифраиман тайифадай – Нунан хва Гьаши;
10Бунъяминан тайифадай – Рафудин хва ПалтӀи;
11Забулунан тайифадай – Садидин хва Гадиял;
12Юсуфан тайифадай (Манашедилай) – Сусидин хва Гадди;
13Данан тайифадай – Гемалидин хва Амиял;
14Ашеран тайифадай – Мукаилан хва Сетур;
15Нифталидин тайифадай – Вафсидин хва Нагьби;
16Гадан тайифадай – Махидин хва Геуиял.
17Мусади къекъвена чилерай кьил акъудна чириз ракъурайбурун тӀварар гьа ибур я. (Нунан хва Гьашидал лагьайтӀа Мусади Шуай тӀвар эцигнай.)
18Абур Къенандай кьил акъудна чириз ракъурдайла, Мусади лагьана: «Негевдилай яна дагъдин дуьзенрал элячӀ. 19Им гьихьтин чил ятӀа, ана авайди гьихьтин халкь ятӀа, ам зурбади яни, я тушни зайифди, адан кьадар гзаф яни, тӀимил яни килиг. 20Ада уьмуьр тухузвай чил гьихьтинди я, хъсанди яни, писди? Ада гьихьтин шегьерра уьмуьр тухузва: абур цлар галачирбур, я тушни сенгерар янавайбур яни? 21Анин накьв гьихьтинди я, бегьер гудайди яни, я туштӀа бегьер тагудайди? Ана тарар авани, авачни? ВикӀегь хьухь, а чилин няметар хкваш. Гьа гила ципицӀар чрадай девирни алукьнава».
22Абурни фена Цин кьурумдилай эгечӀна лап Лева-ГьаматӀадин патарив гвай Регьабдал къведалди чилерай кьил акъудна чирна. 23Абур Негевдиз фена ва ана Анакьанрикай тир Ахимана, Шешая ва Талмая уьмуьр тухузвай Хеврандиз атана. Хевран Мисрида авай Цагьандилай ирид йис фад эцигнавайди тир. 24Эшкал кьерез мугьман хьайила, абуру са ципицӀдин кӀунчӀ квай хел атӀана ва абурукай кьведа ам лашунихъ акална ялна. Мадни абуру чпихъ галаз анарар ва инжилар къачуна. 25И чкадиз, ана Исраилдин рухвайри атӀай ципицӀдин кулуниз килигна, Эшкал кьер тӀвар гана.
Хтайбурун суьгьбет
26ЯхцӀур йикъалай абур кьил акъудна чирунар куьтягьна элкъвена хтана.
27Абур элкъвена Паран кьурумда авай Къадешдиз Мусадин, Гьарунан ва вири Исраилдин элдин патав хтана. Хтайбуру ана абурун ва вири элдин вилик гьахъ-гьисаб гана ва и чилин майваяр къалурна. 28Абуру Мусадиз лагьана: «Чун вуна ракъурай пата хьана: ана гьакъикъатдани чиликай некни вирт хкатзава! Ингье анин майваяр. 29Амма ана уьмуьр тухузвай халкь къудрат авайди ва абурун шегьерарни сенгерар янавай ва лап чӀехибур я. Чаз ана гьатта Анакьан эвледарни акуна. 30Амалехъийри Негевда, хетийри, ябусвийри ва амарийри – дагъдин чилера, къенанвийри лагьайтӀа гьуьлуьн къерехда ва Ярдан тирвал уьмуьр тухузва». 31Калеба Мусадин вилик халкь секинарна ва лагьана: «Ша фин ва а чилер кьан, им чалай алакьда эхир».
32Амма адахъ галаз санал фейибуру лагьана: «Чавай а халкьарал вегьиз жедач – адак чи тӀем акакьдач».
33Абуру кьил акъудна чирай чил Исраилдин рухвайрин вилик русвагь ийиз лугьузвай: «Чна кьил акъудна чирай чили вичел амайбур тӀуьна куьтягьзава. Чаз ана акур вири инсанар кьакьан буйдинбур я. 34Чаз ана зурба жендекар авай пагьливанарни акуна. Анакьияр пагьливанрилай хьанвайбур я. Абурун патав чаз чун цицӀер хьиз аквазвай ва гьабурун вилерани гьахьтинбур тир».
Currently Selected:
Кьурумда 13: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
