Кьурумда 12
12
Мириамани Гьаруна Мусадал пехилвал авун
1Мириамани Гьаруна Мусадиз кушви тир папан патахъай ахмур ийизвай, вучиз лагьайтӀа ада кушвийрикай паб къачунвай. 2Абуру лугьудай: «Ребби анжах са Мусадихъ галаз раханайни кьван? Бес ам чахъ галазни раханачирни?» Реббидиз идан ван хьана.
3Муса лагьайтӀа хъуьтуьл хесетрин, чилел виридалайни хъуьтуьл кас тир.
4Садлагьана Реббиди Мусадиз, Гьаруназ ва Мириамаз лагьана: «Пудни санал Гьалтунин Алачухдал ша», – ва абур пудни экъечӀна фена.
5Ребби цифедин гулуник кваз эвичӀна. Ам Алачухдин сивел акъвазна ва Гьаруназни Мириамаз вичин кьилив эверна, ва абур кьведни вилик экъечӀна. 6И чӀавуз Ада лагьана:
«Яб це кван зи гафариз!
Куь арада Реббидин пайгъамбар аватӀа,
Зун адаз вилерикай карагзавай затӀ хьиз ачух жезва,
Адахъ галаз ахварра рахазва.
7Амма Зи лукӀ Мусадихъ галаз икӀ туш;
адаз вири Зи халкьдин юкьва вафа ава.
8Адахъ галаз Зун чин-чинал рахазва,
Ачухдиз, айгьамралди ваъ;
Адаз Реббидин къамат аквазва.
Бес квез гьикӀ кичӀе хьанач
Зи лукӀ Мусадиз ахмур ийиз?»
9Реббидиз абурукай хъел атана ва яргъаз хьана.
10Циф Алачухдал хкаж хьайила, Мириам лацу жив хьтин жузамди кӀевна. Гьарун адахъ элкъвена ва ам жузамди кьунвайди акуна. 11Ада Мусадиз лагьана: «Минет я ваз, зи агъа, чна чи ахмакьвиляй авур гунагьдай чаз жаза гумир. 12Адакай вич гьеле дидедин руфунай экъечӀайла, бедендин са пай ктӀана руг хьанвай чан аламачиз хайи куьрпедиз ухшарди ийимир».
13Мусадини Реббидиз дад-бидад авуна: «Аллагь, Ваз тавакъу хьурай, ам сагъара!» 14Амма Реббиди жаваб гана: «Адан бубади адан чиниз тфу вегьенайтӀа, ам ирид йикъан вахтунда русвагьвилик жедачирни? Ам ирид йикъан вахтуналди кундилай къерехдиз акъудрай; ахпа адавай элкъвена хквез жеда».
15Мириам ирид юкъуз кундилай къерехда туна, ва ам элкъвена хкведалди халкь рекьиз экъечӀнач.
Currently Selected:
Кьурумда 12: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
