Ягьуд 1

Саламар

1 Иса Месигьдин лукӀ ва Якьубан стха Ягьудан патай.

Аллагь Бубади эвернавай, Адаз кӀани тир ва Иса Месигьди хуьзвай вирибуруз.

2Къуй регьим, саламатвал ва муьгьуьббат артух хьурай квез.

Вири тапан муаллимрин дуван авун

(2-Петру 2:1-22)

3КӀанибур, заз чи уртах хиласвиликай квез кхьиз гзаф кӀан тир. Амма садра ва эбеди яз Аллагьдин пак халкьдал ихтибарнавай иман хуьн патал квек руьгь кутун за герек яз гьисабна. 4Вучиз лагьайтӀа куь арадиз фадлай чпин дуван авун ганвай ксар чинеба гьахьнава. И чалкечир ксари чи Аллагьдин берекат явавилер давамардай гьалал багьнадиз элкъуьрнава. Абуру чи авай-авачир сад тир Вири Ихтияррин Иеси ва Ребби Иса Месигь инкар ийизва.

5И вири крарикай квез чизватӀани, заз куь рикӀел хкиз кӀанзава хьи, Реббиди Мисридай халкь хиласна, амма ахпа Адахъ агъун тавурбур Ада тергна. 6Чпин дережа техвей ва чпи уьмуьр тухузвай чка гадарай малаикарни Ада даиман зунжурда туна, мичӀивиле, Дувандин чӀехи югъ паталди кьунва.

7Явавилизни тӀебии тушир чӀуру алакъайриз кьил ягъиз хьайи Садумдин, Гамурдин ва абурун патарив гвай шегьеррин агьалияр даиман цӀун жазадик акатун виридаз чешне я. 8Гьа саягъда и хиялкаррини чпин беденар чиркинзава, Аллагьдин агъавал кьабулзавач ва баркалла алайбурукай пис рахазва. 9Гьатта кьилин малаикрикай сад тир Мукаила иблисдихъ галаз Мусадин мейитдикай гьуьжет ийидайла, малаикди вичив иблисдик намусда эцядай жуьреда тахсир кутаз туначир. Ада анжах лагьанай: «Къуй ваз Реббиди жаза гурай». 10И инсанри лагьайтӀа, чпиз чин тийидайдал буьгьтен вегьизва; амма чпиз тӀебиатдилай атанвай хесетралди, акьул авачир гьайванри хьиз, абуру чеб тергзава.

11Гуж я абуруз хьанвайди! Вучиз лагьайтӀа абур Къабилан рекьяй физва ва, регьят къазанжи гьатунихъ къаних яз, абуру Билъама рекьелай алатна авур хьтин крар мад хъийизва, абур чпин гъулгъула себеб яз, Къарагьан#1:11 Къарагь – Исраилвияр кьурумда къекъвез гьатнавайла, Къарагь Мусадизни Гьаруназ акси яз къарагъай гъулгъуладин кьиле акъвазнай. Аллагьди адаз бала гана: Къарагь вичин терефдарарни галаз чили туькьуьмнай (кил. Кьурумда, 16-кьил). кӀеретӀ хьиз, рекьида. 12Ахьтин инсанар куь уртах суфрадал алай лекеяр я. Квехъ галаз нез-хъвазвай абур регъуьвал течидай суьруь ваъ, чеб хуьдай чубанар я. Абур гару тухузвай, марф галачир тунгъал цифер я, гьатта зулузни бегьер тегъидай, дувулни галаз акъудна кьве гъилера кьенвай тарар я. 13Абур беябурвилин каф алай гьуьлуьн пехъи лепеяр я, чпиз даим яз са зеррени экв авачир мичӀивиле авай, рехъ алатна къекъвезвай гъетер я.

14-15Гьенуха, ирид лагьай несилда Адаман эвледди, гьабурукайни пайгъамбарди хьиз виликамаз икӀ лагьанай: «Ингье, Ребби гзаф агъзурралди Вичин пак малаикар галаз виридан дуван авун патал къведа, ва абурукай чалкечир гунагькарри ягь авачир авур кьван намус галачир вири крар ва Реббидиз акси яз лагьай кьван гафар винел акъудун патал къведа». 16И ксари датӀана шикаят ийизва ва абур уьмуьрдикай къана рахазва. Абур чпин алчах ниятрин чӀалал алаз физва, абуру кьадар авачир кьван чӀагурнавай#1:16 ЧӀагурун – иер авун. ихтилатар ва хийир паталди чинал ялтах тарифар ийида.

Несигьатдин гафар

17Амма куьне, кӀанибур, чи Ребби Иса Месигьдин илчийри виликамаз лагьай гафар рикӀел хуьх. 18Абуру квез лугьудай: «Эхиримжи вахтара чин кӀеви яз ягьанатардай, чпин чалкечир ниятрин чӀалал алаз фидай инсанар пайда жеда». 19А инсанри чаравилер твазва; абур анжах чпи кьунвай къилихрин геле аваз физва, амма абуруз Аллагьдин Руьгь авач.

20Амма куьне, кӀанибур, Пак Руьгьда аваз дуьаяр ая, жуван уьмуьрдин хандакӀда пак иман эциг ва ам давамариз хьухь. 21Регьим гваз чаз эбеди уьмуьр гузвай чи Ребби Иса Месигьдал вил алаз, Аллагьдин муьгьуьббатда амукь. 22Шак ийизвайбурухъ галаз мергьемет гваз хьухь. 23Муькуьбур, цӀун юкьвай ахкъудиз, хилас ая; пуд лагьайбуруз регьим ая, амма, мукъаят яз, гунагькар беденди чиркиннавай гьатта партални такӀан хьухь.

Эхир

24Куьн имандилай алатуникай хуьдай ва куьн Вичин баркалладик шадбур ва рехне квачирбур яз кутадай къуват авайдаз, 25сад Аллагьдиз, чи Ребби Иса Месигьдин куьмекдалди чи Хиласкар тирдаз шукур, зурбавал, къуват ва гьукум хьурай – вахтарин эвел алукьдалдини, къенин юкъузни ва амай вири асиррани! Амин.

Currently Selected:

Ягьуд 1: ЛезПК

Highlight

Copy