Римвийриз 1

Саламар

1-2 Иса Месигьдин лукӀ, Адан илчи яз эвернавайди ва Каламра пайгъамбаррин куьмекдалди виликамаз хиве кьур Аллагьдин Шад Хабардикай муштулухар гузвайди яз хкянавай Павелан патай. 3И хабар чи Ребби Иса Месигьдикай я. Ам бедендалди Давуд пачагьдин эвлед тир, 4амма, кьейидалай кьулухъ Адал чан хкуналди, Руьгьдин паквилив кьурвал, Аллагьди Вичин чӀехи къудратдалди Ам Вичин Хва тирди къалурнай. 5-6Вири халкьарикай тир инсанар, абурухъ галаз санал Иса Месигьди эвернавай куьнни имандиз Адан ТӀварцӀин гьуьрметдай муьтӀуьгъун патал, Аллагьдин Хцин куьмекдалди чав берекат ва илчивал агакьна. 7За Аллагьдиз кӀан хьанвай ва чпиз Адаз талукьбур хьун патал эвернавай вири римвийриз кхьизва. Чи Буба Аллагьдин ва Ребби Иса Месигьдин патай берекат ва саламатвал хьурай квез!

Павелаз Римдиз физ кӀан хьун

8Эвелни-эвел за Иса Месигьдин ТӀварцелди куь виридан гьакъиндай Аллагьдиз шукур ийизва, вучиз лагьайтӀа куь имандикай вири дуьньядиз чизва. 9Аллагьдин Хцикай Шад Хабардикай муштулухар гуз, за Вичиз вири рикӀелди къуллугъзавай Аллагь за датӀана куьн рикӀел хкизвайвилин шагьид хьурай. 10За жуван дуьайра завай эхирни куь патав, Аллагьди гайитӀа, къвез хьун паталай датӀана тӀалабзава. 11Аллагьди куьн мягькемарун патал, заз куьн акваз ва Руьгьди гайи паяр квехъ галаз пайиз гзаф кӀанзава. 12Яни чавай садавай сад жуван имандалди, куь ва зи имандалди, кӀубанариз жедайвал ийиз кӀанзава. 13Заз куьн са хабарни авачиз таз кӀанзавач, зун гзаф гъилера куь патав къвез алахънай, амма икьван чӀавалди датӀана заз са куь ятӀани манийвал гузвай. Заз, маса халкьарин арада хьиз, куь арадани жува ийизвай къуллугъдин майва акваз кӀанзава. 14Меденивал авайбурун виликни, авачирбурун виликни, савад авайбурун ва авамбурун виликни зал бурж ала. 15Гьавиляй зун Римда авай квезни Шад Хабардикай муштулух гунихъ къаних я.

Шад Хабар – Аллагьдин къуват

16Заз Шад Хабардикай регъуь туш, вучиз лагьайтӀа ам имандал атай гьар сад патал, эвелни-эвел чувуд, ахпани муькуьди хилас хьун патал Аллагьдин къуват я. 17Аллагьдин вилик чавай чун имандалди, анжах са имандалди, «Гьахъ-михьиди имандалди чан алаз жеда»#Гьабакьукь 2:4. кхьенвайвал, гьахъ-михьивилиз акъудиз жедайди Шад Хабарда ачух жезва.

Инсаниятдин тахсир

18Писвилелди гьакъикъатдиз кӀур гузвай инсанрин гьар са чалкечирвилел ва батӀулвилел цаварилай Аллагьдин хъел ахъа жезва. 19Аллагьдикай вуч чир хьана кӀан ятӀа, и ксариз чизва, вучиз лагьайтӀа ам абуруз Аллагьди къалурнава. 20Дуьнья халкь авурдалай инихъ Аллагьдин таквадай хесетар – Адан эбеди къуват ва Илагьи тӀебиат Ада халкьнавай затӀариз килигайла ачухдаказ кьатӀуз хьун мумкин я. Гьавиляй инсанриз гъил къахчун къвезвач, 21абуруз Аллагьдикай чизвайтӀани, абуру Адаз Аллагьдиз хьиз шукурар ва Адан тарифар авунач, амма абур герек авачир фикирар ийиз хьана, абурун акьул авачир рикӀер мичӀивиле гьатна. 22Камал къалуриз кӀанз, абур ахмакь хьана, 23Мидаим Аллагьдин баркалла абуру мидаим тушир инсанриз, къушариз, кьуд кӀвач квай гьайванриз ва чурчулриз ухшар къаматралди дегишарна.

24Гьавиляй Аллагьди абур чпин рикӀерин гьашер гьевесрин хура туналди абуру чиркинвилелди чпин беденар абурдай вегьидайвал авуна. 25И инсанри гьакъикъи Аллагь тапан кӀалубдалди эвезна, туькӀуьрнавай затӀуниз икрамиз ва къуллугъиз хьана, Халикьдиз ваъ. Адаз эбеди яз шукур хьурай. Амин.

26Гьавиляй Аллагьди абур чпин айиб гьевесрин хура туна, нетижада абурун папари итимрихъ галаз жедай тӀебии алакъаяр тӀебии туширбуралди – сад садахъ галаз хьуналди эвезна. 27Гьа саягъда итимрини папарихъ галаз жедай тӀебии алакъаяр кьатӀ авуналди, сад садахъ галаз хьунин тӀебии тушир алакъаяр гьевесралди къизгъинариз хьана. Итимри итимрихъ галаз айиб крар ийизва ва абурай чпин бедендалди лайих жаза чпив агакьзава.

28 Аллагь кьатӀун абуру герек авачир кар яз гьисабнаваз хьайила, Аллагьди абур чпин чӀур хьанвай акьулрин хура туна, а акьулди чӀуру крар авуниз рехъ гана. 29Абур гьар жуьредин батӀулвилив, писвилив, мискьивилив, рехнейрив, пехилвилив, масадан иви экъичиз ва къалмакъал акъудиз кӀан хьунив, тапаррив, фендигарвилив, фитнейрив ацӀанва. 30Абур гъибетзавайбур я, абуруз Аллагь такӀан я, абурухъ ягь авач, абур лавгъабур я, фурсухъанар я, пис крара амалдар я, диде-бубайриз муьтӀуьгъбур туш; 31абурухъ я акьул, я ихтибар, я муьгьуьббат, я регьим авач. 32Абуруз Аллагь гьикӀ эгечӀзаватӀа чизва – ихьтин чӀуру крар ийизвай вирибур кьиникьиз лайих я, амма абуру тек са чпи гунагьар ийизвач, гьакӀни абуру акӀ ийизвай масабурун падни кьазва.

Currently Selected:

Римвийриз 1: ЛезПК

Highlight

Copy