ЭхкъечӀун 9

Вад лагьай жаза: малар терг хьун

1Реббиди Мусадиз эмир гана: «Фиръавандин кьилив алад ва адаз икӀ лагь: „Реббиди, иврийрин Аллагьди, лугьузва: ‹Зи халкь Заз икрам авун патал ахъая!› 2Ахъай тавуртӀа, абур гужуналди акъвазарайтӀа, 3чуьлда авай ви вири маларихъ – балкӀанрихъ, ламарихъ, девейрихъ, калерихъ, хперихъ ва цӀегьерихъ – Реббидин гъил галукьда: За абурал залан тӀегъуьн ракъурда! 4Амма Исраилдин рухвайрин гьайванриз Реббиди мисривийрин гьайванриз хьтин кар кьадач: Исраилдин рухвайрин гьич са гьайванни гиликьдач! 5Реббиди вахтни тайинарна: ‹Пака Реббиди вири уьлкве тирвал гьа икӀ ийида!›“».

6Пакадин юкъуз Реббиди гьакӀ авунни авуна: мисривийрин саки вири гьайванар телеф хьана, амма Исраилдин рухвайрин гьич са гьайванни гиликьнач. 7Фиръаванди икӀ ятӀа килигиз ракъурна – рикӀивайни, Исраилдин рухвайрин гьич са гьайванни телеф хьанач! Амма фиръаванди вичин терсвилер давамариз хьана: Исраилдин рухваяр ахъайначир.

Ругуд лагьай жаза: буьвелар

8Реббиди Мусадизни Гьаруназ эмир гана: «Къулай са мекве авай руьхъ кӀватӀрай ва Мусади фиръавандин вилериз аквадайвал ам вири Мисридин винел чкӀидайвал цавуз гадаррай. 9И чӀавуз вири Мисридин винел биши руг хкаж жеда ва тирвал гьам инсанрин, гьамни гьайванрин хамунин винел ирин авай буьвелар пайда жеда».

10Мусадини Гьаруна къулай гьарда са мекв руьхъ кӀватӀна ва фиръавандин вилик экъечӀна. Мусади руьхъ цавуз гадарна ва гьасятда инсанрин ва гьайванрин хамарал ирин квай буьвелар пайда хьана. 11Суьгьуьрбазривай мад Мусадихъ галаз акъажиз жезмачир: абурни, вири мисривияр хьиз, буьвелри кьунвай. 12Амма Реббиди, Мусадиз виликамаз лагьайвал, фиръавандив кӀевиз акъвазиз тазвай, ва адани сакӀани яб гузвачир.

Ирид лагьай жаза: хар къун

13Реббиди Мусадиз эмир гана: «Пака экуьнахъ фад мад фиръавандин вилик экъечӀна адаз лагь: „Реббиди, иврийрин Аллагьди, лугьузва: ‹Зи халкь ахъая – Заз къурбандар гун патал! 14И гъилера За ваз лап мусибатдин жазаяр гуда – гьам вун, гьам ви мукьуванар, гьамни вири ви халкь – вун и чилел Заз барабар са затӀни алачирдан гъавурда акьун патал! 15За гъил яргъи авуна вахъни ви халкьдихъни тӀегъуьн галукьарнайтӀа, вун чилелай терг жедай! 16Амма За вун чан алаз тада – ваз Заз авай кьван вири къуват къалурун патал, вири чилел Зи тӀвар машгьур авун патал! 17Вуна гьа виликдай хьиз вун Зи халкьдилай вине яз кьазва, ам ахъайиз кӀанзавач. 18Пака, гьа и вахтунда, За Мисридал ахьтин пис хар къурда хьи, гьич Мисри пайда хьайидалай инихъ тахьай хьтин! 19Инсанар ракъурна, жуван нехирар далдадик твах, ачух цавун кӀаник квай жуван гьар са затӀ кӀева. Ачух цавун кӀаник кумукьайбур, далдадик чуьнуьх тахьайбур – гьам инсанар, гьам гьайванар – абур вири хару яна рекьида›“».

20Фиръавандин мукьуванрикай Реббидин гафарихъай кичӀе хьайибуру чпин лукӀарни малар далдадик чуьнуьхна. 21Реббидин гафариз фикир тагана турбуру лукӀарни малар ачух цавун кӀаник туна.

22Реббиди Мусадиз эмир гана: «Гъилер цавуз хкаж – ва Мисридин чилел хар къвада. Ада вири Мисри тирвал гьам инсанар, гьам малар, гьам векьер тергда».

23Мусади кӀекӀец цавуз хкажна – ва Реббиди чилел гугрумар, хар ва цӀайлапанар ракъурна. Мисривийрин вири уьлкве харук акатна. 24Хар къвана, цӀайлапанар яна – Мисридин халкьдиз гьеле ихьтин зурба хар акурди тушир! 25Вири Мисри тирвал ачух цавун кӀаник квай гьар вуч аватӀани хару гатана, – гьам инсанар, гьам малар, гьамни векь-кьал – гьатта тарарни кваз хана. 26Анжах Гешен чилел хар къванач – ана Исраилдин рухвайри уьмуьр тухузвай.

27Фиръаванди Мусадизни Гьаруназ эверна ва абуруз лагьана: «И гъилера зун батӀул я! Ребби гьахъ я, зунни зи халкь лагьайтӀа – чун гьахъ туш! 28Реббидивай тӀалаб ая: и чпи хаф ягъиз тадай гугрумарни хар бес я! За куьн ахъайзава, алад!» 29Мусади жаваб гана: «Зун шегьердай экъечӀайла, за Ребби галайвал цавуз гъилер хкажда – гьасятда гугрумар секин жеда ва хар къун акъвазда. Им ваз чир жедайвал – чилин иеси Ребби я! 30Амма заз чизва хьи, я ваз, я ви мукьуванриз – квез гилани Ребби Аллагьдихъай кичӀезвач!»

31Кушни мух хару яна терг хьанвай, вучиз лагьайтӀа мухуни гьеле кьилер ахъайнавай, кушди цуьк акъуднавай. 32Амма къуьлни нехв хатадикай хкатна – ибур геж агакьдай техилар я.

33Фиръаван туна Муса шегьердай экъечӀна, Реббидиз гъилер хкажна – гьасятда гугрумарни хар акъваз хьана ва марфни куьтягь хьана. 34Амма фиръавандиз акуна хьи, харни гугрумар акъваз хьана ва мад вичин жуьреда давамарна: адан ва адан мукьуванрин рикӀер терс яз амай.

35Фиръаванди вичин терсвилелай гъил къачузвачир: Реббиди виликамаз Мусадилай хабар гайивал, фиръаванди Исраилдин рухваяр ахъайнач хьи ахъайнач.

Currently Selected:

ЭхкъечӀун 9: ЛезПК

Highlight

Copy