ЭхкъечӀун 7

1Реббидини адаз лагьана: «За акӀ ийида хьи, вакай фиръаван патал Аллагь хьиз жеда, ви стха Гьарунни ви пайгъамбар жеда. 2Вуна Зи тӀалабунар малумара, ви стха Гьаруна фиръавандиз ада Исраилдин рухваяр вичин уьлкведай ахъаюнин гьакъиндай лугьуда. 3Амма За фиръавандив терсвал ийиз тада. За Мисрида гзаф аламатар ва чпик хабардар ийидай лишан квай гьерекатар къалурда, 4амма фиръаванди квез яб гудач. И чӀавуз Мисридиз Зи гъилин заланвиликай хабар жеда! За Мисридай Зи халкь – Исраилдин рухваяр – къайдада аваз акъвазарна акъудда. Зи жазаяр мусибатдинбур я! 5Зи гъилин заланвилик мисривийриз Зун Ребби тирди чир жеда, – Ребби Зун я ва За Исраилдин рухваяр и уьлкведай ахкъудда».

6Реббиди гьикӀ эмир ганайтӀа, Мусадини Гьаруна гьакӀ авуна.

7Мусани Гьарун фиръавандихъ галаз рахадай чӀавуз Мусадин кьудкъад йис, Гьарунан – кьудкъанни пуд йис тир.

Гьарунан кӀекӀец гъуьлягъдиз элкъуьн

8Реббиди Мусадизни Гьаруназ лагьана: 9«Фиръаванди аламат къалурун гьаркь авурла, Гьаруназ адан вилик кӀекӀец гадра лагьана эмир це – кӀекӀец гъуьлягъдиз элкъведа».

10Мусани Гьарун фиръавандин кьилив фена ва Реббиди гьикӀ эмир ганайтӀа, гьакӀ авуна: фиръавандин ва адан мукьуванрин вилик Гьаруна вичин кӀекӀец чилел гадарна – кӀекӀец гъуьлягъдиз элкъвена.

11И чӀавуз фиръаванди вичин арифдарриз ва суьгьуьрбазриз эверна ва суьгьуьрбазрин куьмекдалди Мисридай тир а суьгьуьрбазрини гьа икӀ авуна: 12гьар сада вичин аса чилел гадарна – ва и асаяр гъуьлягъриз элкъвена. Тек са Гьарунан кӀекӀецди вири и кӀекӀецар туькьуьнна! 13Амма фиръаван вичин гафунал кӀевиз акъвазнавай: Реббиди виликамаз лагьайвал ада Мусадизни Гьаруназ яб ганач.

Сифте жаза: цин чкадал иви

14Реббиди Мусадиз лагьана: «Фиръаванди терсвал ийизва: „Зи халкь ахъайиз кӀанзавач“. 15Пакамахъ, фиръаван вацӀал фидай чӀавуз, адан вилик экъечӀ. Нилдин къерехда адан вилик акъваз, гъуьлягъдиз элкъведай кӀекӀец гъиле яхъ, 16ва фиръавандиз икӀ лагь:

„Реббиди, иврийрин Аллагьди, зун ваз икӀ лугьун патал ракъурнава: ‹Зи халкь Заз къурбандар гун патал кьурумдиз ахъая›. Амма вуна гилани яб гузвач. 17Ингье ваз Реббиди вуч лугьузватӀа: ‹Исятда ваз Ребби Зун тирди чир жеда!› За Нилдин яд зи гъиле авай кӀекӀецдалди яда ва цикай иви жеда. 18Нилда авай кьван вири гъетер рекьида, ва вацӀухъай ахьтин ни къведа хьи, мисривийривай анай ядни хъваз жедач!“»

19Реббиди Мусадиз эмирна: «Гьаруназ лагь хьи, ада Мисридин вацӀарин, Нилдин, вирерин ва цин гьавизрин винел кӀекӀец хкажрай – ва ана авай цикай иви жеда. Вири Мисри тирвал иви жеда – къванерал иви, тарарал иви!»

20Мусадини Гьаруна Реббиди гьикӀ эмир ганайтӀа, гьакӀ авуна.

Гьаруна кӀекӀец хкажна ва фиръавандин ва адан мукьуванрин вилик адалди Нилда авай яд яна ва Нилдин цикай иви хьана. 21Нилда авай кьван вири гъетер гиликьна, ва Нилдихъай ахьтин ни атана хьи, мисривийривай мад анай яд хъваз хъхьанач. Вири Мисри тирвал авайди иви тир.

22Амма чпин суьгьуьррин куьмекдалди Мисридин суьгьуьрбазрилайни гьа икӀ ийиз алакьна. Фиръавандини вичин терсвал авун давамарна: Реббиди виликамаз лагьайвал ада Мусадизни Гьаруназ яб хганач. 23Фиръаван вири и кӀвалахриз са фикирни тагана элкъвена вичин имаратдиз хъфена. 24Мисривийрини Нилдин къерехра къуяр эгъуьниз хьана, вучиз лагьайтӀа Нилдин яд мад хъваз жезмачир.

25Реббиди Нилдихъ галукьарайдалай инихъ ирид югъ алатнавай.

Currently Selected:

ЭхкъечӀун 7: ЛезПК

Highlight

Copy