Крар 28

Малта атӀадал

1Сагъ-саламатдиз гьуьлуьн къерехдиз акъатайла, чаз чун алай къураматдиз Малта лугьузвайди чир хьана. 2Къураматдин агьалийри чун лап хъсандиз кьабулна. Марф къваз эгечӀна, мекьи хьана. Абуру цӀай хъувуна, чун илифарна. 3Павела са къужахда авай кӀарасар кӀватӀна, абур цӀуз вегьиз хьана. ЦӀун чимивал гьиссна са гьинай ятӀани садлагьана акъатай гъуьлягъ Павелан гъилик ккӀана. 4Къураматдин агьалийриз Павелан гъиликай куьрс хьанвай гъуьлягъ акурла, абуру сада садаз лугьузвай:

– И кас са инсан яна кьенвайди хьунухь лазим я. Гьуьле завалдикай хилас хьанватӀани, Кьисасдин аллагьди адал чан тадач эхир.

5И чӀавуз Павела гъил юзурна, гъуьлягъ цӀуз вегьена. Гъуьлягъди адаз гьич са зиянни ганач. 6Инсанар адал вил алаз акъвазнавай. Абуру ам дакӀвада ва я садлагьана кьена ярх жеда лугьуз вил алаз гзаф вахт хьана, амма адаз затӀни тахьанвайди акурла, абуру чпин фикирар дегишарна, ам аллагь я лугьуз хьана.

7Чун акъвазнавай чка анин сердер Публусдин мулкарин мукьув гвай. Ада чун лап хъсандиз илифарна. Пуд юкъуз чун адан кӀвале хьана. 8Адан буба азарди кьуна месе авай. Адак цӀайни руфунин тӀал квай. Павела, адан патав фена, дуьа авуна, адал гъилер эцигна, ам сагъар хъувуна. 9И кардилай гуьгъуьниз къураматдал алай чеб азарри кьунвай вирибур чеб сагъ хъхьун патал адан патав къведай. 10Абуру чаз гзаф гьуьрметарнай. Чун рекье гьатиз кӀвачин хьайила, абуру рекьиз герек къведай кьван затӀаралди чун таъминарна.

Павел Римда

11Къураматдал пуд варз акъудайдалай кьулухъ чун ина кьуьд акъудай «Кьветхверар» тӀвар алай, Искендер шегьердин гимида аваз гьуьлуьз экъечӀна. 12СуьрекӀусдиз атана, гьана чун пуд юкъуз хьана. 13Анай чун Регидиз фена. Пакагьан юкъуз кьибле патан гар къарагъна, кьвед лагьай юкъуз чун ПӀутӀигьулриз акъатна. 14Чаз ана иманияр жагъана, абуру чавай чпихъ галаз са гьафтеда акъвазун тӀалабна.

Эхирни чун Римдиз атана агакьна. 15Чун къвезвайдакай ина авай стхайриз хабар авай, абур та Апидин Майданни Пуд Карвансара лугьудай чкайрал къведалди чун кьабулиз вилик атана. Павелаз а инсанар акурла, ада Аллагьдиз шукур авуна. Ам кӀубан хьана. 16Чун Римдиз гьахьайла, Павелаз кьилди, амма къаравулдин вил алаз уьмуьр тухудай ихтияр гана.

Римда Шад Хабар чукӀурун

17Пуд югъ алатайла, Павела Римдин чувудрин кьилевайбуруз вичин патав эверна. Абур кӀватӀ хьайила, ада лагьана:

– Стхаяр, за я чи халкьдиз, я чи бан-бубайрин къайдайриз акси тир гьич са карни авуначтӀани, зун Ярусалимда къазаматна, римвийрин гъиле туна. 18Абуруз, силисдал зак яна рекьидай хьтин са тахсирни квачиз акурла, зун ахъайиз кӀан хьана. 19Амма чувудар акси хьуниз килигна, зи дуван Римдин пачагьди авун тӀалабуниз зун мажбур хьана. И кар за зи халкьдик са гьихьтин ятӀани тахсир кутун патал авурди туш. 20Куьн акун патал ва квехъ галаз рахун патал къе за куьн кӀватӀни авунва. Исраилди умуд кутунвай кардихъ иман авуна лугьуз, къе зун къазаматдани тунва.

21– Ягьудатдай ви гьакъиндай чаз гьич са чарни атанач, – жаваб гана яб гузвайбуру. – Чи патав атанвай стхайрикай гьич садани чаз вакай са пис гафни лагьанач. 22Амма чаз вуна вуч лугьудатӀа гьадаз яб гуз кӀанзава, вучиз лагьайтӀа чаз а гапӀалдикай чизва, адакай вирина аксивилелди рахазва.

23Абуру чеб Павелан патав къведай югъ тайинарна. А юкъуз адан кӀвализ гзаф инсанар атана. Экуьнилай няналди Павела абуруз Аллагьдин пачагьвиликай шагьидвалзавай. Ам Мусадин Къанундикай ва пайгъамбаррин ктабрикай бине кьуна, абур Иса – Месигь тирдан чӀалахъариз алахъзавай. 24Садбур ада имандал гъана, муькуьбур адан чӀалахъ жезвачир. 25Абур са фикирдал алачиз хъфизвай.

Павела абуруз лагьана:

– Пак Руьгьди Яшай пайгъамбардин мецелди куь бубайриз хъсандиз лагьанай:

26«А халкьдин патав фена лагь:

куьне япаралди яб гуда,

амма куьн са куьнинни гъавурда гьатдач,

куьн вилералди килигда,

амма куь вилериз са затӀни аквадач.

27 А халкьдин рикӀ буьркьуь хьанва.

Абуру япар кӀевнава, вилер акьалнава.

ИкӀ туширтӀа, абурун вилериз аквадай,

япариз ван къведай, рикӀ гъавурда акьадай,

абур Захъ элкъведай.

Гьа чӀавуз за абур сагъар хъийидай»#Яшай 6:9-10..

28-29ГьакӀ хьайила, квез чир хьухь хьи, инсаният хилас хьуникай хабар Аллагьди маса халкьарал ракъурзава. Гьабуру ябни гуда.

30Римда кьунвай кӀвале Павел сагъ кьве йисуз амукьна. Ада вичин патав вуж атайтӀани кьабулдай. 31Ада Аллагьдин Пачагьлугъдикай хабар гузвай, инсанриз Ребби Иса Месигьдикай чирвилер гуз, ам лап викӀегьдиз рахазвай, адан вилик пад садани кьазвачир.

Currently Selected:

Крар 28: ЛезПК

Highlight

Copy