Крар 27

Павел Римдиз рекье гьатун

1Чун Италдиз рекье твада лагьай къарар агакьайла, Павел ва къазаматнавай са бязибур Римдин пачагьдин кьушундин эфсер тир Юлидал тапшуругъ авуна. 2Чун Адрамитдай экъечӀзавай ва Асия вилаятдин къерехра авай бандарай#27:2 Банд – порт. физвай гимида акьахна. Гими рекье гьатна. Чахъ Саланикдай тир макӀеданви АристӀарх галай. 3Пакагьан юкъуз чун Сидундив агакьна. Юли Павелав хъсандиз эгечӀзавай, гьавиляй ада Павелаз ял ягъун патал дустарин патав фидай ихтияр гана. 4Чун анай мад гьуьлуьз экъечӀна, гар чиниз ягъуниз килигна, чун Куьпридин гар авачир кефер патай яна фена. 5Киликатдилайни Памфилдилай алатна физ, чна ачух гьуьл атӀана, чун Луькиятда авай Муьра шегьердиз атана, 6ана эфсердиз Искендерандай Италдиз физвай гими жагъана. Чун эфсерди гьада акьадарна. 7Чи гими яваш-яваш вилик физ са гзаф йикъар хьана. Эхирни, чӀехи четинвилелди чун Киндасдилай алатна. Чиниз ягъизвай гару чаз гьа рехъ давамардай мумкинвал гузвачир, гьавиляй чи гими КиритӀдилай къекъуьн гана, адан гар авачир патай Салманадин пипӀ лугьудай чкадилай элячӀна фена. 8Гьуьлуьн къерехдай яна, эхирни чун Ласейдивай яргъа авачир Хъсан Бандар лугьудай чкадиз са гужуналди акъатна. 9Рекье чи гзаф вахт квахьна, гьуьлел тӀурфанар жедай бере алукьнавайвиляй гьуьлуьз экъечӀун хата тир. Гьавиляй Павела абуруз ихьтин меслят къалурна:

10– Стхаяр, заз чун мад гьуьлуьз экъечӀун хата тирди аквазва. Са чи гимини чи парар ваъ, гьакӀ чи уьмуьрни хатадик ква.

11Эфсерди Павелаз яб ганач, ада гимидин иесидини гимичийрин кьилевайда лагьайвал авуна. 12Чи гими акъвазнавай банд кьуьд акъудун патал къулайди тушир, гьакӀ хьайила инсанрин чӀехи паюни рехъ давамарун кьетӀна. Абуру, ФуйникӀдиз агакьдай мумкинвал хьайитӀа, ана кьуьд акъудда лугьуз умудзавай. ФуйникӀ КиритӀдин рагъакӀидай пата авай. Ам кефердихъни кьибледихъ гимияр фин патал ачух банд тир.

Кьибле патан гар

13Кьибле патай кьезил гар къарагъна. Гимичийриз а гару чпин рикӀик квай кар кьилиз акъудиз куьмекдай хьиз хьана. Абуру, лабар#27:13 Лабар – гими гьуьлел акъвазарун патал вичихъ яргъи зунжур галай залан къармах. хкажна, КиритӀдин къерех кьуна гими гьална. 14Са тӀимил вахт арадай фейила, КиритӀ галай патахъай къати гар акъатна, ахьтин гаруз «кефердинни рагъэкъечӀдай патан гар» лугьуда. 15Гар гимидин хура гьатна, гимидивай гаруз дурум гуз хьанач. Чун гарун басрухдиз са кьадар вахтунда аксивал ийиз алахъна, затӀ арадал татайла, чна гими гарун ихтиярда туна. 16Гьуьле авай Кавда лугьудай гъвечӀи къураматдин патавай фидайла, чаз са тӀимил вахтунда гарукай чуьнуьх жедай мумкинвал хьана. Ана гимичийри зурба азиятрик хиласай луьткве 17гимидал хкажна. Ахпа гимичийри элкъвез-элкъвез гимидилай цӀилер чӀугуна, ам мягькемарна. Яд кьери СуьртӀа лугьудай чкадал алкӀиз кичӀела, абуру кьезил лабар вегьена, гими гарув тухуз туна. 18Къати гар яргъалди давам хьуниз килигна, чун пакад юкъуз гимида авай пар гьуьлуьз гадаруниз мажбур хьана. 19Мад са йикъалай гимичийри чпин гъилералди гимидин алатарни гьуьлуьз гадарна. 20Гзаф йикъара тӀурфан давам хьанай, я рагъ, я гъетер аквазмачир. Чун хилас хьуникай чи умудар атӀана. 21Хейлин вахтунда инсанри са затӀни тӀуьнвачир. Павела къарагъна лагьана:

– Стхаяр, за авур меслятдиз яб гана КиритӀдай куьн экъечӀначиртӀа, чун и баладикни акатдачир, я чаз зиянарни жедачир. 22Амма исятда за квевай рикӀер кӀевиз кьун тӀалабзава, квекай садни рекьидач, анжах гими кукӀвар жеда. 23За Вичиз муьтӀуьгъ лукӀра хьиз къуллугъзавай Аллагьдин малаик сенфиз зи патав пайда хьана. 24«КичӀе жемир, Павел, – лагьана Ада заз. – Вун дуванханада Римдин пачагьдин вилик акъвазна кӀан жеда. Аллагьди ваз ийидай мергьемет себеб яз и гимида аваз вахъ галаз физвайбур вири сагъ яз амукьда».

25Гьавиляй викӀегь хьухь, стхаяр! Зун Аллагьди заз лагьайвал жедайдан чӀалахъ я. 26Къураматрикай садал чи гими яд кьери чкадал ацукьда.

27Им чун АдратӀик гьуьлелай физвай цӀукьуд лагьай йиф тир. Йифен кьулариз хьиз гимичийриз чун чилиз мукьва жезвай хьиз хьана. 28Абуру гьуьлуьн деринвал алцумайла, яхцӀурни цӀуд юкӀ кьван хьана. Са кьадар вахтунилай мад алцум хъувурла, къанни цӀуд юкӀ кьван хъхьана. 29Гимичийри чи гими къванерихъ галукьиз кичӀела адан кьулухъ патай кьуд лабар вегьена ва абуру югъ фад алукьрай лугьуз дуьаяр авуна. 30Гимичияр гимидай катизни алахъна, и кар кьилиз акъудун патал, абур гимидин вилик кьиляй лабар авадардай амалар ийиз, хиласдай луьткве цел авудиз алахъна. 31Павела эфсердизни аскерриз лагьана:

– И ксар гимида амукь тавуртӀа, куьн хилас хьун мумкин туш.

32Инал аскерри луьткве кутӀуннавай цӀилер турунив яна атӀана, луьткве гьуьлуьз аватна.

33Экв жедайла Павел виридал фу неъ лугьуз алахъна.

– Къе цӀукьуд югъ я куьне, са вуч ятӀани вилив хуьз, са затӀни тӀуьн тавуна, – лагьана ада. 34– Гьавиляй за квез са кӀус фу неъ лугьуз минетзава. Фу тӀуьртӀа, ада квез чан аламукьиз куьмекда. КичӀе жемир, куь кьилелай са чӀарни аватдач.

35ИкӀ лагьана, Павела фу къачуна, виридан вилик Аллагьдиз хийир-дуьа авуна, ам атӀана, нез эгечӀна. 36И карди вирибур кӀубанарна ва абурни нез эгечӀна. 37Гимида чун вири кьве вишни пудкъанни цӀуругуд кас авай. 38Инсанри тух жедалди тӀуьрдалай кьулухъ, гимида авай техил гьуьлуьз гадарна, гими кьезиларна.

39Экв хьайила, абуруз чеб гьиниз акъатнатӀа чизвачир, гимичийриз къумади кьунвай кьакьан тушир къерех авай гъвечӀи банд акуна. Чпелай алакьайтӀа, гимичийри гими кьери чкадал ацукьардай меслят авуна. 40Лабар, цӀилер атӀана, гьуьле туна, ахпа гимичийри гимидин кӀаник квай, гими тухузвай кьусуяр#27:40 Кьусу – луьткве гьалун патал герек алат. кутӀуннавай цӀилерни атӀана, кьусуйрив кӀвалахиз туна. Гару къерехдихъ тухудайвал гъвечӀи елкен хкажна. 41Гьа икӀ, гими къерехдив агакьна, къумада гьатна акъваз хьана. КӀуф къумада акӀай гими юзазмачир. Адан кьулухъ пад къати лепейри кукӀвариз хьана. 42Къазаматнавай са касдивайни катиз тежедайвал, аскерриз абур рекьиз кӀан хьана. 43Амма эфсердиз Павел хиласиз кӀанзавай, гьакӀ хьайила ада аскерар акъвазарна. Ада сирнавиз чидайбуруз, вирибурулайни вилик циз хкадарна, къерех галайвал сирнав авун эмирна. 44Амайбуруз тахтайрални гимидикай амукьай маса затӀарал алаз къерехдиз экъечӀ лагьана. Гьа икӀ вири сагъ-саламатдиз гьуьлуьн къерехдиз акъатна.

Currently Selected:

Крар 27: ЛезПК

Highlight

Copy