Крар 26

Павелан рахунар

1– Ваз дувандал жув хуьн патал рахадай ихтияр гузва, – лагьана АгърипӀа Павелаз.

Павела гъил хкажна ва вич хуьз эгечӀна:

2– АгърипӀ пачагь! Къе чувудри зак кутазвай тахсиррикай жува жув хуьн патал ийидай рахунар ви вилик акъвазна авун за бахт яз гьисабзава, 3гьадалайни артух яз, чувудрин къайдаяр ва гьуьжет алай абурун месэлаяр ваз хъсандиз чизва. ГьакӀ хьайила, заз сабурдалди яб гун тӀалабда. 4Вири чувудриз зи халкьдин арада Ярусалимда фейи зи уьмуьр жегьил чӀавалай инихъ чизва. 5Зун чи диндин виридилай кьетӀи са хел тир фарисейрик квай. Гьа икӀ зун гьа чӀавалай чизвайбурувай, абуруз кӀан хьайитӀа, и кар тестикьариз жеда. 6Ингье, къе зи дуван Аллагьди чи бубайриз гайи гафуник за умуд кутазва лугьуз ийизва. 7Юкъузни йифиз рикӀивай Аллагьдиз ибадат ийизвай чи цӀикьвед тайифадини Аллагьди хиве кьур кар кьилиз акъатуник умуд кутазва. Эхь, пачагь, гьа и са умуддиз килигна чувудри зак тахсирар кутазва. 8Куьне вучиз кьейибурал Аллагьди чан хкун жери кар тушиз гьисабзава?

9Зунни Назаретдай тир Исадин хура акъвазнавай, инсанри Адахъ иман тавун патал вири къуватар кӀватӀна кӀанда лугьуз фикирнай за. 10Ярусалимда за гьакӀни авунай. ЧӀехи хахамрин ихтиярдалди За Месигьдиз талукь инсанар къазаматра тунай. Абуруз кьиникьин жаза гудайла, зун ахьтин къарардин терефдар жедай. 11Абуруз жазаяр гун патал зун мукьвал-мукьвал синагугдай синагугдиз фенай. Зун абурув имандикай кьил къакъудиз таз алахъдай. Заз абурукай акьван хъел авай хьи, зун абур хурук кутун патал гьатта Ягьудатдин къеце патазни фидай.

12Садра гьа къаст рикӀе аваз чӀехи хахамривай тапшуругъни ихтияр къачуна, зун Шамдиз рекье гьатнай. 13Физвай рекье, нисинрихъ, эй пачагь, заз ракъинилайни хциз цӀарцӀар гузвай экв цаварай къвез акуна. Ада зун ва захъ галайбур кьуд патахъай экуь авуна. 14Чун вири чилел ярх хьайила, заз чувуд чӀалал рахадай ван атана: «Я Шаул, я Шаул, вуна Зун вучиз хурук кутазва? Аллагьдиз ийиз кӀанзавай крарин хура акъвазиз хьайитӀа, ви гьал чӀур жеда». 15«Вун вуж я, я Агъа?» – хабар кьуна за. «Зун вуна хурук кутазвай Иса я, – жаваб гана Реббиди. 16– Къарагъ, Зун вакай Заз къуллугъ ийидайди авун патал атанвайди я. За ваз исятдани ва идалай кьулухъни къалурдайдакай вун шагьидвал ийиз жеда. 17За вун чувудрикайни маса халкьарикай хуьда, ва За вун маса халкьарин патав ракъурзава. 18Абур иблисдин мичӀи пачагьлугъдай Аллагьдин экуь Пачагьлугъдиз атун патал, За абурун гунагьрилай гъил къахчун патал, абурни Аллагьдиз талукь хьун патал, За вун абурун патав ракъурзава».

19АгърипӀ пачагь, цаварай акур карагуниз зун муьтӀуьгъ тахьана амукьнач. 20ГьакӀ хьайила сифте за Шамда, ахпа Ярусалимда, ахпани Ягьудатда авай инсанриз ва гуьгъуьнлайни маса халкьарикай тирбуруз Аллагьдиз килиг, Аллагьдин рекьел ша, куьне икӀ ийидайди лайих краралди къалура лагьана. 21Гьа и кардиз килигна чувудар Аллагьдин КӀвале зун кьуна рекьиз алахънай. 22-23Амма Аллагьди къенин йикъалди заз куьмекзава. Ингье зун инал акъвазнава, за гъвечӀидалай чӀехидал къведалди виридан вилик шагьидвал ийизва: Месигьди азабар чӀугунин, Адакай кьейибурукай чан хтай сад лагьайди хьунин ва Ада Вичин халкьдизни маса халкьариз экуьникай муштулухар гунин. ИкӀ лугьуналди за анжах Мусадинни пайгъамбаррин виликамаз лагьай гафарилай артуханди лугьузвач.

24Павела вичи вич икӀ хуьзвайла, ФестӀа гьарайдалди лагьана:

– Вун кими хьанва, Павел, ви зурба чирвилери вун кими авунва!

25– Играми ФестӀ, – жаваб гана Павела, – зун кими туш, зи гафар дуьзбур ва акьул авайбур я. 26Вичихъ галаз викӀегьдиз зун рахазвай пачагьдиз за лугьузвай гафар вири чизва. За лугьузвай крар садазни таквадай са далдадик хьайибур туш. Абурукай пачагьдиз хабар хьунихъ зун агъунва. 27АгърипӀ пачагь, вун пайгъамбаррин гафарин чӀалахъ яни? Вун чӀалахъ тирди заз чизва.

28– Са куьруь вахтундилай вуна закайни месигьи ийида – лагьана АгърипӀа.

29– За анжах са вун ваъ, заз къе яб ни ганатӀа, гьабурни са куьруь ва я яргъал вахтарилай вири крара зун хьтинбур хьун патал, амма зун хьиз къазаматда тун тавун патал Аллагьдиз дуьа ийизва, – жаваб гана Павела.

30Пачагь, адахъ галаз сердер, Беренисе ва дуванханада ацукьнавай амайбурни къарагъна. 31Абур анай экъечӀна, сад садахъ галаз рахаз хьана:

– И касди ам кьиникьин жаза гуз ва я къазаматда тваз жедай са карни авунвач.

32– Ада Римдин пачагьди вичин дуван авун тӀалабначиртӀа, ам фадлай азадиз жедай, – лагьана АгърипӀа ФестӀаз.

Currently Selected:

Крар 26: ЛезПК

Highlight

Copy