2-Каринфвийриз 6
6
1Аллагьдихъ галаз санал кӀвалахзавай ксар яз чна квевай Аллагьдин берекат нетижа авачиз тун тавун тӀалабзава. 2ГьикӀ лагьайтӀа Ада лугьузва:
«Кутугай лап хъсан береда Заз ви ван хьана,
хиласдай юкъуз За куьмек гана ваз» #
Яшай 49:8. .
Ингье, исятда кутугай лап хъсан бере я; ингье къе хиласвилин югъ я.
Павела вичи Аллагьдиз къуллугъзавайди тирди къалурун
3Чна ийизвай къуллугъдиз садавайни туьгьметиз тежедайвал, чна са касдизни кӀвач галкӀидай багьна гузвач. 4Чна вири макъамра чун Аллагьдиз къуллугъзавайбур яз къалурзава: зурба сабур хьуна, бедбахтвилера, муьгьтежвиле, четинвилера, 5чун гатазвайла, зинданра твазвайла ва я пехъи хьанвай кӀеретӀдин хурук акатзавайла, четин зегьметда, ахвар авачир йифера ва каша, 6михьивиле, чирвиле, мягькемвиле, регьимвиле, Пак Руьгьда ва рикӀин сидкьидай тир муьгьуьббатда, 7гьакъикъатдин гафуна, Аллагьдин къуватда, эрчӀи ва чапла гъиле гьахъ-михьивилин яракь аваз, 8машгьурвиле ва русвагьвиле, гьам айибдин, гьамни разивилин гафар къачуз. Чун тапархъанрай кьазва, амма чун гьакъикъи я; 9чун садазни течирбурай кьазва, амма чун чизва; чун кьейибурай кьазва, амма чал чан алама, чаз инад кьазва, амма чун яна кьенвач; 10чун пашманарзава, амма чна датӀана шадвалзава; чун кесиб я, амма чна гзафбурукай девлет авайбур ийизва; чахъ затӀни авач, гьа са вахтунда чаз вири ава!
11Каринфвияр! Чна квез виридакай ачухдиз лагьанай. Чна чи вири рикӀяй квехъди къвезвай муьгьуьббат къалуриз хьанай. 12Квехъ муьгьуьббат авур рикӀер ахъа тийизвайбур чун ваъ, чахъди муьгьуьббатдивди рикӀер ахъа тийизвайбур куьн я. 13Зун квехъ галаз, жуван аялрихъ галаз хьиз, рахазва: жаваб яз куьнени куь рикӀер ахъая!
Иман авачирбурухъ галаз сад жемир
14 Иман авачирбурухъ галаз са викӀиник экечӀмир. Къанун чӀурунихъ галаз гьахъ-михьивилин уртах вуч ава кьван? Экуьнихъ мичӀивилихъ галаз 15ва я Месигьдихъ Велиярахъ галаз уртах вуч ава кьван? Иман авайдаз иман авачирдахъ галаз 16ва Аллагьдин ибадатханадиз бутрихъ галаз уртах вуч ава кьван? Чун чан алай Аллагьдин ибадатхана я, Аллагьди чакай лагьайвал:
«Зун абурун арадиз гьахьда, къекъвез жеда абурун арада.
Закай абурун Аллагь жеда, абурукайни Зи халкь жеда» #
Леви 26:11-12; Зеки 37:27. .
17Гьавиляй Реббиди мадни лугьузва:
«Абурун арадай экъечӀ
ва чара хьухь,
кягъиз тахьуй чиркиндак,
гьа чӀавуз За кьабулда куьн» #
Яшай 52:11; Зеки 20:34, 41. .
18 «Закай Буба жеда куь,
квекай жеда Зи рухваяр ва рушар, –
лугьузва Реббиди, вири дуьньядин Агъади»#2-Пачагьар 7:14..
Currently Selected:
2-Каринфвийриз 6: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
