2-Каринфвийриз 11

Павел ва тапан илчияр

1Куьне са тӀимил зи «ахмакьвал» эхнайтӀа хупӀ хъсан туширни! Са кьадар эхи хъия, минет я.

2Аллагьдин гъайрадалди#11:2 Гъайра – вич кӀан тежез, масад кӀан хьунухьин кичӀевал. за куь гьакъиндай гъайра ийизва. Куь кӀватӀал заз зи руш хьиз я; за адак авайни-авачир са Итимдин – Месигьдин лишанар кутунва, ам Месигьдин вилик са рехнени квачир свас хьиз акъвазун патал. 3Амма, Гьава амалдар гъуьлягъди алцурайвал, заз гьа саягъда куь фикирарни куьн сидкьидалди ва михьивилелди Месигьдиз бахш авуникай къерех жез кичӀезва. 4Куь патав атана сада чна Вичикай квез хабар гайи Исадикай ваъ, масадакай хабар гуз хьайитӀа, ва я квев агакьнавай Руьгь ваъ, масад агакьиз хьайитӀа, ва я куьне чавай кьабулнавай Шад Хабар ваъ, масад кьабулиз хьайитӀа, а чӀавуз ибур вири куьне лап хъсандиз эхзава. 5За жув абурулай, и «акьалтӀай чӀехи илчийрилай», са квелди ятӀани усал туш лагьана фикирзава. 6Мумкин я, зун, абур хьиз, са акьван дилавардиз рахазвач, амма захъ чирвал ава, гьар гьикӀ ятӀани, чна квез и кар виридаз аквадайвал тамамдиз къалурна.

7Белки, за, куьн хкажун патал, жув агъузаруналди гунагь авунатӀа? За квез Шад Хабардикай муштулух са гьакъини къачун тийиз гуз хьаначирни? 8Квез къуллугъ авун патал, за, маса кӀватӀалривай гьакъи къачуз, абур тараш авурдай хьанва. 9Зун куь патав гвайла ва са куьхъ ятӀани муьгьтеж тирла, зун квекай садазни пар хьаначир, вучиз лагьайтӀа вири лазим тир затӀаралди заз МакӀедандай атанвай стхайри куьмек гузвай. Зун са куьнани квез пар тежез алахъзавай, идалай кьулухъни за гьакӀ ийида. 10Месигьдин гьакъикъат зак квайвал, и карни турусди я, – зи тариф инкар ийиз алакьдай са касни вири Ахай вилаятда авач. 11Белки, куьне, заз куьн кӀан тийизвайвиляй за квел пар эцигзавач лагьана, фикирзава? Заз куьн гьикӀ кӀанзаватӀа, Аллагьдиз чизва!

12Дамахар ийиз, чеб чаз барабар яз гьисабдай багьнадихъ къекъвезвайбуруз ахьтин багьна тагун патал, за авурвал гьакӀ давамарни ийида. 13А ксар тапан илчияр я, чеб Месигьдин илчияр тирдан кьасар ийизвай тапан кӀвалахдарар я. 14Гьар гьикӀ ятӀани, им аламат жедай кар туш: иблисди вич экуьнин малаик тирдан кьасар ийизва. 15Гьавиляй адаз къуллугъзавайбуру чеб гьахъ-михьивилиз къуллугъзавайбур тирдан кьасар авунал мягьтел хьана кӀандач. Эхирда абурув, чпиз вуч лайих ятӀа, гьам агакьда.

Павелал ва адан илчивилин къуллугъдал ацалтзавай четинвилер

16За мад гъилера тикрар хъийизва: зун ахмакьдай кьамир, амма куьне икӀ ийизваз хьайила, заз, ахмакьдиз хьиз, мад са тӀимил жуван тариф ийидай ихтияр це. 17Исятда за лугьудай гафар за Реббидиз хас тирвал лугьудач. Тариф авунин уюнда зун ахмакь хьиз рахада. 18И дуьньяда гзафбуру чпин тариф ийизва, зани жуван тариф ийида. 19Куьне, лагьайтӀа, чӀехи лезетдалди ахмакьар эхзава, куьн гьахьтин акьул авайбур я! 20Куьне куьн лукӀвилик кутазвайбур ва куь жибиндай незвайбур, квез гъиляй къвезвай вуч хьайитӀани ийизвайбур, куь вилик лавгъавал ийизвайбур ва куь чиниз лапӀаш вегьизвайбур эхзава. 21Жуваз регъуь жедай кар ятӀани, лугьун: квез гьакӀ ийидай викӀегьвал чаз бес хьанач!

Амма абуру квелди дамахардай викӀегьвал авуртӀани, завайни жуван тарифар-дамахардай викӀегьвал ийиз жеда. Зун гьеле мад, ахмакь хьиз, рахазва. 22Абур чувудар яни? Зунни я. Абур исраилвияр яни? Зунни я. Абур Ибрагьиман эвледар яни? Зунни я! 23Абур Месигьдиз къуллугъзавайбур яни? ИкӀ лугьун ахмакь кар ятӀани, за Месигьдиз абурулай генани гзаф къуллугъ ийизва! За зегьмет гзаф чӀугуна, зун абурулай гзаф гъилера зинданра тваз хьана, абурулай гзаф гатаз хьана, ажалдин сергьятдал зун садрани кьведра хьанач. 24Чувудри вад гъилера заз гьар чӀавуз яхцӀурдакай сад кимиз къамчидал ягъунин жаза гана. 25Пуд гъилера зун тӀваларалди гатана, са гъилера заз къван гана, пуд гъилера зун гимидин кьилел атай хасаратвилик акатна, гьа чӀавуз садра за михьиз са югъни са йиф гьуьле акъудна. 26Зун мукьвал-мукьвал сиягьат авуниз мажбур жезва. ВацӀарилай элячӀдайла, зун хатавилик акатна, къачагъри, зи халкьдикай тирбуру, маса халкьарикай тирбуру, арадал гъайи хатавилерик акатна; зун шегьерда, кьурумда, гьуьлел хатавилера хьана, тапан стхайри арадал гъайи хатавилера хьана. 27За гьалдай фидалди зегьмет чӀугуна, зун мукьвал-мукьвал ахвар авачиз, кашни гьарарат эхиз, недай затӀ авачиз, къай эхиз, алукӀдай затӀ авачиз хьана. 28Ибурулай гъейри, зал гьар юкъуз вири кӀватӀалрин къайгъу чӀугунни илитӀ жезва. 29Са вуж ятӀани зайиф жезва – зун зайиф жезвачни бес? Са вуж ятӀани гунагьдик акатзава – адахъ зи рикӀ кузвачни бес?

30За дамахар авун герек ятӀа, жув квелди зайиф ятӀа, заз гьадал дамахариз кӀанзава. 31За таб тийизвайди Ребби Исадин Бубадиз ва Аллагьдиз чизва. Адаз даим яз шукур хьурай.

32АретӀ пачагьди Шамда тайинарнавай гьакимди, зун кьун патал, шегьердал къаравулвал тухун эмирна. 33Амма зун зинбилда аваз шегьердин цла авай текӀвендай агъуз авудна, гьа икӀ зун хилас хьана.

Currently Selected:

2-Каринфвийриз 11: ЛезПК

Highlight

Copy