2-Каринфвийриз 10

Павела вичин къуллугъдин пад хуьн

1Зун, Павел, куь патав гвайла куьне лагьай кьван «ажузди», квевай яргъа авайла куьне лагьай кьван «викӀегьди», исятда Месигьдин муьтӀуьгъвиле ва милайимвиле аваз квехъ элкъвена рахазва. 2Квез минет хьуй, зун куь патав гвайла, чна чи уьмуьр инсанриз хас тир са гьихьтин ятӀани ниятар аваз тухузва лугьудайбурухъ галаз зун викӀегь ва кьетӀи хьуниз мажбур ийимир. 3Чна и дуьньяда уьмуьр тухузватӀани, чна, и дуьньяди дяве тухудайвал, дяве ийизвач. 4Чна зайиф касдин яракь гваз ваъ, Аллагьди ганвай къуват авай яракь гваз женг чӀугвазва. И яракьдалди чна руьгьдин къелеяр чукӀурзава. Чна инсанрин фикиррин кӀалубар чукӀурзава, 5ва Аллагь кьатӀуниз акси яз лавгъавилелди эцигзавай вири манийвилерин кӀан цавалзава. Гьар са фикир Месигьдин чӀалаз килигуниз муьтӀуьгъ хьун патал, чна а фикирар есирда кьазва. 6Куьн чӀалаз килигун тамамди хьунни кумаз, чун са ни ятӀани чӀалаз килиг тавуниз жаза гуз гьазур жеда.

7Вуч аватӀа, куьн гьадаз килиг. Вич Месигьдиз талукь тирдахъ агъунвайда, вич хьиз чунни Месигьдиз талукь тирдакай фикир авурай. 8Реббиди чаз куьн чукӀурун паталди ваъ, куьн мягькемарун паталди ганвай гьукумдал за мадни гзаф дамахар ийиз хьанайтӀани, заз регъуь жедачир.

9Заз жуван чараралди квек анжах кичӀ кутаз кӀанзава лагьана садани фикир тавурай. 10Захъ чарара гзаф таъсир ва къуват ава, амма жув куь патав гвайла, зун зайиф я, зи гафарни са акьван метлеб авачирбур я лугьузва. 11Къуй акӀ лугьузвайбуру фикиррай хьи, чун чарара, куь патав гвачирла, гьихьтинбур ятӀа, крарани чун, куь юкьва аваз, гьахьтинбур жеда.

12Квекай чпи чеб хкаждайбуруз чаз ухшар жез ва я чаз чун ахьтинбурув гекъигизни кӀанзавач. Амма чеб чпихъ галаз гекъиг авуналди ва тешпигь авуналди, абур са куьнин гъавурдани авач. 13Чаз лагьайтӀа жуван метлеб авайдалай артух чӀехи тийиз, амма жуван ихтиярар чаз Аллагьди ганвай сергьятра аваз хуьз кӀанзава, иник чна куь арада тухузвай кӀвалахни акатзава. 14ГьикӀ лагьайтӀа чун и сергьятрай экъечӀзавач, чун куь патав атаначиртӀа, икӀ тахьунни мумкин тир, амма чун гьакъикъатда квез Месигьдикай Шад Хабар гъайи сифтегьанбур я. 15Чна масадан зегьметар жуванбур я лугьуз дамахар ийизвач. Амма чна куь иман чӀехи жеда ва идахъ галаз сад яз куь арада чи кӀвалахдин сергьятарни гегьенш жеда лагьана умуд кутазва. 16А чӀавуз чавай мадни яргъаз физ жеда ва ана чун Шад Хабар чукӀуриз жеда, чун, са бязибур хьиз, чпин сергьятра масадбуру авунвай крарал дамахариз жедач. 17Каламда кхьенвайвал, «дамахар ийизвайда Реббидал дамах авурай»#Ермиягь 9:24.. 18ГьикӀ лагьайтӀа хушдиз кьабул авуниз вичи вичин тариф ийизвайди ваъ, нин тариф Реббиди ийизватӀа, гьам лайих я.

Currently Selected:

2-Каринфвийриз 10: ЛезПК

Highlight

Copy