1-Саланиквийриз 2

Павела ва адан юлдашри Саланикда къуллугъ авун

1Стхаяр-вахар, чун куь патав атун гьаваян кар туширди квез чизва. 2Квез чизвайвал, чал ФилипӀра гзаф азабар ва русвагьвилер акьалтна, амма, къати аксивилеризни килиг тавуна, чаз чи Аллагьди квез Вичин Шад Хабардикай лугьудай викӀегьвал гана. 3Чи эвер гуна я таб, я кьацӀай къастар авач, чун куьн алцурарун патални алахъзавач. 4Акси яз, чун Аллагьди синагъ авунвай ва чпел Шад Хабардикай лугьун ихтибарнавай ксар хьиз рахазва. Чна инсанриз ваъ, чи рикӀер синагъзавай Аллагьдиз кӀандайвал авунихъ ялзава. 5Квез чизвайвал, чна садрани чинал тариф авурди туш ва темягькарвилин къастаралди амалар авунач, и кардин шагьид Аллагь я; 6чаз инсанрин вилик машгьурвал герек туш: я куь вилик, я са нин ятӀани масадан.

7 Месигьдин илчияр хьуналди, чавай къвез чи гьукум къалуриз жедай, амма, акси яз, чун хур гузвай диде вичин бицӀекрихъ гелкъведай жуьреда квехъ галаз милайим хьана. 8Чаз куьн акьван кӀевидаказ кӀан хьана хьи, чун квехъ галаз тек са Шад Хабар ваъ, гьакӀни чи уьмуьр пайиз гьазур тир – гьакьван куьн чаз багьа хьана. 9Куь арада Аллагьдилай атанвай Шад Хабар вяз ийидайла, квекай садални гуж акъалт тавун патал чна йифиз-юкъуз гьалдай фидалди гьикӀ зегьмет чӀугунатӀа, куь рикӀел алама, стхаяр-вахар.

10Квехъ, яни иманийрихъ галаз чна чун михьидаказ, гьахъдаказ ва айиб текъведайвал тухвайвилин шагьидар куьнни Аллагь я. 11Квез чизвайвал, чна квехъ гьар садахъ галаз бубади вичин аялрихъ галаз ийидай хьтин рафтарвал авуна: 12квек руьгь кутаз, чӀалал гъиз хьана, Вичин Пачагьлугъдиз ва Вичин баркалладик атуниз эверзавай Аллагьдин вилик куьне лайих тир уьмуьрдалди кьил хуьн патал квез дад-бидадиз хьана.

13Чна датӀана Аллагьдиз а кардай шукур ийизва хьи, куьне чавай ван хьайи Аллагьдин Гаф кьабулдайла, ам инсанри туькӀуьрнавай гаф хьиз ваъ, ам гьихьтинди ятӀа, гьахьтинди яз – Аллагьдин Гаф яз, иман авай куь рикӀера зурбадаказ гьерекат твазвай къуват яз кьабулна. 14-15Куьне, стхаяр-вахар, Ягьудатда авай ва чеб Иса Месигьдихъ иманийрин кӀватӀалрилай – Аллагьдин кӀватӀалрилай чешне къачуна. А кӀватӀалриз Ребби Исани пайгъамбарар яна кьейи ва чун чукурай чувудрин патай акур хьтин дарвилер куь уьлкведин агьалийрин патай квезни акуна. Абуру Аллагьдиз кӀандайвал ийизвач ва амай вири инсанриз душманвал ийизва. 16Чаз, халкьар хилас авун патал, абурухъ галаз рахаз вугузвач. Гьа идалди абуру датӀана чпин гунагьрин кьадардал мад гунагьар хкин хъийизва, амма Аллагьдин хъел эхирни абурув агакьна.

17Стхаяр-вахар, са кьадар вахтунда чун квевай къакъатнавай, бедендалди къакъатнавай, амма рикӀелди ваъ. Чна куьн акун патал вири мумкинвилер кардик кутазвай. 18Чаз куь патав къвез кӀанзавай, зун, Павел, акӀ ийиз са шумудра алахънай, амма иблисди чаз рехъ ганачир. 19Чи Ребби Исадин вилик Ам хкведай юкъуз чи умуддин, чи шадвилин, чи тарифрин таж куьнни жедачни кьван?! 20Вучиз лагьайтӀа куьн чи баркалла ва шадвал я!

Currently Selected:

1-Саланиквийриз 2: ЛезПК

Highlight

Copy