1-Петру 1

Саламар

1 Иса Месигьдин илчи Петрудин патай ПӀунтӀасда, ГалатӀда, Кападукда, Асия вилаятда ва Битинда чкӀанвай къурабайриз, 2Аллагь Бубадин къастуналди, Руьгьдалди пак авуналди, Иса Месигьдиз табий хьун патал ва Адан Ивидалди михьи хьун патал хкянавайбуруз. Берекатни саламатвал артух хьурай квез.

Чан алай умуд

3Аллагьдиз, Чи Ребби Иса Месигьдин Бубадиз, шукур хьурай. Ада Вичин чӀехи регьимдалди, Иса Месигьдал кьейидалай кьулухъ чан хкуналди, чаз чан алай умуд гана ва чун цӀийи кьилелай дуьньядиз хкана. 4Ада чаз терг тежедай, чиркин тавунвай ва шуьткьуьн тийидай ирс гана. Ам куьн паталди цаварал хуьзва. 5Аллагьдин къуватди куь имандин куьмекдалди вахтарин эхирда атана акъатиз гьазур тир хиласвал патал куьнни хуьзва.

6-7Гьавиляй, исятда са кьадар вахтунда чи имандин гьакъикъивал къалурун патал квел жуьреба-жуьре синагъра азабар ацалтзаватӀани, гьа хиласвал гъидай йикъал шад хьухь, – иман къизилдилайни багьа я; къизил, цӀалди синагъ ийизватӀани, эбеди туш, – гьа икӀ иманди Иса Месигь пайда хьайи чӀавуз квез аферин, баркалла, гьуьрмет гъида. 8Квез Ам акунвач, амма квез Ам кӀанзава, ва гилани, ам акун тавуртӀани, куьне Адахъ иман ийизва. Адахъ иман авуна, гафаралди лугьуз тежедай баркалла галай шадвилелди хвешивалзава. 9Вучиз лагьайтӀа, куь мурад тир жуван чанарин хиласвилив куьн имандалди агакьзава.

10Квев агакьиз гьазур берекатдикай лагьай пайгъамбаррин къекъуьнар ва алахъунар и хиласвилиз бахшнай. 11Абур, чпик квай Месигьдин Руьгьди гьи вахтуникай ва гьи гьаларикай лугьузватӀа, гьадан гъавурда акьаз алахъзавай. Руьгьди, лагьайтӀа, Месигьдиз виликамаз азабар кхьенвайвиликай ва абур алатайдалай гуьгъуьниз къведай баркалладикай виликамаз шагьидвал ийизвай. 12Пайгъамбарвилер ийизвайла, абуру чпи чпиз ваъ, квез къуллугъ ийизвайди абуруз Аллагьди малумарна. Цаварилай ракъурнавай Пак Руьгьдин къуватдалди Шад Хабар гайибурун мецеривди гила квез хабар ганва. Малаикарни и сирдин суракьда гьатнава.

Пак хьухь

13Гьавиляй куьне куь акьул кардик экечӀдайвал ая ва жув-жувал алаз хьухь. Иса Месигь атай чӀавуз квез гудай берекатдик тамамдиз умуд кваз хьухь. 14ЧӀалаз килигдай аялри хьиз, Шад Хабардикай квез са ванни тахьанвай чӀавуз авур чӀуру крар ийиз кӀан хьуникай яргъаз хьухь. 15Куьне вуч ийиз хьайитӀани, вири крара, квез Эверайди хьиз, пак хьухь, 16гьикӀ лагьайтӀа кхьенва: «Пак хьухь, вучиз лагьайтӀа Зун пак я»#Леви 19:2..

17Куьне садан падни хуьн тавуна гьар са касдин дуван ийизвай Аллагьдиз Буба лугьуз эверзаватӀа, куьне квез чилел ганвай уьмуьр Аллагьдихъай кичӀе яз кьилиз акъуда. 18-19Куьне, куь бан-бубайри хьиз, са манани авачиз, тухузвай уьмуьрдивай куьн къахчунай. Куьн гимиш ва я къизил хьтин терг жедай затӀар гана ваъ, михьи ва рехне квачир кӀел хьтин Месигьдин Иви гана ахьтин уьмуьрдивай къахчурди квез чизва эхир! 20Ам гьеле дуьнья халкь ийидалди вилик тайин авунай, амма куь хатурдай Ам вахтарин эхирдай атана. 21Месигьдин куьмекдалди Вичел кьейидалай кьулухъ чан хкай ва, куьне Аллагьдихъ иман авун патал ва куьне Адак умуд кутун патал, Месигь машгьур авур Аллагьдихъ куьне иман ийизва.

22Жуван стхаяр-вахар рикӀин сидкьидай кӀан хьун патал, куьне куь руьгьер гьакъикъатдин чӀалаз килигуналди михьи авуна. Гьа саягъда садаз сад вири рикӀелди кӀан хьухь! 23КтӀидай тумуникай ваъ, ктӀин тийидай, чан алай ва датӀана авай Аллагьдин Гафуникай куьн цӀийи кьилелай ханва, 24вучиз лагьайтӀа кхьенва:

«вири инсанар векьер хьиз я,

абурун вири баркалла чуьлдин цуьквер хьиз я.

Векьер кьурада, цуьквер авахьда,

25 амма гафар Реббидин эбеди яз амукьда» # Яшай 40:6-8. .

Ибур квез муштулух яз гузвай Шад Хабарда авай гафар я.

Currently Selected:

1-Петру 1: ЛезПК

Highlight

Copy