MGA SALMO 132
132
Pangamuyo nga Pakamaayohon ang Santuario
Ambahanon sa mga Pagtaklad.
1O Ginoo, dumduma tungud kay David,
ang bug-os niya nga kapipit-an;
2kon daw ano nga nagsumpa sia sa Ginoo
kag nagsaad sa Makagagahum ni Jacob,
3“Indi ako magsulud sa kayangkayang sang akon balay
ukon magsaka sa akon higdaan;
4indi ko paghatagan sing katologon ang akon mga mata
ukon sing katuyo ang akon mga ilalakub,
5tubtub nga makakita ako sing duug nga sa Ginoo,
isa ka kayangkayang nga sa Makagahum ni Jacob.”
6Yari karon, nakabati kami sini sa Efrata,
nakita namon ini sa latagon sang kakahoyan.
7“Magasulud kami sa iya mga kayangkayang;
magasimba kami sa iya palatungan!”
8Tindug, O Ginoo, pasulud sa imo palahuwayan,
ikaw kag ang kaban sang imo kusug.
9Ang imo mga sacerdote papanaptan sing pagkamatarung,
kag ang imo mga balaan magsinggit sa kalipay.
10Tungud kay David nga imo alagad
indi pag-isikway ang nawung sang imo hinaplas.#2 Cron. 6:31-42.
11Ang Ginoo nagsumpa kay David sa kamatooran
nga sia indi magtalikod sa sini:
“Gikan sa bunga sang imo lawas
magapahamtang ako sa imo trono.#2 Sam. 7:12; 1 Cron. 17:11-14; Sal. 89:3-4; Binu. 2:30.
12Kon ang imo mga anak magbantay sang akon katipan
kag sang akon pagpamatuud nga itudlo ko sa ila,
ang ila mga anak man magalingkod
sa imo trono sa gihapon.”
13Kay ginpili sang Ginoo ang Sion;
ginhandum niya ini nga iya puluy-an:
14“Ini akon palahuwayan sa gihapon;
diri magapuyo ako, kay ginhandum ko ini.
15Pakamaayohon ko sing bugana ang iya kalan-on;
busgon ko sing kalan-on ang iya imol.
16Ang iya mga sacerdote man panaptan ko sing kaluwasan,
kag ang iya mga balaan magasinggit sing mabaskug sa kalipay.
17Didto pasalingsingon ko ang sungay ni David;
nagtangdo ako sing suga nga sa akon hinaplas.#1 Hari 11:36.
18Panaptan ko ang iya mga kaaway sing kahuya,
apang sa iya kaugalingon magalambo ang iya purungpurung.”
Currently Selected:
MGA SALMO 132: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
