MGA SALMO 115
115
Ang Dios kag ang mga Diosdios
1Indi sa amon, O Ginoo, indi sa amon,
kondi sa imo ngalan ihatag ang himaya,
tungud sa imo malig-on nga paghigugma kag tungud sa imo kamatooran!
2Ngaa bala nga magsiling ang mga pungsud,
“Diin na bala karon ang ila Dios?”
3Apang ang amon Dios yara sa mga langit;
naghimo sia sang bisan ano nga nahamut-an niya.
4Ang ila mga diosdios mga pilak kag bulawan,
buhat sang mga kamut sang mga tawo.
5May mga baba sila, apang wala nagahambal;
may mga mata sila, apang indi makakita.
6May mga dulunggan sila, apang indi makabati;
may mga ilong sila, apang indi makapanimaho.
7May mga kamut sila, apang indi makauyat;
may mga tiil sila, apang indi makalakat;
kag wala sila nagahambal paagi sa ila totonlan.
8Ang mga nagahimo sa ila manginkaangay sa ila;
amo man ang tagsatagsa nga nagasalig sa ila.#Sal. 135:15-18; Bug. 9:20.
9O Israel, salig ka sa Ginoo!
Sia ila kabulig kag ila taming.
10O panimalay ni Aaron, salig kamo sa Ginoo!
Sia ila kabulig kag ila taming.
11Kamo nga nagakahadluk sa Ginoo, magsalig sa Ginoo!
Sia ila kabulig kag ila taming.
12Ang Ginoo madinumdumon sa amon; sia magapakamaayo sa amon;
sia magapakamaayo sang panimalay ni Israel;
sia magapakamaayo sang panimalay ni Aaron;
13sia magapakamaayo sa mga nagakahadluk sa Ginoo,
tingub ang magamay kag dalagku.#Bug. 11:18; 19:5.
14Padamuon kamo sang Ginoo sing labi kag labi pa,
kamo kag ang inyo mga anak!
15Pinakamaayo kamo sang Ginoo,
nga nagbuhat sang mga langit kag duta.
16Ang mga langit mga langit sang Ginoo,
apang ang duta nahatag niya sa mga anak sang mga tawo.
17Ang mga minatay wala nagadayaw sa Ginoo,
ukon ang bisan sin-o nga nagapanaug sa kalinong.
18Apang kita magapakamaayo sa Ginoo
kutub sini nga tion kag tubtub sa gihapon.
Dayawa ninyo ang Ginoo!
Currently Selected:
MGA SALMO 115: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
