MGA HULUBATON 4
4
Ang Pagkaayo sang Kaalam
1Pamatii, mga anak ko, ang pagtudlo sang isa ka amay,
kag magtalupangud sa pagkilala sing paghangup;
2kay nagahatag ako sa inyo sing maayo nga pagtolon-an:
dili ninyo pagbayai ang akon kasogoan.
3Kay ako anak sang akon amay,
linghud, nga bugtong sa itololok sang akon iloy,
4nagtudlo sia sa akon, kag nagsiling sa akon,
“Pahupti sa imo tagiposoon ang akon mga polong;
bantayi ang akon mga sogo, kag magkabuhi;
5kuha sing kaalam, kuha sing paghangup.
Dili pagkalimti, kag dili magdumili sa mga polong sang akon baba.
6Dili sia pagbayai, kag magatipig sia sa imo;
higugmaa sia, kag magabantay sia sa imo.
7Ang kaalam amo ang pamuno nga butang: Kuha sing kaalam,
kag sa bug-os mo nga pagtinguha, kuha sing paghangup.
8Pakataasa sia, kag magapauswag sia sa imo;
magadala sia sa imo sa kadungganan kon maghakus ka sa iya.
9Sia magahatag sa imo olo sing purungpurung sang bugay;
isa ka purungpurung sang katahum igatugyan niya sa imo.”
10Pamatii, O anak ko, kag batona ang akon mga ginasiling,
kag ang mga tuig sang imo kabuhi magadamu.
11Natudloan ko ikaw sa dalanon sang kaalam;
natuytuyan ko ikaw sa mga banas sang pagkatadlong.
12Kon ikaw nagalakat, indi masablagan ang imo mga tikang;
kag kon ikaw nagadalagan, indi ka makasandad.
13Kapti sing malig-on ang pagtudlo, dili sia pagbuhii;
bantayi sia, kay sia imo kabuhi.
14Dili ka magsulud sa banas sang malauton,
kag dili maglakat sa dalan sang malaut nga mga tawo.
15Likawi ini; dili ka mag-agi sa sini;
bayai ini kag magpadayon.
16Kay wala sila nagatolog kon indi sila makahimo sing malaut;
makuha ang ila katologon kon wala sila sing iban nga mapukan.
17Kay nagakaon sila sang kalan-on sang pagkamalaut
kag nagainum sang alak sang panglugus.
18Apang ang banas sang matarung subong sang nagapamanagbanag nga kapawa,
nga nagasilak sing labi kag labi tubtub sa himpit nga adlaw.
19Ang dalanon sang malauton subong sang kadudulman;
wala sila makahibalo sang ila nasandaran.
20Anak ko, talupangda ang akon mga polong;
ilingig ang imo idulungug sa akon mga ginasiling.
21Dili sila pagpahalina sa imo mga mata;
tipigi sila sa tunga sang imo tagiposoon.
22Kay sila kabuhi sa mga makakita sa ila,
kag ikaayo sa tanan nila nga unud.
23Bantayi ang imo tagiposoon sa bug-os nga kakugi;
kay sa sini nagagowa ang mga ilig sang kabuhi.
24Ipalayo sa imo ang malalison nga baba,
kag ipalayo sa imo ang balingag nga mga bibig.
25Itolok ang imo mga mata sing matadlong sa unhan,
kag itolok ang imo mga ilalakub sing matadlong sa una nimo.
26Tapana ang banas sang imo mga tiil,#Heb. 12:13.
kag palig-ona ang tanan mo nga dalanon.
27Dili ka magliso sa too nga kamut ukon sa wala;
kuhaa ang imo tiil sa malaut.
Currently Selected:
MGA HULUBATON 4: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
