MGA HULUBATON 26
26
1Subong sang nieve sa tingadlaw kag subong sang ulan sa tig-alani,
sa amo ang dungug indi angay sa buangbuang.
2Subong sang maya sa iya paglibutlibut, subong sang balinsasayaw sa iya paglupad,
sa amo ang pagpakamalaut nga wala sing kabangdanan wala sing masamputan.
3Ang tagsaon tungud sa kabayo, ang busal sa asno,
kag ang bilogon tungud sa likod sang mga buangbuang.
4Dili pagsabta ang buangbuang sono sa iya kabuangan,
basi nga ikaw man manginkaangay sa iya.
5Sabta ang buangbuang sono sa iya kabuangan,
basi nga manginmaalam sia sa iya kaugalingon nga hunahuna.
6Ang nagapadala sing balita tungud sa kamut sang buangbuang
nagautud sang iya kaugalingon nga tiil, kag nagainum sa kasamaran.
7Ang mga tiil sang piang nagakabit,
amo ini ang paanggid sa baba sang mga buangbuang.
8Subong sang isa nga nagahigot sing bato sa labyug
amo ini ang nagahatag sing kadungganan sa buangbuang.
9Subong sang tunuk nga nagasalup sa kamut sang hobog
amo ini ang paanggid sa baba sang mga buangbuang.
10Subong sang manugpana nga nagapilas sang tanan
amo ini ang nagasohol sa buangbuang kag ang nagasohol sa mga nagalabay.
11Subong sang ido nga nagabalik sa iya suka,#2 Ped. 2:22.
amo ini ang buangbuang nga nagasulitsulit sang iya kabuangan.
12Nakakita ka bala sing tawo nga maalam sa iya kaugalingon nga hunahuna?
May labi pa nga paglaum sa buangbuang sang sa iya.
13Nagasiling ang matamad, “May leon sa alagyan!
Ang leon yara sa mga dalan!”
14Subong nga ang takup sang ganhaan nagalisoliso sa iya mga bisagra,
amo ini ang ginahimo sang matamad sa iya higdaan.
15Ang matamad nagaloog sang iya kamut sa pinggan;
ginatak-an sia sa pagpabalik sini sa iya baba.
16Ang matamad maalam pa sa iya kaugalingon nga hunahuna
sang sa pito ka tawo nga makasabat sing katarungan.
17Ang nagalabay kag nagapagamo sang iya kaugalingon sa kaawayon nga indi iya
kaangay sang nagadakup sang ido sa iya mga dulunggan.
18Subong sang buang nga nagahaboy sing mga agipo,
mga baslay, kag kamatayon,
19amo ini ang tawo nga nagalimbong sa iya isigkatawo
kag nagasiling, “Wala bala ako nagahampang?”
20Sa kakulang sang gatong magapalong ang kalayo;
kag diin wala sing palalibak, nagauntat ang pagsinuay.
21Subong sang mga uling sa mga baga kag sang gatong sa kalayo,
amo ini ang tawo nga masuayon sa pagpadabdab sing kaawayon.
22Ang mga polong sang mga palalibak subong sang manamit nga mga hungit;
nagalatum sila sa nasulud gid nga mga bahin.
23Ang mga bibig nga mainiton kag ang tagiposoon nga malaut
kaangay sang suludlan nga duta nga nahalupan sing buay nga pilak.
24Ang nagadumut nagahilum sa iya mga bibig,
apang sa sulud niya nagahuput sia sing limbong;
25kon nagapamolong sia sing matahum, dili sia pagpatiha,
kay may pito ka kangil-aran sa iya tagiposoon;
26bisan ang iya dumut nagapanabon sing daya,
ang iya pagkamalaut ipakita sing dayag sa atubangan sang katilingban.
27Ang bisan sin-o nga nagakutkut sing boho maholog sa sini,
kag ang nagapaligid sing bato magapanumbalik ini sa iya.
28Ang dila nga butigon nagadumut sa ginpilasan niya,
kag ang baba nga maolog-ologon nagahikot sing kalaglagan.
Currently Selected:
MGA HULUBATON 26: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
