MGA HULUBATON 22
22
Mga Sogo kag mga Paandam
1Ang maayong ngalan pasulabihon sa pagpili sang sa dakung manggad,
kag ang mahigugmaon nga kahamuut pasulabihon sa pilak kag bulawan.
2Ang manggaranon kag ang imol nagakitaay;
ang Ginoo amo ang manughimo nila tanan.
3Ang mahalongon nga tawo nakakita sang malaut kag nagapanago sia;
apang ang kulangkulang nagapadayon, kag nagaantus tungud sini.
4Ang balus sang pagpaubus kag sang kahadluk sa Ginoo
amo ang manggad kag dungug kag kabuhi.
5Mga tunuk kag mga siod yara sa dalan sang balingag;
ang nagabantay sang iya kalag magamalayo sa ila.
6Hanasa ang bata sa dalanon nga dapat niya paglaktan,
kag bisan tigulang na sia indi sia magtalikod sa sini.
7Ang manggaranon nagagahum sa imol,
kag ang nagahulam alagad sa nagapahulam.
8Ang nagasab-ug sing kalautan magaani sing kalalat-an,
kag ang bilogon sang iya kasingkal mapaslawan.
9Ang may mata nga maalwan pakamaayohon,
kay nagahatag sia sang iya kalan-on sa imol.
10Taboga ang mayubiton, kag ang kasuayon magagowa,
ang pagbanggianay kag pagkadidungganon magauntat.
11Ang nagahigugma sang pagkaputli sang tagiposoon,
tungud sa bugay sang iya mga bibig mangin-abyan niya ang hari.
12Ang mga mata sang Ginoo nagatipig sang may ihibalo,
apang ginalaglag niya ang mga polong sang mabudhion nga tawo.
13Ang matamad nagasiling, “May leon sa gowa!
Patyon ako sa mga dalan!”
14Ang baba sang mga babayi nga makihilawason boho nga madalum;
ang ginakangil-aran sang Ginoo maholog sa sini.
15Ang kabuangan naputus sa tagiposoon sang bata,
apang ang bilogon sang pagtudlo nagapahilayo sini sa iya.
16Ang nagapigus sang imol sa pagdugang sang iya daug,
ukon ang nagahatag sa manggaranon, mawad-an lamang.
17Ilingig ang imo idulungug, kag pamatii ang mga polong sang maalam,
kag ituhoy ang imo tagiposoon sa akon ihibalo;
18kay maayo nga butang ini kon tipigan mo sila sa sulud mo,
kon mapalig-on sila sing tingub sa imo mga bibig.
19Agud nga ang imo pagsalig manginsa Ginoo,
napakilala ko sila sa imo sining adlaw, bisan sa imo.
20Wala bala ako magsulat sa imo sang maayong mga butang
sang mga laygay kag ihibalo,
21sa pagpakilala sa imo sang kalig-onan sang mga polong sang kamatooran,
agud nga makapabalik ka sing mga polong sang kamatooran sa mga nagapadala sa imo?
22Dili pagkawati ang imol, bangud nga imol sia,
kag dili pagpigusa ang napiotan sa gawang;
23kay ang Ginoo magaapin sang kasuayon nila
kag magalaglag sang kabuhi sang mga nagalaglag sa ila.
24Dili ka makig-abyan sa tawong maakigon,
kag dili ka magbuylog sa tawong masingkal,
25basi nga makatoon ka sang iya mga dalanon
kag magbutang sing siod sa imo kalag.
26Dili ka magmangin-isa sa ila nga nagadagpianay sing mga kamut,
ukon sa mga manugpasalig tungud sa mga utang.
27Kon wala ka sing ibayad,
ngaa bala nga kuhaon niya ang imo higdaan sa imo?
28Dili paghalina ang dumaan nga dulunan
nga ginbutang sang imo mga ginikanan.
29Nakakita ka bala sing tawo nga maukud sa iya buluhaton?
magatindug sia sa atubangan sang mga hari;
indi sia magtindug sa atubangan sang kubus nga mga tawo.
Currently Selected:
MGA HULUBATON 22: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
