FILIPOS 2

Ang Pagpaubus ni Cristo kag Pagbayaw sa Iya

1Gani kon may pagpalig-on kay Cristo, kon may paglipay sang paghigugma, kon may pagpakighiambit sa Espiritu, kon may kalolo kag kalooy, 2himun-i ninyo ang akon kalipay nga mag-isa kamo sing hunahuna, nga may isa ka gugma, nga may paghiusa kag isa sing hunahuna. 3Dili maghimo sang bisan ano gikan sa pagkamaiyaiyahon ukon pagpadayawdayaw, kondi sa pagpaubus magbilang sa iban nga maayo pa sa inyo kaugalingon. 4Dili magtamud ang tagsa sa inyo sa iya kaugalingon lamang nga mga butang, kondi man sa mga butang sang iban. 5Hupti ninyo ini nga hunahuna, nga yara man kay Cristo Jesus, 6nga, bisan sa dagway sia sang Dios, wala niya pagbilanga ang pagpakigtupung sa Dios nga butang nga pag-agawon, 7kondi gin-ula niya ang iya kaugalingon, nga nangindagway sang ulipon, nga natawo sa kaanggid sang mga tawo. 8Kag sang nakita sa bayhon sang tawo nagpaubus sia sang iya kaugalingon kag nanginmasinolondon tubtub sa kamatayon, bisan kamatayon sa cruz. 9Busa ginbayaw sia sang Dios sing mataas gid kag ginhatagan sia sing ngalan nga labaw sa tanan nga ngalan, 10agud nga sa ngalan ni Jesus ang tagsa ka tuhud magpilo, sa langit kag sa duta kag sa idalum sang duta, 11kag ang tagsa ka dila magtu-ad#Isa. 45:23. nga si Jesu-Cristo Ginoo, sa himaya sang Dios nga Amay.

Nagasiga subong nga mga Suga sa Kalibutan

12Busa, mga hinigugma ko, subong nga kamo nagmasinolondon sa gihapon, indi lamang sa akon atubangan, kondi karon labi pa nga wala ako sa inyo, panikasugi ang inyo kaluwasan nga may kahadluk kag pagkurug; 13kay ang Dios amo ang nagahikot sa inyo, sa pagbuut kag sa pagbuhat tungud sa iya maayong kabubut-on.

14Himoa ninyo ang tanan nga butang sa walay pagkumud ukon pagyamo, 15agud nga mangindisalawayon kamo kag walay daya, nga mga anak sang Dios nga walay kasawayan sa tunga sang kaliwatan nga tiko kag balingag,#Deut. 32:5. nga sa tunga nila nagasiga kamo subong nga mga sulu sa kalibutan, 16nga nagabayaw sang polong sang kabuhi, agud nga sa adlaw ni Cristo, magahimaya ako nga wala ako magdalagan sing walay pulus ukon magpangabudlay sing walay pulus. 17Bisan kon ako iula subong nga halad sa dolot sang inyo pagtoo nagakasadia ako kag nagakalipay kaupud ninyo tanan. 18Sa among bagay magkasadia man kamo kag magkalipay kaupud nakon.

Si Timoteo kag si Epafrodito

19Nagalaum ako kay Ginoong Jesus sa pagpadala kay Timoteo sa inyo sa indi madugay, agud nga ako lipayon sang balita nahanungud sa inyo. 20Wala ako sing tawo nga kaangay sa iya, nga magakabalaka sing matuud gid sa inyo kahimtangan. 21Sila tanan nagapangita sang ila kaugalingon nga kaayohan, indi ang iya ni Jesu-Cristo. 22Apang kamo nakahibalo sang kapuslanan ni Timoteo, kon paano nga subong nga anak upud sa amay nag-alagad sia upud sa akon sa maayong balita. 23Busa ginalauman ko nga ipadala sia sa inyo sa gilayon nga mahibal-an ko kon paano ako; 24kag nagasalig ako sa Ginoo nga ako man magakara sing madali.

25Ginkabig ko nga kinahanglan ipadala sa inyo si Epafrodito nga akon utud kag masigkamanugpangabudlay kag masigkasoldado, kag inyo manugbalita kag manughikot sang akon kinahanglan, 26kay sia ginahidlaw sa inyo tanan, kag naligban sing daku bangud nga inyo nabatian nga nagmasakit sia. 27Matuud sia nagmasakit nga diotay lang mapatay. Apang ang Dios nalooy sa iya, kag indi lamang sa iya kondi sa akon man, agud nga indi magdasundasun ang akon kasubu. 28Busa ginakabalak-an ko nga ipadala gid sia, agud nga kon makita ninyo sia liwat magakalipay kamo, kag maghaganhagan ang kasubu ko. 29Gani batona ninyo sia sa Ginoo sa bug-os nga kalipay; kag padunggan ninyo ang mga subong sa iya, 30kay tungud sa buluhaton ni Cristo diotay lang sia mapatay, nga nagapasimpalad sang iya kabuhi sa paghimuno sang inyo pag-alagad sa akon.

Currently Selected:

FILIPOS 2: ABHIL82

Highlight

Copy

Compare