NUMEROS 28
28
Mga Halad sa Matag-adlaw
(Ex. 29:38-46)
1Ang Ginoo nagpamolong kay Moises, 2“Sogoa ang katawohan sang Israel, kag isiling sa ila, ‘Ang akon halad, akon kalan-on sa akon mga dolot tungud sa kalayo, nga maamyon sa akon, hiwaton ninyo sa pagdolot sa akon sa ila nagakaigo nga panag-on.’ 3Kag isiling mo sa ila, Amo ini ang halad tungud sa kalayo nga inyo idolot sa Ginoo: mga cordero nga isa ka tuig nga wala sing kasawayan, duha sa adlawadlaw, nga dalayon nga halad-nga-sinonog. 4Ang isa ka cordero idolot mo sa aga, kag ang isa ka cordero idolot mo sa kahaponon; 5kag ang ikapulo nga bahin sang efa sang harina nga mapino nga sa halad-nga-kalan-on, nga nasamoan sang ikap-at nga bahin sang isa ka hin nga lana nga binati. 6Ini dalayon nga halad-nga-sinonog, nga gintangdo nga sa kaamyon sa Bukid nga Sinai, ang dolot tungud sa kalayo sa Ginoo. 7Ang iya halad-nga-ilimnon mangin-ikap-at nga bahin sang isa ka hin tungud sa isa ka cordero; iula mo ang halad-nga-ilimnon nga masingkal sa Ginoo sa duug nga balaan. 8Ang isa ka cordero idolot mo sa kahaponon; subong nga halad-nga-kalan-on sang kaagahon, kag sa halad-nga-ilimnon, idolot mo ini nga dolot tungud sa kalayo, nga maamyon sa Ginoo.
Mga Halad sa Inugpahuway
9“Sa adlaw nga inugpahuway duha ka cordero nga isa ka tuig nga wala sing kasawayan, kag duha ka ikapulo nga bahin sang efa sang harina nga mapino nga halad-nga-kalan-on, nga nasamoan sing lana, kag ang iya halad-nga-ilimnon: 10amo ini ang halad-nga-sinonog sang tagsa ka inugpahuway, luwas sa dalayon nga halad-nga-sinonog kag sa halad-nga-ilimnon.#Mat. 12:5.
Mga Halad sa Binulan
11“Sa mga pamuno sang inyo mga bulan magdolot kamo sing halad-nga-sinonog sa Ginoo: duha ka tinday nga baka nga lalaki, kag isa ka carnero, pito ka cordero nga isa ka tuig nga wala sing kasawayan; 12kag tatlo ka ikapulo nga bahin sang efa sang harina nga mapino nga sa halad-nga-kalan-on, nga nasamoan sing lana, sa tagsa ka tinday nga baka nga lalaki; kag duha ka ikapulo nga bahin sang harina nga mapino nga halad-nga-kalan-on, nga nasamoan sing lana, sa isa ka carnero; 13kag isa ka ikapulo nga bahin sang harina nga mapino nga nasamoan sing lana nga sa halad-nga-kalan-on sa tagsa ka cordero; nga sa halad-nga-sinonog nga maamyon, halad tungud sa kalayo sa Ginoo. 14Ang ila mga halad-nga-ilimnon mangintunga sa hin nga alak sa isa ka tinday nga baka, kag ang ikatlo nga bahin sang isa ka hin tungud sa carnero, kag ang ikap-at nga bahin sang hin tungud sa cordero; ini amo ang halad-nga-sinonog sa tagsa ka bulan sa tanan nga bulan sang tuig. 15Isa ka kanding nga lalaki nga sa halad-tungud-sa-sala sa Ginoo; ini ihalad luwas sa dalayon nga halad-nga-sinonog kag sa iya halad-nga-ilimnon.
Mga Halad sa Pascua
16“Sa nahauna nga bulan sa ikapulo kag apat nga adlaw sang bulan amo ang pascua sang Ginoo.#Ex. 12:1-13; Lev. 23:5; Deut. 16:1-2. 17Kag sa ikapulo kag lima nga adlaw sini nga bulan may piesta; sa pito ka adlaw magakaon sing tinapay nga wala sing tapay. 18Sa nahauna nga adlaw may balaan nga pagtilipon: dili kamo maghimo sing pagpangabudlay nga inalagad, 19kondi magdolot kamo sing halad tungud sa kalayo, halad-nga-sinonog sa Ginoo: duha ka tinday nga baka nga lalaki, kag isa ka carnero nga lalaki, kag pito ka cordero nga lalaki nga isa ka tuig; manginwala sing kasawayan sila sa inyo; 20ang ila halad-nga-kalan-on, harina nga mapino nga nasamoan sing lana; ang idolot ninyo tatlo ka ikapulo nga bahin sa isa ka tinday nga baka nga lalaki, kag duha ka ikapulo nga bahin sa isa ka carnero nga lalaki; 21magdolot ka sing isa ka ikapulo nga bahin sa tagsa ka cordero sang pito ka cordero; 22isa ka kanding nga lalaki nga sa halad-tungud-sa-sala, sa paghimo sing katumbasan tungud sa inyo. 23Ini sila idolot ninyo luwas sang halad-nga-sinonog sang kaagahon, nga amo ang halad-nga-sinonog nga dalayon. 24Sa sini nga bagay magdolot kamo adlawadlaw, sa pito ka adlaw, sang kalan-on sang halad tungud sa kalayo, nga maamyon sa Ginoo; idolot ini luwas sa halad-nga-sinonog nga dalayon kag sa iya halad-nga-ilimnon. 25Kag sa ikapito nga adlaw may balaan kamo nga pagtilipon; dili kamo maghimo sing bisan ano nga pagpangabudlay nga inalagad.#Ex. 12:14-20; 23:15; 34:18; Lev. 23:6-8; Deut. 16:3-8.
Mga Halad sa Piesta sang mga Semana
26“Sa adlaw man sang nahauna nga mga bunga, kon magdolot kamo sing bag-o nga halad-nga-kalan-on sa Ginoo sa inyo piesta sang mga semana, may balaan nga pagtilipon kamo; dili kamo maghimo sing pagpangabudlay nga inalagad, 27kondi magdolot kamo sing halad-nga-sinonog nga maamyon sa Ginoo: duha ka tinday nga baka nga lalaki, isa ka carnero, pito ka cordero nga isa ka tuig; 28ang ila halad-nga-kalan-on harina nga mapino nga nasamoan sing lana, tatlo ka ikapulo nga bahin sa tagsa ka tinday nga baka, duha ka ikapulo nga bahin sa isa ka carnero nga lalaki, 29isa ka ikapulo nga bahin sa tagsa ka cordero sang pito ka cordero; 30isa ka kanding nga lalaki, sa paghimo sing katumbasan tungud sa inyo. 31Idolot ninyo sila luwas sa halad-nga-sinonog nga dalayon, kag sa iya halad-nga-kalan-on, kag sa ila mga halad-nga-ilimnon. Manginwala sing kasawayan sila sa inyo.#Ex. 23:16; 34:22; Lev. 23:15-21; Deut. 16:9-12.
Currently Selected:
NUMEROS 28: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
