NUMEROS 24
24
1Sang nakita ni Balaam nga nagpahamuut sa Ginoo ang pagpakamaayo sang Israel, wala sia magkadto, subong sang iban nga mga tion, sa pagpakigkita sa mga babaylan, kondi ginpadolong niya ang iya nawung nayon sa kamingawan. 2Kag ginbayaw ni Balaam ang iya mga mata, kag nakita niya ang Israel nga nagapuyo sono sa ila mga kabikahan. Kag ang Espiritu sang Dios nag-abut sa iya, 3kag naggamit sia sang iya paanggid, kag nagsiling,
“Si Balaam nga anak ni Beor nagasiling,
ang lalaki nga ang iya mga mata namuklat nagasiling,
4nagasiling ang nagapamati sang mga polong sang Dios,
ang nagatan-aw sang palanan-awon sang Makaako,
nga nagayaub, kag nagamuklat ang iya mga mata:
5daw ano katahum sang imo mga layanglayang, O Jacob,
sang imo mga kayangkayang, O Israel!
6Subong sang mga nalupyakan nahumlad sila,
subong sang mga katamnan sa luyo sang suba,
subong sang mga linaloes nga gintanum sang Ginoo,
subong sang mga cedro sa luyo sang mga tubig.
7Sa iya mga timba magailig ang tubig,
kag ang iya binhi manginsa madamu nga mga tubig,
ang iya hari manginlabi pa kataas kay Agag,
kag ang iya ginharian pataason.
8Ginapagowa sia sang Dios gikan sa Egipto;
may kusug sia subong sang iya sang baka nga talonon,
halunhonon niya ang mga pungsud nga iya mga kasumpung,
kag magadugmok sang ila mga tul-an,
kag palapsan sila sang iya mga baslay.
9Nagkuub sia, nagluko sia subong sang leon,
kag subong sang leon nga babayi; sin-o bala ang magapukaw sa iya?#Gen. 49:9.
Pinakamaayo ang tagsatagsa nga nagapakamaayo sa imo,
kag pinakamalaut ang tagsatagsa nga nagapakamalaut sa imo.”#Gen. 12:3.
Ang Tagna ni Balaam
10Kag nagdabdab ang kaakig ni Balac batok kay Balaam, kag gindagpi niya ang iya mga kamut; kag si Balac nagsiling kay Balaam, “Gintawag ko ikaw sa pagpakamalaut sang akon mga kaaway, kag yari karon, ginpakamaayo mo gid sila sining makatlo na. 11Busa karon palagyo ka sa imo duug; nagsiling ako, ‘Sa pagkamatuud itib-ong ko ikaw sa kadungganan,’ apang ang Ginoo nagpugung sa imo gikan sa kadungganan.” 12Kag si Balaam nagsiling kay Balac, “Wala man bala ako magpamolong sa imo mga manugbalita nga ginpadala mo sa akon, 13‘Bisan ihatag sa akon ni Balac ang iya balay nga puno sing pilak kag bulawan, indi ako makapalabaw sa polong sang Ginoo, sa paghimo gikan sa akon kaugalingon nga hunahuna sing maayo ukon malain; ang ginapamolong sang Ginoo, ina ipamolong ko?’ 14Kag karon, yari karon, ako nagakadto sa akon katawohan; kari, ipahibalo ko sa imo ang himoon sining katawohan sa imo katawohan sa olihing mga adlaw.” 15Kag gingamit niya ang iya paanggid, kag nagsiling,
“Nagasiling si Balaam nga anak ni Beor,
ang lalaki nga nagamuklat ang iya mga mata nagasiling,
16nagasiling ang nagapamati sang mga polong sang Dios,
kag nakakilala sang ihibalo sang Labi Gid Kataas,
nga nagatan-aw sang palanan-awon sang Makaako,
nga nagayaub, kag nagamuklat ang iya mga mata:
17makita ko sia, apang indi pa karon;
ginatolok ko sia, apang indi malapit:
may magagowa nga bitoon gikan sa Jacob,
kag isa ka cetro magalutaw gikan sa Israel;
magawagwag sang mga dulunan sang Moab,
kag magalaglag sang tanan nga anak nga lalaki ni Set.
18Ang Edom pagahublasan,
ang Seir man nga iya mga kaaway, pagahublasan,
samtang ang Israel nagaisganan.
19Gikan sa Jacob may isa nga may kagamhanan,
kag magalaglag sang nabilin sa banwa!”
20Niyan naglantaw sia sa Amalec, kag naggamit sang iya paanggid, kag nagsiling,
“Ang Amalec amo ang nahauna sang mga pungsud,
apang ang iya kaolihian malaglag.”
21Kag naglantaw sia sa mga Cenhanon, kag naggamit sang iya paanggid, kag nagsiling,
“Malig-on ang imo puluy-an,
kag ang imo pugad nahamtang sa sulud sang igang:
22Walay sapayan papason si Cain.
Tubtub san-o dalhon ka nga bihag ni Assur?”
23Kag naggamit sia sang iya paanggid, kag nagsiling,
“Kailo, sin-o bala ang mabuhi kon himoon sang Dios ini?
24Apang ang mga sakayan magaabut gikan sa baybayon sang Kitim
kag magasakit sila sang Assur kag magasakit sang Eber;
kag sia man malaglag.”
25Niyan nagtindug si Balaam, kag nagpauli sa iya duug; kag si Balac man naglakat sa iya dalanon.
Currently Selected:
NUMEROS 24: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
