LEVITICO 11
11
Kasapatan nga Matinlo kag Dimatinlo
(Deut. 14:3-21)
1Kag nagsiling ang Ginoo kay Moises kag kay Aaron, 2“Isiling sa katawohan sang Israel, Ini sila amo ang buhi nga mga butang nga makaon ninyo sa tunga sang tanan nga kasapatan nga yara sa duta. 3Ang bisan ano sa tunga sang kasapatan nga may koko nga nagapihak kag tiil nga nagapihakpihak kag nagapangusang, ina makaon ninyo. 4Walay sapayan ini sila dili ninyo pagkaonon sa mga nagapangusang ukon sa mga may koko nga nagapihak: ang camelyo, bangud nga nagapangusang sia apang wala nagapihak ang koko, dimatinlo ini sa inyo. 5Kag ang coney, bangud nga nagapangusang sia apang wala nagapihak ang koko, dimatinlo sia sa inyo. 6Kag ang conejo, bangud nga nagapangusang sia apang wala nagapihak ang koko, dimatinlo sia sa inyo. 7Kag ang babuy, bangud nga may koko nagapihak kag tiil nga nagapihakpihak apang wala nagapangusang, dimatinlo sia sa inyo. 8Sang unud nila dili kamo magkaon, kag dili kamo magtandug sang ila mga lawas nga patay; dimatinlo sila sa inyo.
9“Ini sila makaon ninyo, sa tanan nga yara sa mga tubig. Ang bisan ano nga may mga kapay kag mga himbis sa mga tubig, sa kadagatan ukon sa kasubaan, ina makaon ninyo. 10Apang ang tanan nga walay kapay kag mga himbis sa kadagatan, ukon sa kasubaan, sang tanan nga nagahulag sa mga tubig kag sang tanan nga buhi nga kasapatan nga yara sa mga tubig, kangil-aran sila sa inyo. 11Sila kangil-aran sa inyo; dili kamo magkaon sang ila unud, kag kangil-aran ninyo ang ila mga lawas nga patay. 12Ang bisan ano nga walay mga kapay kag mga himbis sa mga tubig ina kangil-aran sa inyo.
13“Kag ini sila kangil-aran ninyo sa kapispisan, dili sila pagkaonon, kangil-aran sila: ang aguila, ang aguila nga manugboong sing tul-an, kag ang dapayan, 14ang dapay, ang falcon sono sa iya sari, 15ang tagsa ka uwak sono sa iya sari, 16ang avestruz, ang murugmon, ang gaviota, ang banog sono sa iya sari, 17ang diotay nga bukaw, ang somorgujo, ang bukaw nga daku, 18ang may sungaysungay nga bukaw, ang pelicano, ang buitre, 19ang dugwak, ang tulabong sono sa iya sari, ang abubilla, kag ang kabug.
20“Ang tanan nga butang nga pakpakan nga nagasaug sa apat ka tiil kangil-aran sa inyo. 21Apang ini sila sarang kamo makakaon gikan sa tanan nga butang nga pakpakan nga nagasaug sa apat ka tiil, nga may mga paa sa ibabaw sang iya tiil, sa paglumpat sa duta. 22Sa ila sini sarang ninyo makaon: ang apan sono sa iya sari, ang bolog nga apan sono sa iya sari, ang sirumsirum sono sa iya sari, kag ang tibakla sono sa iya sari. 23Apang ang tanan nga butang nga pakpakan nga nagasaug nga may apat ka tiil, kangil-aran sa inyo.
24“Kag dimatinlo kamo bangud sini sa ila; ang bisan sin-o nga nagatandug sang ila mga lawas nga patay mangindimatinlo tubtub sa kahaponon, 25kag ang bisan sin-o nga nagadala sang ila mga lawas nga patay magpamunak sang iya mga panapton kag mangindimatinlo tubtub sa kahaponon. 26Ang tagsa ka sapat nga nagapihak ang koko apang ang iya tiil wala nagapihakpihak ukon wala nagapangusang, dimatinlo sa inyo; ang tagsatagsa nga nagatandug sa ila mangindimatinlo. 27Kag ang bisan ano nga nagalakat sa iya mga inugkarus, sa tunga sang kasapatan nga nagalakat sa apat ka tiil, dimatinlo sila sa inyo; ang bisan sin-o nga nagatandug sang ila mga lawas nga patay mangindimatinlo tubtub sa kahaponon, 28kag sia nga nagadala sang lawas nga patay nila magpamunak sang iya mga panapton kag mangindimatinlo tubtub sa kahaponon; dimatinlo sila sa inyo.
29“Kag ini sila amo ang dimatinlo sa inyo sa mga butang nga nagasaug sa duta: ang comadreja, ang ilaga, ang daku nga halo sono sa iya sari, 30ang tuko, ang buaya, ang taguto, ang tambilihan, kag ang cameleon. 31Ini sila amo ang dimatinlo sa inyo sa tunga sang tanan nga nagasaug; ang bisan sin-o nga magtandug sa ila kon patay sila mangindimatinlo tubtub sa kahaponon. 32Kag bisan ano nga mahologan nila kon patay sila mangindimatinlo, bisan ini gamit nga kahoy ukon panapton ukon panit ukon sako, bisan ano nga gamit ini nga ginagamit sa bisan ano nga buluhaton; dapat ilumoy ini sa tubig, kag mangindimatinlo ini tubtub sa kahaponon; niyan manginmatinlo ini. 33Kag ang tagsa ka suludlan nga daga nga sa sulud sini maholog ang bisan diin sa ila, ang bisan ano nga yara sa sulud sini mangindimatinlo, kag boongon ninyo ang suludlan. 34Ang tanan nga kalan-on sa sulud niya nga makaon, nga mabasa sing tubig, mangindimatinlo; kag ang tanan nga ilimnon nga mainum sa tagsa nga amo nga suludlan mangindimatinlo. 35Kag ang tagsa ka butang nga mahologan sang bisan ano nga bahin sang ila lawas nga patay mangindimatinlo; bisan horno ukon mga pugon, gub-on sia; mga dimatinlo sila, kag mangindimatinlo sa inyo. 36Walay sapayan ang tuburan ukon ang bobon diin nagasuput ang tubig manginmatinlo; apang ang nagatandug sang ila lawas nga patay mangindimatinlo. 37Kag kon ang bisan ano nga binhi nga inugsab-ug mahologan sang bisan ano sang ila lawas nga patay, manginmatinlo ini; 38apang kon ang tubig mabutang sa binhi kag ang bisan ano sang ila lawas nga patay maholog sa sini, mangindimatinlo ini sa inyo.
39“Kag kon mapatay ang bisan ano nga sapat nga makaon ninyo, sia nga nagatandug sang iya lawas nga patay mangindimatinlo tubtub sa kahaponon, 40kag ang nagakaon sang iya lawas nga patay magpamunak sang iya mga panapton kag mangindimatinlo tubtub sa kahaponon; sia man nga nagadala sang iya lawas nga patay magpamunak sang iya mga panapton kag mangindimatinlo tubtub sa kahaponon.
41“Ang tagsa ka butang nga nagasaug sa duta kangil-aran; dili pagkaonon ini. 42Indi kamo magkaon sang bisan ano nga nagasaug sa tiyan, kag sang bisan ano nga nagalakat sa apat ka tiil, ukon sang bisan ano nga madamu sing tiil, bisan ang tanan nga butang nga nagasaug sa duta, dili ninyo sila pagkaonon; kay kangil-aran sila. 43Dili kamo magmanginkangil-aran tungud sang bisan ano nga butang nga nagasaug; kag dili kamo magmangindimatinlo tungud sa ila, nga madagtaan kamo sa ila. 44Kay Ako ang Ginoo nga inyo Dios; busa pakabalaana ang inyo kaugalingon, kag magpakabalaan kamo, kay ako balaan.#Lev. 19:2; 1 Ped. 1:16. Dili kamo magdagta sang inyo kaugalingon tungud sang bisan ano nga nagasaug nga butang nga nagagiho sa duta. 45Kay Ako amo ang Ginoo nga nagpataklad sa inyo gikan sa duta sang Egipto, nga mangin-inyo Dios; busa magpakabalaan kamo, kay balaan ako.”
46Ini amo ang kasogoan nahanungud sang sapat kag sang pispis kag sang tagsa ka tinuga nga buhi nga nagagiho sa mga tubig kag sang tagsa ka tinuga nga nagasaug sa duta, 47sa pagbutang sing katuhayan sa tunga sang dimatinlo kag matinlo kag sa tunga sang buhi nga butang nga makaon kag sa buhi nga butang nga dimakaon.
Currently Selected:
LEVITICO 11: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
