JONAS 1
1
Si Jonas Nagapalagyo gikan sa Ginoo
1Karon nag-abut ang polong sang Ginoo kay Jonas#2 Hari 14:25. nga anak ni Amitai, nga nagasiling, 2“Tindug, kadto sa Ninive, inang banwa nga daku, kag magsinggit batok sa iya; kay ang ila pagkamalaut nagdangat sa atubangan nakon.” 3Apang si Jonas nagtindug sa pagpalagyo pa Tarsis gikan sa atubangan sang Ginoo. Nagdolhog sia pakadto sa Jope kag nakakita sing sakayan nga nagapakadto sa Tarsis; gani nagbayad sia sang iya hinakay, kag nagsulud sa sini, sa pagkadto upud sa ila sa Tarsis, sa pagpalayo sa atubangan sang Ginoo.
4Apang ang Ginoo nagpadala sing mabaskug nga hangin sa dagat, kag may mabaskug nga unus sa dagat, sa bagay nga daw maboong ang sakayan. 5Niyan ang mga sakayanon nagkalahadluk, kag ang tagsatagsa nagtuaw sa iya dios; kag gintagbong nila sa dagat ang mga dala nga yara sa sakayan, sa pagpamag-an sini sa ila. Apang si Jonas nagpanaug sa naidalum gid sang sakayan kag naghigda sia, kag natologan sing hamook. 6Gani ang pangolo sang sakayan nagkadto sa iya kag nagsiling sa iya, “Ano bala ang buut mo isiling, O palatolog? Bangon, panawag sa imo Dios! Basi nga ang Dios magdumdum sa aton, agud nga indi kita mawala.”
7Kag nagsiling sila ang tagsatagsa sa iya kaupud, “Kari, kag papalaran ta, agud nga mahibaloan ta kon bangud kay sin-o nag-abut sa aton ining malaut.” Gani nagpapalad sila, kag ang kapalaran naholog kay Jonas. 8Niyan nagsiling sila sa iya, “Isugid sa amon, bangud kay sin-o nag-abut sa aton ining malaut? Ano bala ang imo hilikuton? Kag diin ka bala maghalin? Ano bala ang imo duta? Kag sa ano ka nga katawohan?” 9Kag nagsiling sia sa ila, “Hebreo ako; kag nagakahadluk ako sa Ginoo, ang Dios sang langit, nga naghimo sang dagat kag sang duta nga mamala.” 10Niyan ang mga tawo nahadluk sing lakas, kag nagsiling sa iya, “Ano bala ining nahimo mo!” Kay nahibaloan sang mga tawo nga nagapalagyo sia gikan sa atubangan sang Ginoo, kay ginsugiran niya sila.
11Niyan ginsilingan nila sia, “Ano bala ang himoon namon sa imo, agud nga ang dagat maglinong sa amon?” Kay ang dagat nagdugang kag nagdugang kabalud. 12Nagsiling sia sa ila, “Hakwata ninyo ako kag itagbong ako sa dagat; agud nga ang dagat maglinong sa inyo; kay ako nakahibalo nga tungud sa akon nag-abut ining mabaskug nga unus sa inyo.” 13Wala sing sapayan ang mga tawo naggaud sing mabaskug nga makabalik sila sa duta, apang indi sila makasarang, kay ang dagat nagdugang kag nagdugang kabalud batok sa ila. 14Busa nagtuaw sila sa Ginoo, “Ginapakilooy namon sa imo, O Ginoo, indi kami pagdulaa tungud sa kabuhi sining tawo, kag indi kami pagpasangti sang dugo nga wala sing sala; kay ikaw, O Ginoo, naghimo sono sa imo nahamut-an.” 15Gani ginhakwat nila si Jonas kag gintagbong sia sa dagat; kag nag-untat ang dagat sa iya kasingkal. 16Niyan ang mga tawo nagkahadluk sing lakas sa Ginoo, kag nagdolot sila sing halad sa Ginoo kag naghimo sing mga saad.
17Kag ang Ginoo nag-aman sing daku nga isda sa paglamon kay Jonas; kag si Jonas didto sa tiyan sang isda sing tatlo ka adlaw kag tatlo ka gab-i.#Mat. 12:40.
Currently Selected:
JONAS 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society