JOB 8
8
Si Bildad Nagapamatuud sang Pagkatarung sang Dios
1Niyan si Bildad nga Suhanhon nagsabat,
2“Tubtub bala san-o ang pagpamolong mo sini nga mga butang,
kag ang mga polong sang imo baba manginkaangay sa mamadlus nga hangin?
3Ginapatiko bala sang Dios ang katarungan?
Ukon ginapatiko sang Makaako ang pagkamatarung?
4Kon ang imo mga anak nakasala batok sa iya,
gintugyan niya sila sa kamut sang ila pagkamalalison.
5Kon ikaw magdangup sing makugihon sa Dios
kag mag-ampo ka sa Makaako,
6kon ikaw putli kag matarung,
sa pagkamatuud karon magapulaw sia sa imo
kag magapauswag sang puluy-an sang imo pagkamatarung.
7Kag bisan ang imo pagpamuno diotay,
apang ang imo kaolihian magadugang sing daku.
8“Kay pakiana ka, ginaampo ko sa imo, nahanungud sa una nga panuigon,
kag magtalupangud ka sang nausisaan sang ila mga ginikanan;
9kay kahapon lamang kita, kag wala sing nahibaloan,
bangud nga ang aton mga adlaw sa duta landong.
10Indi bala sila magtudlo sa imo, kag magsugid sa imo,
kag magmitlang sing mga polong gikan sa ila tagiposoon?
11“Makatubo bala ang papiro sa wala sing lunang?
Makatubo bala ang bagaas sa wala sing tubig?
12Samtang nga hilaw pa sia kag wala matapas,
nagakalaya sia una sa iban nga gamhon.
13Amo ini ang mga banas sang tanan nga nagakalipat sa Dios;
ang paglaum sang didiosnon nga tawo mawala.
14Ang iya pagsalig mabugto,
kag ang iya pagsalig amo ang lawa sang damang.
15Magasandig sia sa iya balay, apang indi ini magtindug;
magakapyot sia sing malig-on sa iya, apang indi ini magapadayon.
16Hilaw sia sa dayag sang adlaw,
kag ang iya mga salingsing nagalapnag sa iya katamnan.
17Ang iya mga gamut nagapangabud sa tinumpok nga bato;
nagatolok sia sa duug sang mga bato.
18Kon laglagon sia sa iya duug,
niyan ini magapanghiwala sa iya, nga nagasiling, ‘Wala ako makakita sa imo.’
19Yari karon, amo ini ang kalipay sang iya dalanon;
kag gikan sa duta magagowa ang iban.
20“Yari karon, ang Dios dili magsikway sa tawo nga himpit,
kag dili sia magtib-ong sa mga manughimo sing malaut.
21Pun-on pa niya ang imo baba sing kinadlaw,
kag ang imo mga bibig sing sininggit.
22Ang nagadumut sa imo panaptan sing kahuluy-an,
kag ang layanglayang sang malauton mawala.”
Currently Selected:
JOB 8: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
